मत्ती 6
6
गुप्त दान
1 “होशियार छान्नी, नाखुरीक भर्मीकोलाक टान्हाक्कीयो लागि धर्मकर्म माजाट्नी। नभा च नाखुरीकै स्वर्गाङ लेच नाखुरीकुङ बोइ लकीङ हीर इनाम माडुप्ले।
2 “इटबाटै नाखुरीकै सुकीर दान यान्हाङ तुरही माआर्म्हाट्नी, होङ्च च ढोंगीकै टी सभा ङुच इमकोवाङ र लामकोवाङ भर्मीको लकीङ प्रशंसा डुप्कीयो लागि जाट्ले। साँच्ची न, ङा नाखुरीककी डेले, होखुरीकै लहे डुप्की पर्च इनाम डुप्म भ्यामने। 3तर नाखुरीकै सुकीर दान यान्हाङ नाकुङ डोर मीहुटै ही जाट्न न ले होसे देब्रे मीहुटै थाहा माडीन्ख्यो। 4नाकै याछ दान गुप्ताङ छान्ख्यो, अनि गुप्ताङ यान्हाङ डाङ्च परमेश्वर बोये नाकोकी इनाम याल्हे।
प्रार्थना जाट्च बारेयाङ शिक्षा
(लूका ११:२-४)
5 “नाखुरीकै प्रार्थना जाट्नाङ ढोंगीकै लेखा माजाट्नी, हीजैडेनाङ होखुरीक यहूदीकुङ सभा ङुच इमकोवाङ र लामौ छेउ-छावाङ टोङ्हार भर्मीकै डाङ्ख्यो डेम प्रार्थना जाट्की जाक्ले। साँच्ची न, ङा नाखुरीककी डेले, होखुरीकै डुप्की पर्च लहो इनाम डुप्म भ्यामने। 6तर जब नाकुङ प्रार्थना जाट्च बेला छान्ने, तब लहो कोठा भित्री नुङ्नी र गालाम ठुनार गुप्ताङ लेच नाकुङ परमेश्वर बोइखाटा प्रार्थना जाट्नी, र नाकै गुप्ताङ ही-ही जाट्नने होसे डाङ्च नाकुङ परमेश्वर बोये नाकोकी इनाम याल्हे।
7 “र प्रार्थना जाट्नाङ अन्यजातिकै लेखा बीठाहा न माफालाक्नी। हीजैडेनाङ होखुरीकै चहिँ लो-लोट्च प्रार्थना जाट्नाङ मट्टै होखुरीकुङ प्रार्थना सेले डेच विचार जाट्ले। 8तर नाखुरीक होखुरीक ल्याक्च माछान्नी। हीजैडेनाङ नाखुरीकै ङेखी डेनाङ अघि लकीङ न नाखुरीककी कुसे-कुसे कुराकुङ खाँचो ले, होसे नाखुरीकुङ परमेश्वर बोये वार्ल्हे। 9तर नाखुरीक चहिँ इटजाट्न प्रार्थना जाट्नी:
‘ए स्वर्गाङ लेच कानुङ परमेश्वर बोइ,
नाको पवित्र परमेश्वर हो डेम भर्मीकै वार्ख्यो।
10 र नाकुङ राज्य राख्यो।
नाकुङ इच्छा स्वर्गाङ कुङ्च ले,
होङ्च न इसे पृथ्वीयाङ र पूरा छान्ख्यो।
11 कानकी दिन-दिनै चहडीस्च ज्याच कुरा छीनी यान्ही।
12 कानै जाट्च पापको क्षमा जाट्न यान्ही,
कुटजाट्न कानै र कानुङ विरुद्धाङ पाप जाट्चकोलाक क्षमा याम्हने।
13 कानकी परीक्षाङ पर्की माह्यानी,
तर कानकी शैतान लकीङ जोगडीनी।
[हीजैडेनाङ राज्य, शक्ति र महिमा सधैँभरियो लागि नाकुङ न हो, आमेन।] # ६:१३ इसे बाड्को कोष्ठ भित्री लेच शब्दको चहिँ कोइ कोइ संस्करनौ बाइबलाङ माले। ’
14 “इडीक नाखुरीकुङ विरुद्धाङ पाप जाट्चकोलाक नाखुरीकै क्षमा जाटा डेनाङ स्वर्गाङ लेच बोये र नाखुरीककी क्षमा जाट्ले। 15तर नाखुरीकै अरुकी क्षमा माह्या डेनाङ स्वर्गवाङ लेच बोये र नाखुरीकुङ पापको क्षमा माजाट्ले।
उपवासबारेयाङ शिक्षा
16 “जब नाखुरीक हीर माज्याम उपवास ङुले, तब ढोंगीको लेखा मीटाहा उदास खासार माङुनी। हीजैडेनाङ होखुरीक च भर्मीकोलाक उपवास ङुच टान्हाक्कीयो लागि लहो मीटाहा उदास खास्ले। साँच्ची न, ङा नाखुरीककी डेले, होखुरीकै लहे डुप्की पर्च इनाम डुप्म भ्यामने। 17तर नाको चहिँ उपवास ङुनाङ लहो मीटालुवाङ सीडी कानी, र मीटाहा मेस्नी। 18इडीक नाकै याङ्च जाटा डेनाङ नाकुङ उपवास भर्मीकै होइन, तर गुप्ताङ लेच नाकुङ परमेश्वर बोये डाङ्ले र नाकै गुप्ताङ ही-ही जाट्नने होसे डाङ्च नाकुङ परमेश्वर बोये नाकोकी इनाम याल्हे।
स्वर्गुङ सम्पत्ति
(लूका १२:३३-३४; १६:१३)
19 “लहो लागि पृथ्वीयाङ धन-सम्पत्ति जम्मा माजाट्नी। हीजैडेनाङ होला घुन-पुतली लग्डीस्ले, खियै ज्याले र खुसै इम भासार खुस्ले। 20तर लहो लागि स्वर्गवाङ धन-सम्पत्ति जम्मा जाट्नी। हीजैडेनाङ होला घुन-पुतली मालग्डीस्ले र खिया र मालग्डीस्ले, अनि खुसै र माखुस्ले। 21हीजैडेनाङ कुला नाकुङ धन ले, होला न नाकुङ मीमन र छान्ने।
22 “नाकुङ मीमीक चहिँ शरीरौ बत्ती हो। होटबाटै नाकुङ मीमीक सेम्ह # ६:२२ यहूदी चलन अनुसार चहिँ सेछ मीमीक डेच चहिँ याछ मीमन लेच र मास्च मीमीक डेच चहिँ लोभ जाट्च मीमन हो। ले डेनाङ, नाकुङ पट्ट न शरीर ट्याङ्छ छान्ने। 23तर इडीक नाकुङ मीमीक मासेछ ले डेनाङ, नाकुङ पूरै शरीर न छुम्छ छान्ने। होटजाट्न न नाकु भित्री लेच ट्याङ्छ चहिँ छुम्छ छाना डेनाङ, होसे छुम्छ झन् कुडीक साह्रो छुम्ल्हे औला!
24 “सुयेर नीस मालिकौ सेवा जाट्की माह्योक्ले। नभा च होचे काटकी जाक्ले र अर्कोकी माजाक्ले। कि त होचे काटौ चहिँ इमानदार छानार सेवा जाट्ले र अर्कोकी चहिँ हेला जाट्ले। होटबाटै नाखुरीकै र परमेश्वर र धन नीसौ न सेवा जाट्की माह्योक्ले।
सुर्ता माजाट्की
(लूका १२:२२-३१)
25 “होटबाटै ङा नाखुरीककी डेले, ‘ही जीङ, ही गइङ’ डेम जीवनौ लागि र ‘ही बील्हीङ’ डेम लहो शरीरौ लागि चिन्ता माजाट्नी। ही जीवन ज्याच कुरा डेनाङ र शरीराङ बील्छ बढीनको डेनाङ र बाड्को होइन र? 26सर्घाङ भुर्च ग्वाजाकोलाक ङोस्नी। होखुरीकै छोयो र माभेरेट्ले, अन्न र माचेले, अनि ढुकुटीयाङ र माठन्कडीले। तर नाखुरीकुङ स्वर्गाङ लेच बोये होखुरीककी कास्ले। होसे ग्वाजाको डेनाङ नाखुरीक धेरै मोलुङ माले र? 27नाखुरीक मध्याङ सुये सुर्ता जाटार लहो आयुवाङ काट घण्टा र ठप्डीकी ह्योक्ले र?
28 “हीजै बील्छ बढीनौ लागि नाखुरीक चिन्ता जाट्ले? जङ्गलुङ लिली सारकी ङोस्नी, होसे कुटजाट्न ल्होङ्ले। होखुरीकै न त काम जाट्ले, न त बढीन न जाल्हे। 29तर ङा नाखुरीककी डेले, सोलोमन राजा छान्नाङ र लहो पट्ट न धन-सम्पत्तियाङ होसे लिली सारको मध्याङ काट लिली सार टडीक र सिंगारीस्च मालेया। 30ए अल्पविश्वासीको, छीनी लेच र पीउह्राक म्हेयाङ लोछ घाँस र सारकी च परमेश्वरै इटजाट्न सिंगारीले डेनाङ, ही नाखुरीककी झन् वास्टै जाट्न होसकै बढीन बील्हाक्ङ माह्याले र?
31 “होटबाटै ही जीङ, ही गइङ, र ही बील्हीङ डेम चिन्ता माजाट्नी। 32हीजैडेनाङ अन्यजातिकै टी इसे पट्ट न ठोकको पाले ट, नाखुरीकुङ स्वर्गाङ लेच बोये चहिँ नाखुरीककी इसे पट्ट न ठोकौ खाँचो ले डेम वार्ल्हे। 33तर पहिला परमेश्वरौ राज्य र होसकुङ धार्मिकताकी पानी, अनि इसे पट्ट न ठोक नाखुरीकुङ लागि याल्हे। 34होटबाटै पीउह्राकौ लागि चिन्ता माजाट्नी, पीउह्राकौ दिनै न लहो चिन्ता जाट्ले। छीनीयुङ चिन्ता छीनीयुङ लागि न ओल्न्ह ले।”
Pilihan Saat Ini:
मत्ती 6: EMGP
Sorotan
Bagikan
Salin
Ingin menyimpan sorotan di semua perangkat Anda? Daftar atau masuk
© 2025 by Mother Tongue Translators Society and Wycliffe Bible Translators, Inc.
