RUTI 2
2
I Ruti meʼuʼo ri bonde i Boasi
2:1-23
1Ntongo reʼepa sambaʼa tau tondoka i Elimele langkai i Naʼomi anu matemo setu. Tau setu koreʼe pai tetubunaka. Toʼonya i Boasi. 2#Tad. 19:9-10, Paw. 24:19 Ri anu sandeme natoʼo i Ruti ri Naʼomi, “Ine ane ndiwai yaku darayaku njoʼu meʼuʼo ri bonde gandu, da maruru gandu boi reʼe anu manawu ungka ri pale ntau momota. Kuepe-epe ine da reʼe tau anu mapuru rayanya bareʼe da napetangani yaku meʼuʼo.”
Mesono i Naʼomi natoʼo, “Madago, anaku! Njoʼumo!”
3Njoʼumo kojo i Ruti ri bonde ntau, meʼuʼo malulu waka ntau momota. Bareʼe naincani bonde setu kono bonde i Boasi.
4Bareʼe masae, ratamo i Boasi ungka ri Beteleme, metabea siʼa ri waʼa ntau momota, natoʼo, “Mbolimo i Pue da sangkani-ngkani pai komi pura-pura.”
Mesono waʼa ntau momta, “Tuarapa i Pue mangadonco komi.”
5Nepa meoasi i Boasi ri mandoronya, natoʼo, “Isema weʼa sinjau?”
6Mesono mandoro setu, natoʼo, “Siʼamo weʼa to Moabi anu nepa rata sangkani-ngkani pai Naʼomi ungka ri tana Moabi. 7Siʼa ngena metompa ri yaku bara maya da meʼuʼo ri taliku ntau momota da maruru gandu anu naliu ntau momota. Ungka ri mowuro ngena motetala mpaliu siʼa, setu nepa meʼonto mpinca, njau meosa sarai ri kandepe.”
8-9Njoʼu i Boasi madadu i Ruti, natoʼoka siʼa, “Pedongeka da kupantoʼoka siko. Neʼemo malai siko meʼuʼo ri bonde ntau ntaninya. Ireʼimo peʼuʼomu sangkani-ngkani pai waʼa mbeʼa anu momota ri bondeku seʼi. Lulukamo ri mbeʼi kanjau mpomota ntau seʼe. Da nululu tau seʼe neʼe nutilawangi tau seʼe. Ane mangau ngangamu timamo ue ungka ri waʼa gumba anu roomo nabangani waʼa ntuama setu. Roomo kusongka tau seʼe da naka neʼe najaʼati ntau seʼe siko.”
10Padonge i Ruti pau setu, metutu mombukotu siʼa ri suara i Boasi natoʼo, “Tua, yaku bareʼe sintinaja da marata puru ndaya anu bangke ungka ri komi. Yaku seʼi podo tau mencua anu bareʼe sintempo da ndipokapuru!”
11Mesono i Boasi, natoʼo, “Puramo kudonge ewambeʼi kadago mpowiamu ri ine maniamu, ungka ri kapate langkaimu. Kuincani kasikonya mampalaikamo tau tuʼamu, tana mpebete ntanoanamu, pai maʼi maroo-roo ireʼi ri oyo ntau anu bareʼepa nuincani. 12Tuarapa i Pue da masili kadago mpowiamu. Tuarapa siko da marata nunjaa anu sintinaja da ndawaika siko i mPue, Pue Ala pue nto Isaraeli ua siko maʼimo meleru ri Sira!”
13Mesono i Ruti, natoʼo, “Tua, madago gaga rayami ri yaku, mau yaku bareʼe siwia pai waʼa ntau topotetalami. Kapande ndayami monco-monco kojo mampalindo rayaku.”
14Butu ratamo ri tempo mpangkoni, natoʼo i Boasi ri Ruti, “Maimo mangkoni seʼi ue inau.” Mangkonimo i Ruti sangkani-ngkani pai waʼa ntau momota. Nawai i Boasi ri Ruti gandu anu ndatunu, mangkonimo i Ruti rantani mabosu. Bareʼe pura nakoni, reʼepa yabinya napakoroka. 15-16Roo setu njoʼu woʼu i Ruti meʼuʼo. Pusa i Ruti njoʼu meʼuʼo, natoʼo i Boasi ri waʼa ntaunya anu momota, “Ane kono gandu anu roomo ndisepi-sepi, ndipapaliukamo. Neʼe ndipakaea bara ndipokarau siʼa. Mau ndiʼoa-oakamo manawu teasakodi gandu anu roo ndisoʼo-soʼo setu da naparuru.”
17Meʼuʼo mpaliu i Ruti rantani ngkinowia. Roo setu naʼii uʼonya setu, napasambaka gana sampuyu kilo kaneenya. 18Ungka lairia mewalili siʼa ri kota mangkeni uʼonya, natujuka ine manianya pandatanya sandeme setu. Nawaika woʼu inenya yabi mpangkoni anu bareʼe pura nakoni ngena ri bonde. 19Mompau i Naʼomi ri Ruti natoʼo, “Ri mbeʼi nuparata pura-pura seʼi? Ri bonde incema potetalamu sandeme? Tuarapa i Pue Ala da mangadonco tau anu mampokapuru siko seʼi!”
Napaumo i Ruti ri Naʼomi bonde anu kanjoʼunya meʼuʼo setu inceʼemo sambaka bonde ntuama anu mampotoʼo i Boasi.
20 #
Tad. 25:25
Natoʼo i Naʼomi, “Ode anaku, tau setu banya ntaninya kasangkompota anu masupa, kamonconya lawi siʼa anu da mantulungi katuwuta. Tuarapa i Pue madonco siʼa pai i Pue da mabangani janjia, ri waʼa ntau anu ntongo tuwupa, ewanceʼe seʼe ri waʼa ntau anu matemo.”
21Nepa napau woʼu i Ruti, natoʼo, “Ine, natoʼo woʼu ntau setu da naka yaku, meʼuʼo mpaliu sangkani-ngkani pai waʼa ntopotetalanya rantani roo momotanya.”
22Mesono i Naʼomi natoʼoka i Ruti, “Monco, anaku, lawi moruana siko meʼuʼo sangkani-ngkani pai waʼa ntopomota anu weʼa ri bonde i Boasi. Maka ane njoʼu ri bonde ntau ntaninya, siko da najaʼati ntau njairia!” 23Inceʼe painaka, njoʼu mpaliu i Ruti meʼuʼo sangkani-ngkani pai waʼa mbeʼa topptetala ri bonde i Boasi, siʼa meʼuʼo njairia rantani roo pomota – madago ri pomota anu kaʼisa rantani rata ri kaʼolu mpomota. Sindara setu i Ruti maroo-roo sangkani-ngkani pai ine manianya.
