2 Korɛnt Munu 11
11
Pɔl valé nwunvɔzan dɛnnu
(Mt 7:15–20; Rom 16:17–18; Gal 1:6–9)
1Dé ka bɔalɛ léé, ka ’wuo dɔ anlé tavole wuo sɛ! Kalé zanté, ’ka ’wuo dɔ a wuo ma. 2Maa ka pu dɔ lesizan do kpen ɛ lɛ, yé maa ka nɔ Krist lɛ, blɛn lé é ’ka tan gɔné dɔɔa lo, a nya, bɛwemalé maa a ka ta maawona bélé Kazambale lé maawole zo. 3Naa, fɛan zo lé méné Eve saan élé dabli kɛlɛle nya, an kana léé, dé ka ’wuo é da sɛrɛ yé ka ’ka Krist kunwo ka bɛ fié nya yé ka vo a va loo? 4Naa, dé mi do da Jézu lé, ko alé we fe ka lɛ bɛ, a bɛ lé we fe lɛ ka lɛ, yé Kazambale Léli lé ka a ye, dé ka a bɛ lé we ’ma, yé wenéné lé ka a nyi si, dé ka a bɛ ’ma tɔɔn, ’té ka a ka ’wuo dɔna bɛ wuo tegeleee. 5Naa, é dɔ an gi léé, nwunvɔzan dɛnnu zima zima ’ko, wo ’ka gié lɛ an ta we do kpen kɛlɛle gi lo. 6Dé maa ’ka we fé an zua lo, maa we dɔɔ duowo, yé ko bɛ nagɔɔn ka lɛ bɛ faa tere ma, we faa tere gi.
7Maa anbozen kɛlɛ aan wo kiéné, ka kɛlɛle blɛn we gi, Kazambale lé Wenéné fele nya ka lɛ é pla, ’bɛ a wenyané nyaa? 8An léglizi bɛnu ta ble, wolé gɔɔli sile nya, bɔle ka va we gi. Yé dé maa a ka va, dé an mawe a fɛ do gi, maa ’ka é dɔle mi do nwiin kɔné nya a we ma lo; 9naa, bwenu lé wo si Masédɔane, fɛnu lé an mawe ke wo gi, wa nɔ an lɛ. Maa ’ka a nyi si lɛ léé, an kɛlɛ kɔné nya mi do kpen nwiin lo, yé maa ’ka dan a nyi si lɛ monomono lo. 10Krist lé webozen lé é ke an gi, a nya lé maa a fé, wo ’ka dan an tɔzinfémawe ’ko si lɛ an lee Akai tɛrɛ faa la monomono lo. Mɛmaléé? 11Ka ’ka sɔ lɛ an lɛ lo, ’bɛ we maa? Kazambale ɛ ’bɛ gi dɔɔ. 12Naa, wean maa a kɛlɛ, yé maa dan a kɛlɛ lɛ é ziin, yee lé é ke ’ko: munu lé wa kwa kulina léé, wobo gɔɔn nwunvɔzannu nya bélé ko zo, yé maa wo gi bɔra. 13Munu ’konu a nwunvɔzannu dɛn nya, wa dabli nyanama pazannu nya, wobo ma nɔla Krist lé nwunvɔzannu zo. 14Yé ’bɛ ’ka givuruwe nya lo; Satan bozen é ébo ma nɔlaan Bale lé lanje zo. 15Bɛwemalé dé alé nyanamapazannu wobo ma nɔla we tegele gi nyanamapazannu zo, ’bɛ ’ka givuruwe nya lo. Naa, wozé ’wuoplana é dan kɛlɛ lɛ wozé nyanama yɛrama.
Pɔl lé nyanéblelenu
(Kw 9:16, 23–25; 20:18–27)
16Maa lé é ziin léé, té mi do kpen an ye tavozan nya lo. Eɛ, dé ka an ye tavozan nya, ’ka ’wuo dɔ an wuo bélé tavozan zo yé maa é ziin maa anbo ze vɔ sɛ. 17We lé maa ke a fena, maa ’ka a fena bélé Krétiɛn zo lo, maa a fena tavole nya anbo ze vɔle we gi an bli tadɔle plɛplɛ nya. 18Mi kiɛre wobo ze vɔa tɛrɛlawe gi; amalé maa é ziin, maa dan anbo ze vɔ lɛ. 19Naa, ka wedɔɔmunu babané, ka ’wuo dɔa tavozannu wuo é zima. 20Dé mi ka kɛlɛ ’é wuomunu nya, dé mi ka table, dé mi kalé fɛ kyeenwo, dé mi ébo kɛlɛ blɛn ka ma, dé mi ka blin gyɛ, ’té ka ’wuo a é dɔle ’bɛzan wuo ’kyɛ. Ka bɔ! 21Yé ka léé, ko a sɔsɔ. Eɛ, weboen lé. Yara a an gyɛna.
Naa, dé é dɔ mi bɛnu gi léé, woo bli ta dɔa plɛplɛ yé wo ’wobo ze vɔ wean ma, ’té maa é ziin, an bli ta dɔa plɛplɛ. Maa a wefena tavozan zo. 22Wo léé, ’wa Ébrunu nyaa? Yé maa nii? Wo léé, ’wa Izraɛlnu nyaa? Yé maa nii? Wo léé, ’wa Abraam kulunu nyaa? Yé maa nii? 23Wo léé, ’wa Krist gi nyanamapazannu nyaa? Maa a we fena bélé tavozan zo. Yé maa nii? Maa ’ka ’bɛ nya loo? Anzé gié wozé ta. An nyanama pa é baba é mini wo ta; wo an bla é baba é mini wo ta, wo an vɔ bokɔn gi, ’bɛ gié wozé ta baa, yé maa anbo bɔra ga lɛ gɔnɔ kiɛre. 24Gɔnɔ soru Juifinu an bla gɔnɔ yɔ do wɔlɛ vu ta sɔraziɛn. 25Gɔnɔ yaa wo an bla wɛsɛné nya; gɔnɔ do wo an gyɛ gɔlɛ nya; gɔnɔ yaa ’yitagoro zana ko nya; an yiéyi do valé béli do kɛlɛ wɛyi va. 26Gɔnɔ kiɛre ’té maa a ta la; maa anbo bɔra ga lɛ yuunu va; maa anbo bɔra ga lɛ kyeenmunu lɛ; maa anbo bɔra ga lɛ an bɛnnu lɛ; maa anbozen bɔra ga lɛ bɛn bɛnu lɛ; maa anbozen bɔra ga lɛ fla; maa anbozen bɔra ga lɛ bwi gi; maa anbozen bɔra ga lɛ wɛyi va; maa anbozen bɔra ga lɛ dabli bwenu va. 27Maa nyanama pa, yé maa nyané ble; an vo é yuɛma é béli gɔnɔ kiɛre; lɔrɔ valé ’yiminilɔrɔ an gyɛ; an lɔrɔ sɔn gɔnɔ kiɛre; dunu an gyɛ; an vo é porole. 28’Bɛ ta loru, yi faa do do ma, léglizinu faa tabinle a an nwiin kɔné zo, ’té maa a é tunule ’bɛ nya. 29Mi kyɛn ɛ ke tɔɔtɔɔ yé maa ’ka tɔɔtɔɔ loo? De ɛ saan yé an bli ’ka nwa lɛ loo?
30Dé é a lé maa anbo ze vɔ, ’té an tɔɔtɔɔ we ma lé maa dan anbo ze vɔ lɛ. 31Kazambale lé ke Mizan Jézu Ti nya, ’té wa drɔɔ voo lɛɛfaama a glɛ ’ka lo, é a gi dɔɔ léé, an ’ka viéwona lo. 32Dé maa a Damas, minwiinzan Aréta lé gbɔrɔnama sunyanu dɔ Damas munu lé fla zi an kunle we ma; 33naa, wo an bɔra fɛnɛti do ta kyɛɛ gi, kɔnguru ta, yé an so wo lee.
Pilihan Saat Ini:
2 Korɛnt Munu 11: GOURU
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
Alliance Biblique de Cote d'Ivoire 1979