LUKAS 24
BTX
24
Jesus nggeluh mulihi
(Mat. 28:1-10; Mrk. 16:1-8; Joh. 20:1-10)
1Erpagi-pagi si lampas i bas wari Minggu, berkat diberu-diberu e ku kuburen. Ibabana rempah-rempah si merim si enggo isikapkenna. 2Idapetina batu si nutupi lubang kuburen e enggo igulingken. 3E maka bengket ia ku bas; tapi lanai i je mait Tuhan Jesus. 4Asum kalak e tedis i je dingen mamang atena, rempet tedis i deherna dua kalak dilaki, uisna terang ersinalsal. 5Mbiar kal diberu-diberu e, e maka nembah mungkuk ia seh ku taneh. Tapi nina si dua kalak e man bana, “Engkai maka idaramindu Kalak si nggeluh i tengah-tengah kalak si enggo mate? 6IA lanai i jenda; IA enggo ipekeke. Ingetlah kai si enggo ikatakenNa man bandu asum IA i Galilea denga, e me, #Mat. 16:21, 17:22-23, 20:18-19, Mrk. 8:31, 9:31, 10:33-34, Luk. 9:22, 18:31-33 7‘Anak Manusia si isuruh Dibata la banci lang iendesken man kalak perdosa, ipakuken ku kayu persilang janah i bas wari peteluken nggeluh mulihi.’ ”
8Kenca bage i inget diberu-diberu e kai si enggo ikataken Jesus. 9Jenari mulih ia i kuburen nari, e maka iturikenna kerina kejadin enda man ajar-ajar si sepuluh sada bage pe man ajar-ajar si deban. 10Gelar diberu-diberu e: Maria Magdalena, Johana ras Maria nande Jakup. Bage pe diberu-diberu si deban si ikut ras kalak enda nurikenca man rasul-rasul e. 11Tapi la tek rasul-rasul e. Iakapna maka kai si ikataken diberu-diberu e guak saja. 12Tapi keke Petrus jenari kiam ia ku kuburen. Asum itungkirna ku bas, uis mbentar balut mait e nari ngenca idahna, lain si e kai pe la lit. E maka mulih ia ku rumah dingen mamang atena kerna kai si enggo jadi e.
Perdalanen ku Emaus
(Mrk. 16:12-13)
13I bas wari e pe lit dua kalak ajar-ajar Jesus lawes ku sada kuta. Gelar kuta e Emaus. Kuta e kira-kira sepuluh sada kilometer i Jerusalem nari. #Mrk. 16:12 14I tengah dalan ercakap-cakap ia duana kerna kerina si enggo jadi e. 15Asum ia ercakap-cakap, reh me Jesus ndeheri ia dingen erdalan ras. 16Idah si dua kalak e nge Jesus, tapi la itandaina. 17Nina Jesus man bana duana, “Kerna kai nge si icakapkenndu janah erdalan e?”
Jengang kalak e janah teridah i bas ayona maka ceda atena. 18Sekalak i bas ia gelarna Keleopas ngaloi man Jesus nina, “Ntah kam kal nge ngenca kalak pertandang i Jerusalem si la meteh kerna kejadin-kejadin i bas wari-wari si perpudi enda?”
19“Kai kin e?” nina Jesus nungkun.
Erjabap kalak e, “Kerna kai si enggo jadi man Jesus kalak Nasaret e. IA sekalak nabi janah erkuasa i bas kata ras perbahanen subuk iakap Dibata bage pe kerina manusia. 20Tapi IA enggo idudurken imam-imam si mbelin ras kalak si erkuasa gelah iukum mate. IA ipakuken ku kayu persilang. 21Pada hal enggo iarapken kami maka IA me si mbebasken bangsa Israel. Tapi i babo si e kerina sendah me petelu wariken kenca kejadin e. 22Lit ka pe piga-piga teman kami si diberu si erbahanca kami sengget. Ndai erpagi-pagi si lampas lawes ia ku kuburen, 23tapi lanai lit i je idapetina mait Jesus. Jenari mulihken ia janah iturikenna maka ia enggo ngidah malekat-malekat. Ikataken malekat-malekat e man bana maka Jesus nggeluh kap. 24Kenca bage piga-piga kalak teman kami lawes ku kuburen. Idapetina payo kal bagi si ikataken diberu-diberu e. Tapi la idahna Jesus.”
25Jenari nina Jesus man si dua kalak e, “Bodoh kal kam tuhu dingen mesera kal iakapndu tek nandangi kai si ikataken nabi-nabi. 26Ma kin Mesias si ipadanken Dibata e arus ngenanami kiniseran e janah alu bage bengket kemulianNa?” 27Jenari iterangken Jesus man si dua kalak e kai si enggo isuratken i bas Pustaka Si Badia kerna IA, mulai i bas kitap-kitap Musa ras kerina kitap nabi-nabi.
28Kenca seh kalak e ku kuta si man dahinna, Jesus tempa-tempa nerusken perdalanenNa. 29Tapi si dua kalak e mindo alu meseksek nina, “I jendalah kita sendah, sabap wari enggo ben nandangi gelap me.” E maka bengket Jesus ku rumah janah tading IA ras kalak ndai. 30Ibuat Jesus roti, ikatakenNa bujur man Dibata jenari icepik-cepikNa janah iberekenNa man kalak e. 31Kenca bage minter terang pengidah si dua kalak e janah itandaina Jesus. Tapi i je ka minter lanai iidahna Jesus. 32Nina si dua kalak e sapih-sapih ia, “Ma malem kal tuhu ateta dingen ergiah-giah ukurta asum IA ngerana ras kita i gedang-gedang dalan dingen iterangkenNa man banta kerna isi Pustaka Si Badia?”
33Keke ia duana dingen minter mulihken ku Jerusalem. I je idapetina ajar-ajar si sepuluh sada kalak pulung ras teman-temanna si deban. #Mrk. 16:13 34Nina si pulung e ngalo-ngalo ia, “Tuhu-tuhu Tuhan enggo nggeluh mulihken! Enggo icidahkenNa baNa man Simon.”
35Jenari si dua kalak e pe nuriken, kai si enggo jadi i tengah dalan janah kuga ia enggo nandai Tuhan asum icepik-cepikNa roti.
Jesus ncidahken baNa man ajar-ajarNa
(Mat. 28:16-20; Mrk. 16:14-18; Joh. 20:19-23; Perb. 1:6-8)
36Asum kalak ndai ercakap-cakap kerna kejadin e, rempet tedis Tuhan i tengah-tengahna janah nina, “Mejuah-juah man bandu.”
37Sengget dingen mbiar kal kalak e. Iakapna maka ia ngidah begu. 38Tapi nina Tuhan man bana, “Engkai maka kam mbiar? Engkai maka turah ukur la tetap i bas kam? 39Nehenlah tanKu ras nahengKu. Perdiateken, ma idahndu Aku nge enda. Dadaplah Aku gelah ietehndu maka adi begu labo lit daging ras tulanna bagi iidahndu lit i bas Aku.”
40Asum IA ngerana e icidahkenNa tanNa ras naheNa man kalak e. 41Tapi langa denga kalak e tek perbahan ia dem alu keriahen dingen mamang denga atena; e maka nungkun Tuhan nina, “Lit pangan i bas kam?” 42Ibereken kalak ndai man baNa sada potong ikan si enggo ipanggang. 43Ibuat Jesus ikan e jenari ipanNa i lebe-lebe kalak ndai.
44Jenari nina Tuhan man kalak ndai, “Kai si enggo jadi enda enggo Kukataken nai man bandu asum Aku ras kam denga e me: Kerina si isuratken kerna Aku i bas Undang-undang Musa ras surat nabi-nabi bage pe i bas Masmur enggo jadi kap.”
45Kenca bage ibuka Tuhan perukuren kalak e gelah iangkana si tersurat i bas Pustaka Si Badia. 46Nina man kalak ndai, “Lit kap tersurat maka Mesias si ipadanken Dibata e arus ngenanami kiniseran, janah i bas wari si peteluken arus keke i bas si mate nari. 47Bage pe i bas gelarNa berita kerna jera ras pengalemi dosa arus ipeseh man kerina bangsa, ibenaken i Jerusalem nari. 48Kam me jadi saksi si enda kerina. 49Janah Aku jine nuruhsa man bandu kai si enggo ipadanken BapangKu. Tapi arus itimaindu i bas kuta enda seh nusur kuasa i datas nari man bandu.” #Perb. 1:4
Jesus nangkih ku Surga
(Mrk. 16:19-20; Perb. 1:9-11)
50Jenari ibabai Jesus kalak e ku darat kuta, seh ku Betani. I je iangkatNa tanNa janah ipasu-pasuNa kalak e. #Perb. 1:9-11 51Asum IA masu-masu, sirang IA ras kalak e; iangkat IA ku Surga. 52Nembah erjimpuh kalak e man baNa, jenari meriah kal ukurna mulih ku Jerusalem. 53Gedang-gedang wari ipujina Dibata i bas Rumah Pertoton.
Pustaka Si Badia, Today's Batak Karo Version © 2003, Indonesian Bible Society – Lembaga Alkitab IndonesiaPelajari Lebih Lanjut Tentang Pustaka Si Badia