Luk 11
11
Zɛzi ahɛlɛ bayokwɛ beji nda babɔndɔ
( Matiye 6.9-13; 7.7-11)
1Ibwate buya, Zɛzi ajasa bobɔndɔngɔkɔ iyate isi. Usya ya ango ahijɛsɛ bobɔndɔngɔkɔ, imwate yokwɛ mweji mwa himwa ango te: «Ku wamɛ hɛlɛcɛ bɛhɛ nda babɔndɔ, nda Za ahɛlɛsɛ bayokwɛ beji.» 2Ya Zɛzi asɔhɔ na bango te: «Usya ya bya bɔndɔ, sɔhɔkɔ natɛ: Hangwɛ aho aji bya iko, jinɔ jɔbɛ ja jace Pu, yaka o kɔkɛcɛ moto wahajɛ! 3Mwenhe, wɛcɛ bɛhɛ maja maho minyan mahajɛ! 4Yɛnɛcɛ bɛhɛ cɛyi ikungwaka mesɛmbɛ myaho, nda bɛhɛ bayɛnɛ bato babeka bɛhɛ bobe cɛyi. Teka jika te bemba bibebe bya mamace bɛhɛ.»
Ihimwaka bewɛcɛ bihi
5Zɛzi amaka sɔhɔ na bango te: «Ijaka te iwate o panga bihi aje na mwanyangwɛ, alwa ikumɛcɛ ango o lebelebe ya epundu, ya ango asɔhɔ na neji te: “Mwanyangwamɛ bɔmɔkɔ mɛ bapɛmbɛ bahanto. 6Bosina te, majetɛ na iwate mwanyangwɛ amɛ wa cɛyi amuya osatɛ, maje teka emba ya mewɛcɛ ango.” 7Nde mwanyangwɛ akasa na neji o katɔ ya Elongwɛ te: “Djikaka imɛ wayɔ, beyata ekucɛ ya Elongwɛ, bɛhɛ na bana bamɛ benanga, makusi yemwa iwɛcɛ ɔbɛ bapɛmbɛ.” 8Nde matanda bihi te, mwanyangwɛ abiyemwaka na iwɛcɛ ango bemba bya ango himwa byahajɛ, mwajiyemwa na bosina bwango aji mwanyangwɛ, nde eyemwaka na bosina bwango aji na hun. 9Bosina mɛnɛ bwa imɛ matanda bihi te: «Himwaka bewɛcɛ bihi, hakaka byekumɛcɛ, dumɛcɛ bejibwaka bihi. 10Mombo, ahimwa wa bawɛ, ahaka akumɛ, adumɛ ekucɛ wa bajibwa. 11Bya bihi baji, usya mwana ahimwa fɛ na hangwɛ, hangwɛ, abiwɛcɛ ango taji kate fɛ? 12Kate, abiwɛcɛ ango kola usya ango ahimwa ango icɛyi? 13Wɛnɛ bihi bato babobe, byayeba iwɛcɛ bemba bya mbɛ na bana ba bihi, engamucɛcɛ na hangwɛ wa bihi aji biko, mwaji wɛ Ekokoyi ya Pu na bato bahimwa ango!»
Zɛzi apepa nkuku
( Matiye 12.22-30; Maliki 3.22-27)
14Ibwate buya Zɛzi apepa nkuku o nyo ya moto wa nkina. Usya nkuku mwɛ mwapwasa o nyo ya moto wɛ, moto wɛ te asɔhɔ, usɛ lupu ja jasa okate jayecɛ. 15Ya ibate basɔhɔ te: «Yɛ Bezebuli, wa nɛni mwa menkuku awɛ Zɛzi pizo ya ipepaka menkuku!» 16Ya ibate bamama Zɛzi, na isɔhɔkɔ neji te: «Bekaka o boho bwaho ndembo yayenga bya iko.» 17Nde, Zɛzi ayebakasa matemange mango, asɔhɔ na bango te: «Usya bato ba etomba ɛkɔ bayana ibaji bamɛnɛ na bamɛnɛ, etomba yehemanaka, na belongwɛ byetuwaka ukwa ibyate. 18Wɛnɛ Satan aje o ibaji na Etomba eji, Etomba eji yehimwaka na? Bosina bya ngusɔhɔkɔ te, imɛ mapepa menkuku na pizo ya Bezebuli awɛ imɛ. 19Ice Bezebuli ewɛ imɛ pizo ya ipepaka menkuku, nde amuwɛ bana ba bihi pizo ya ipepaka menkuku za? Ya ango ya bana ba bihi bepabaka te byekwazɔ! 20Nde wɛnɛ Zambe amuwɛ imɛ pizo ya ipepaka menkuku, usɛ, ihɛlɛcɛ te Etomba ya Zambe yeya wa bya bihi baji.»
21«Usya moto wa pizo aji na makɔngɔ na bangɔngwɛ ikɔlɔkɔ Elongwɛ, ya hɛlɛ te alonge bokumani bwɛji utabu. 22Nde, usya moto ayeka ango pizo buce aya na iyobaka ango, na ipalaka makɔngɔ na bangɔngwɛ mango abukwɛkɛsɛ, na ikabaka bokumani byahajɛ bwango akwasa. 23Moto aji teka jonga na namɛ, aje na mbyɔlɔ na namɛ, moto aji teka nyamwa imɛ isojɛcɛ bato, ango ahanga bango.»
Ilumye ja nkuku o nyo ya moto
(Matiye 12.43-45)
24«Usya nkuku mwapwa o nyo ya moto, alwa o isi ya bɔngɔ, ihakaka isi ya ijaka, wɛnɛ ango teka kumɛ, ya ango asɔhɔ te: “Mehunwanaka o Elongwɛ amɛ ya mamuja.” 25Usya ango ahunwana o Elongwɛ ya ango ajasa, akumɛ bekɔmbɔ, beyɛnɛ te yango obwɛji. 26Ya ango alwa ikwaka imyate menkuku nanyin na hanto myayeka ango bwa, ya bango bakweya o nyo ya moto wɛ, onyate mɛnɛ, njanga mwa moto wɛ, mwayekana mwa bohoboho.»
Mato wa mbɛ
27Usya ya Zɛzi asɔhɔkɔsɔ nɛ, ya mwehito abesɛ ekɔlu o lebebe ya lupu, na isɔhɔkɔ te: «Mwehito amukɔlɔ ɔbɛ o mwɛŋyi na inyanjɛcɛ ɔbɛ aje o mana!» 28Nde, Zɛzi akasa te: «Bato bayoka iyɔkɔ ja Zambe na isiswaka jango o menlema, bango baji o mana!»
Bato bahimwa Zɛzi ndembo
( Matiye 12.38-42)
29Usya lupu ja bato jaya ikubaka Zɛzi, ya ango asɔhɔ na bango te: «Bato ba mwenhe bobe, bahimwa ndembo, nde, teka ndembo ya bango beyɛnɛcɛ, ka, ndembo ya yekanasa na Zonasi. 30Nda Zonasi ajasa ndembo ya bato ba betafɛlɛ ya Ninivi, etɛ mɛnɛ ya Mwana moto ejaka ndembo ya bato ba mwenhe. 31O buya bwa mpabo, mwehito aji nkani mɔngɔ Mwancɛ eyemwaka oboho bwa bato ba mwenhe, na ihujɛcɛ bango o nyaŋwu, bosina te ayenga manjɛnja mɔngɔ ma bopama buce, iyokaka mayɔkɔ ma bokombo ma Salɛmɔ. Nde opanga etɛ yajɛ na moto amuyeka Salemɔn! 32O buya bwa mpabo, bato ba Ninivi beyemwakasa oboho bwa bato ba mwenhe ihujɛcɛ bango o nyaŋwu, bosina te, ba Ninivi behongɛ bejɛmi byango usya bango bayokasa Zonasi iyengaka mwɛnjɛ. Nde opanga etɛ yajɛ na moto amuyeka Zonasi.
Jihɔ jajɛ moji mwa nyo
( Matiye 5.15; 6.22-23)
33«Teka moto anyeniyonjɛ elambi ibumɛcɛ yango na lombo, nde bangujikaka yango ukwa etaka, na bosina te bekweyaka o Elongwɛ beyɛnɛcɛ moji. 34Jihɔ jɔbɛ jaje elambi ya nyo ɔbɛ, wɛnɛ jihɔ jɔbɛ jaje bɔnhu, na nyo ɔbɛ yahajɛ yejaka ngwe, nde, wɛnɛ jaje bobe, na nyo ɔbɛ yahajɛ yaje o epundu. 35Jaka na bocɛngu, bosina te moji mwaji na nɔbɛ, mwa toko kalwa epundu. 36Usya nyo ɔbɛ yahajɛ yaji o moji, teka minɛ iyate ecesa yaji o epundu, yahajɛ yejaka o moji, nda etɛ ya elambi ya yonjɛ ɔbɛ buce.»
Zɛzi ahacɛ bafalizɛ na melɔnji mya ceko mwa Zambe
( Matiye 23.1-36; Maliki 12.38-40)
37Usya Zɛzi ahijɛsɛ bosɔhɔkɔ, ya iwate falizɛ, ahimwa ango ijaka maja bya Elongwɛ eji, ya ango akweya na ihulaka hinsi okuna etaka ya baja maja. 38Ya Falizɛ ayɛnɛ Zɛzi ijaka maja, teka beka ibonhu ja ango ipubɛcɛ mabɔ, ya ango ayecɛ. 39Ya Ku asɔhɔ na neji te: «Yɛnɛcɛ nda bihi bafalizɛ baji. Byangu kungwaka mekɔngɔ mya bepɛlɛ na mya bakala, nde okatɔ melema mya bihi myaje humɔn na matemange ma bwa, na ihingamaka ihibaka. 40Byayoke nembanemba, Zambe amuhuna mekɔngɔ, ango okayi amuhuna na katɔ ya mwɛŋyi. 41Okate, wɛcɛ mentende bemba byaji o bepɛlɛ na bakala ba bihi, na etɛ yɛ, byahajɛ bya bihi byabijaka pu. 42Yololo na bihi ba-Falizɛ! Ya byanguwɛcɛ na Zambe dimi wa bekɔmbɔkɔ, nda ndumbwalola, na bokayi bwa ndundulu, na filinji. Nde, byangubyaza maheya na emba ya mbɛ buce ya nceko. Emba ya byamucobeka boho yɛ, teka yebijɛ ibyate. 43Emba ya bohihi yabipundaka bihi bafalizɛ! Byangunɔnɔkɔ ijaka o masi maboho o belongwɛ bya membɔndu bya ba-Zufi, na inɔnɔkɔ te basoswace bihi o masi ma beluka. 44Emba ya bohihi yabipundaka bihi! Byaje nda behanda byabaji teka yɛnɛ, na bato ijongaka ukwa byango teka yeba!» 45Imwate lɔnji mwa nceko mwa Zambe mwa sɔhɔ neji te: «Lɔnji, usya o sɔhɔ nɛ, o lowɛ na bɛhɛ!» 46Zɛzi ahungwɛ neji te: «Emba ya bohihi yabipundaka bihi! Melɔnji mya nceko mwa Zambe! Byanguhacɛcɛ ukwa bato byɛlu bya bojilo buce, nde byanyamwe bango ibɛpɛcɛ byɛlu mɛnɛ. 47Yololo na bihi bato Balonga behanda bya mentɔci, nde bakɔkɔ ba bihi ba bomasa! myango 48Usya byabeka nɛ, ihɛlɛcɛ te bihi bamukɔbɛ o bemba bya bakɔkɔ ba bihi babekasa, na bosina bwa te bango beboma mentɔci, ete bihi byayebɛ behanda bya mentɔci mɛnɛ! 49Bosina mɛnɛ Zambe o bokombo bweji asɔhɔ na bango te: “Melomaka bango mentɔci na batɔtu, babibomakasa bango, na indenjɛcɛ bango.” 50Bosina mɛnɛ, Zambe abipabaka bato ba mwanga mutɛ na bosina bwa maza ma mentɔci myahajɛ, mya babomasa o itase ja mɔngɔ. 51itasɛcɛ ilɛlɛ ja Abɛli moto wa hongololo ngu na ja Zakali, mwana wa Balasi, wa byabomasa opanga etaka ya bawɛ bebuwa na njimba. Matande bihi, yaje mombo te: Malɛlɛ ma bato banɛnɛ ba babomasa metuwaka ukwa bihi bato ba mwɛhɛ!» 52Emba ya bohihi yabipundaka bihi, melɔnji mya nceko! Byekwa mesabi myajibwa itulu ja iyeba, bihi mɛnɛ batakweye, na bahaka ikweyaka, byanguhimbaka bango.» 53Usya Zɛzi amanyasa o elongwɛ yɛ, melɔnji mya Nceko na bafalizɛ, basɔnɔ na inganyaka buce amɛnɛ neji, na ihimwaka ango bekana, o mambo mɛ mahajɛ 54Bajakasa obolamba ango na bekana bya bango bahimwakasa ango, ihakaka bekana bibebe byango esɔhɔkɔ, ete bahacɛ ango ibuza.
Pilihan Saat Ini:
Luk 11: KOQ
Sorotan
Bagikan
Salin
Ingin menyimpan sorotan di semua perangkat Anda? Daftar atau masuk
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
