ƗMbombo ɨzya Bhasontwa 24

Bhahunʼtaaka ʉPaulo hwa nʼgoosi ʉwɨ mukowa

1Lwa zyashila ɨnsiku zisaanu, ʉnʼsayi ʉnʼgoosi ʉwa Ngʉlʉbhɨ ʉAnaniya ahafiha hwi‑ibooma ɨlyɨ Kayisaliiya. Ahafiha peeka na bhagoosi bhamo bha Bhayahuudi nʉ muntu weeka ʉmwɨmɨɨlɨli ʉwɨ nongwa, ʉyo itaawa lyakwe ahali yʉ Teetulo. Bhahabhala humʼmʉʉzye ʉnʼgoosi ʉwɨ mukowa ʉFeeliki wa‑ahali Nʼnuumi ɨnongwa zya bhahanʼtakilaga ʉPaulo. 2Ɨpo ʉPaulo ahakwiziwa mwi‑ikoloti. ɄTeetulo ahanda ayanje amazwi aga hunʼtaake ʉPaulo ahaga, “Aawe wʉFeeliki wɨ nshɨnshɨ, ʉlongozi waaho ʉwinza wataavwa aje, tiseshelaje ʉtengaanu ʉgoosi mu nsiku zyonti ɨzi. Nantele wefwizye ɨmbiibhi mu nsi ɨnɨ. 3Tihuzyejeelela ɨzyo zyonti hu luseshelo wiila na hwi‑idala lyolyonti, na‑afumye ɨnsalifyo ɨnyinji hwaliiwe poponti paala. 4Ɨshi saga ɨhwanza huje, ɨʼlisye ahabhaazyo ahatali haani. Ɨhulamba huje, ʉtitejeelezye hu jimbiilizu amazwi geetu mashe.

5Ʉmuntu ʉnʉ, tahanʼnolile huje mwandiilizi haani. Aleeta ibho hu Bhayahuudi abhɨ nsi zyonti. Ʉmwene yʉ nʼgoosi ʉwɨ mpuuto ɨyi‑ilenga ɨya Bhanazaleeti.#24:5 mpuuto ɨyi‑ilenga ɨya Bhanazaleeti Abhantu bha bhahamʼmɨnjɨlɨlaga ʉYeesu bhahakwiziwaaga Bhanazaleeti, pɨpo ʉYeesu ahali wa hu Nazaleeti. ABhayahuudi bhahashilolaga ɨshipʉga ɨsho aje, shi‑ilenga. 6Nantele ahanzaga abhɨɨshe ʉwaavu mu lubhaga lwɨ nyumba ɨmfinjile ɨya Ngʉlʉbhɨ, ɨpo tahamʼmena, tahanʼkhata. Tahanzaga aje, tinʼnonje alɨngaane nɨ ndajizyo zyetu, 7leelo ʉnʼgoosi ʉwa bhagoosi bha bhalwi ʉLiisiya ahɨnza na bhalwi abhinji, ahamʼfyʉla hwaliitɨ hwi‑ikhone. 8Ahabhalajizya bhaala bha bhanʼtaakile huje, bhɨnze bhanʼtaake hwaliiwe.#24:6-8 Tahanzaga aje, tinʼnonje alɨngaane nɨ ndajizyo zyetu, leelo ʉnʼgoosi ʉwa bhagoosi bha bhalwi ʉLiisiya ahɨnza na bhalwi abhinji, ahamʼfyʉla hwaliitɨ hwi‑ikhone. Ahabhalajizya bhaala bha bhanʼtaakile huje, bhɨnze bhanʼtaake hwaliiwe Amazwi ɨgo saga galɨɨho mu nsimbo zimo ɨzyɨ mandɨ ɨzyɨ Shiyunaani. Hwope aawe nkashele ʉhumʼmʉzɨɨlɨzya, ʉbhala‑amanye huje, ɨnongwa zyonti ɨzi zya tihunʼtaakila hwaliiwe zyɨ lyoli.” 9ABhayahuudi bhonti bha bhahali paala bhahabhʉngaana, bhahasimishizyaga ɨnongwa zya‑ahayangaga ʉTeetulo, bhahagaga, “Ɨzyo zyonti zyɨ lyoli.”

ɄPaulo ahwiyʉʉmɨla hwa Feeliki ʉnʼgoosi ʉwɨ mukowa

10Ɨpo ʉnʼgoosi ʉwɨ mukowa ʉFeeliki ahamʼmwɨtɨshɨla wope ʉPaulo huje, ayanje. ɄPaulo ahanda ahwiyʉʉmɨle ahaga, “Naasha ahwiyʉʉmɨle pitagaalila lyaho hu nongwa ya‑aje, ʉli witongwa ʉwɨ maaha aminji mu nsi ɨnɨ. 11Weewe ʉgasimishizya shinza huje, zishilile ɨnsiku ishʉmi na zibhɨɨlɨ lwene, afume lwa nahabhalile hu Yelusaleemu humʼpuute ʉNgʉlʉbhɨ. 12Abhantu ɨbha bha bhahuntaaka saga bhahanaajile lwɨ‑ɨjeehana nʉ muntu nka weeka. Saga bhahandolile lwɨ‑ɨhubhasonzanya abhantu mu lubhaga lwɨ nyumba ɨmfinjile ɨya Ngʉlʉbhɨ, awe mu nyumba ɨzya‑apuutile na‑amanyiilile, awe apanjɨ poponti paala mwi‑ibooma. 13Hwope saga bhabhajiiye lwonti asimishizye hu nongwa ɨnɨ ya bhantaakile.

14Lyoli, lyɨ‑ɨhwɨtɨha pitagaalila lyaho lya lyɨli, ɨhuyilondolezya ɨmpuuto abheene ya bhayiga mpuuto yi‑ilenga. Leelo hwi‑idala ɨlyo ɨlya hunʼnondolezye ʉMwɨnɨ ʉYeesu, ɨhumʼpuuta ʉNgʉlʉbhɨ ʉwa bhamaama bheetu. Peeka nɨ‑ɨzyo, ɨhuzyɨtɨha zyonti zya zili mu ndajizyo zya Moose, na zya zyahasimbwilwe mu vitaabu ɨvya bhakuwi bha Ngʉlʉbhɨ abhɨ mandɨ. 15Anɨ ɨmbɨɨshɨle ʉlusʉʉbhɨlo lwanɨ hwa Ngʉlʉbhɨ, nanshi ɨbha bhope sha bhabhɨɨshɨle ʉlusʉʉbhɨlo hwa Ngʉlʉbhɨ huje, ʉNgʉlʉbhɨ ahayihubhazyʉsya abhafwe bhonti, abhagolosu na bhabhomba mbiibhi.#24:15 bhabhomba mbiibhi Bhaazya izwi Bhabhomba mbiibhi hu Ngalulanyo ɨyɨ Mazwi aMajenu hu malishilo wɨ shitaabu ɨshi. 16Sha shɨɨsho ɨhwifumya abhombe ɨnyinza ɨnsiku zyonti huje, lisahabhe ɨlya hundeetele ɨnsoni pa maaso ga Ngʉlʉbhɨ na pa maaso ga bhantu.

17Lwa naakhala amaaha aminji ʉhutali, nahaweela hu Yelusaleemu huje, ɨntwale ɨvintu vya vigabhaavwa abhapɨɨna, na‑afumye ɨnsangu hwa Ngʉlʉbhɨ. 18Ɨshi, abhantu ɨbha bhahanaaga mu lubhaga lwɨ nyumba ɨmfinjile ɨya Ngʉlʉbhɨ lwɨ‑ɨmalile ɨmpuuto ɨya hwisangalusye. Lyoli saga nahatʉʉhaga ʉmwo nɨ mpʉga ya bhantu, lyope ibho saga lyahali. Leelo, bhahali aBhayahuudi bhamo bha bhahafumile hu mukowa ʉgwɨ Aasiya. 19Ɨbho bha bhagakhondela abhe pitagaalila lyaho ɨpa afumye amasitaaka gaabho, nkashele bhali ni‑izwi lyolyonti ɨlya huntaake. 20Bhope ɨbha bha bhali ɨpa, bhayanje bhɨɨbho ʉbhiibhi wowonti wa bhahawulolile hwaliinɨ, lwa nahɨmɨlɨɨye pilongolela li‑ikoloti lyabho igoosi. 21Jibha bhahunʼtaaka hu nongwa ya‑aje, nahayanjile hwi‑izwi igoosi pitagaalila lyabho huje, ‘Muhuntaaka ɨleelo, pɨpo ɨhwɨtɨha aje, abhafwe bhahayizyʉha.’ ”

ɄFeeliki agonezya ɨnongwa ya Paulo

22Ɨshi ʉFeeliki ahagonezya ɨnongwa ɨla, pɨpo ahamɨɨnye shinza ɨnongwa ɨzya Mwɨnɨ ʉYeesu. Ahabhabhʉʉzya ahaga, “Nahayifumya ʉlugamulo ʉlwɨ nongwa yeenyu, lwa wɨnza ɨpa ʉnʼgoosi ʉwa bhagoosi bha bhalwi ʉLiisiya.” 23Ɨpo ʉFeeliki ahanʼnajizya ʉnʼnongozi ʉwa bhalwi huje, bhanʼnɨndɨlɨlaje ʉPaulo, leelo bhanʼsatule amanyololo. Nantele, bhagandi hubhakhaane abhamanyani bhaakwe humʼpeele vya‑ahwanza.

24Ɨshi, ɨnsiku ɨndoodo lwa zyashila, ʉFeeliki ahɨnza peeka nʉ nʼshɨ waakwe ʉDulusiila wa‑ahali Nʼnyahuudi. Ɨpo ahalajizya huje, bhanʼneete ʉPaulo. ɄPaulo lwa waafiha, ahanda hubhabhʉʉzye ɨnongwa ɨzya humʼmwɨtɨshe ʉYeesu ʉKilisiti. 25Leelo lwa‑ahajendelelaga hubhabhʉʉzye zyonti hu nongwa yɨ golosu, ahwikhaane abhombe ɨmbiibhi na‑aje, ʉNgʉlʉbhɨ alibhɨɨshɨle isiku lya‑ahayihubhalonga abhantu, ʉFeeliki ahoogopa tee. Ɨpo ahamʼmʉʉzya ʉPaulo ahaga, “Ɨshi sogola! Nahayihukwizya nantele, nkashele ɨmbe na habhaazyo.” 26Pamandɨ ʉFeeliki ahajendelelaga hunʼkwizye ʉPaulo hahinji huje, ayangaje nawo, pɨpo ahasʉbhɨlaga aje, ʉPaulo agamʼpeela ɨmpɨɨya.

27Lwa gaashila amaaha gabhɨɨlɨ, ʉPolikiiyo Feesito ahapyanila alongozye pa longozi wa Feeliki. Ɨshi ʉFeeliki ahanʼneha ʉPaulo mu hoobhe alɨngaane na‑aje, ahanzaga ahwikhondeezye hwa Bhayahuudi.

Pilihan Saat Ini:

ƗMbombo ɨzya Bhasontwa 24: SBK

Sorotan

Salin