मत्ती 4
4
उजाड ठावाङ येशूओ परीक्षा
(मर्कूस १:१२-१३; लूका ४:१-१३)
1होटै न्हुइङ शैतानै येशूओ परीक्षा लाख्यो डेम पवित्र आत्मै होसकोकी उजाड ठावाङ आल्हा। 2येशू चालीस याक र चालीस नाबीकसम्म उपवास ङुमभ्यारखीङ होसकोकी साप्फी मीटुक रन्छीया। 3तब होडीक बेला येशू लेठाङ शैतान राहार डेया, “इडीक नाको परमेश्वरौ मीजा हो डेनाङ इसे ल्हुङकोलाक रोटो छान्ख्यो डेम आज्ञा जाट्नी।” 4तर येशूये जवाफ याहा, “धर्मशास्त्राङ रीक्ङने, ‘भर्मी रोटोये मट्टै माजीवाले, तर परमेश्वरौ मेङ्गेरीङ ख्योछ हरेक वचन लकीङ जीवाले।’#व्यवस्था ८:३”
5शैतानै येशूकी पवित्र सहर यरूशलेमाङ आल्हार मन्दिरौ मीचुटाङ टोङ्हाका 6र डेया, “इडीक नाको साँच्ची न परमेश्वरौ मीजा हो डेनाङ इटै म्हाका फाल ङाप्नी, हीजैडेनाङ धर्मशास्त्राङ याङ्च रीक्ङने,
‘परमेश्वरै लहो स्वर्गदूतकुङ जिम्माङ नाकोकी याल्हे,
र होखुरीकै नाकोकी लहो मीहुट-मीहुटाङ न ढान्ले, होटबाटै नाकुङ मीखुट्या ल्हुङाङ माठोक्ले।’ #भजनसंग्रह ९१:११-१२”
7येशूये होसकी डेया, “धर्मशास्त्राङ याङ्च र रीक्ङने, ‘नीये परमप्रभु लहो परमेश्वरकी परीक्षा माजाट्की।’#व्यवस्था ६:१६ ”
8होटै न्हुइङ शैतानै येशूकी काट घाङ्च डाँडाङ आल्हार संसारुङ पट्ट न राज्य र होच्यो धन-सम्पत्ति टान्हाका, 9र होसकोकी डेया, “नाकै गुहार ङाकी झोरा डेनाङ, इसे पट्ट न ठोक ङा नाकोकी याल्हे।” 10तब येशूये डेया, “ए, शैतान, नाङ इटै नुङ्की क्योटो! हीजैडेनाङ धर्मशास्त्राङ रीक्ङने, ‘नीये परमप्रभु लहो परमेश्वरकी मट्टै झोर्की र होसकुङ मट्टै सेवा जाट्की।’#व्यवस्था ६:१३”
11तब शैतानै होसकोकी डासार ह्वा अनि स्वर्गदूतको राहार होसकुङ सेवा जाटा।
येशूये गालीलाङ प्रचार सुरु जाट्च
(मर्कूस १:१४-१५; लूका ४:१४-१५)
12बप्तिस्मा याछ यूहन्नाकी झ्यालखानाङ ठुना डेच कुरा सेयार येशू गालील पट्टी नुङा। 13तर होसको नासरत डासार कफर्नहुम सहराङ ङुकी नुङा, इसे सहर चहिँ गालील तालौ खेरेप जबूलून र नप्तालीको ङुच क्षेत्राङ पर्ले। 14इटजाट्न यशैया अगमवक्तै डेच वचन पूरा छाना,
15“यर्दन नदीपारी ताल पट्टी नुङ्च लामाङ लेच जबूलून र नप्ताली कुलुङ भर्मीको,
र गालीलाङ ङुच अन्यजाति भर्मीको।
16छुम्ठाङ ङुच भर्मीकै काट बाड्को ज्योति डाङ्नने।
मृत्युओ छाया म्होकी ङुचको मीटाक होसे बाड्को ज्योति चम्कडीस्नने।”#यशैया ९:१-२
17होडीक बेला लकीङ न प्रचार जाट्चै येशूये डेकी ठाला, “पश्चात्ताप जाट्नी, हीजैडेनाङ स्वर्गौ राज्य खेरेप टाह्रामने।”
येशूओ पहिलो चेलाको
(मर्कूस १:१६-२०; लूका ५:१-११)
18कायाक येशू गालील तालौ छेउ-छेउ ह्वामन लेनाङ होसकै नीस जना जाल ङाप्म ङुच डाङा। होखुरीक पत्रुस डेच सिमोन र मेन भाइ अन्द्रियास लेया। होखुरीक चहिँ डीस्या घोचको लेया। 19येशूये होखुरीककी डेया, “ङाकी डुट्नी र ङा नाखुरीककी भर्मीकोलाक घोच जालहारी खास्ले।” 20तब होडीक न बेला लहो जालको डासार होखुरीकै येशूकी डुटा।
21होटै होसको नुङ्चै जाट्नाङ जब्दियो नीस जना लेन्जा मीजाको याकूब र यूहन्नाकी लहो बोइखाटा डुङ्गाङ ङुवार लहो जाल रुप्म ङुच डाङा, र होसकै होखुरीककी र आर्घा। 22तब होडीक न बेला होखुरीकै लहो बोइ र डुङ्गाकी डासार येशूकी डुटा।
गालीलाङ येशूओ सेवाकाइ
(लूका ६:१७-१९)
23येशू होखुरीकुङ सभा ङुच इमकोवाङ पाहाक्चै, स्वर्गौ राज्यौ सेछ समाचार प्रचार जाट्चै, र भर्मीकोलाक लग्डीस्च खाल खालुङ रोग र शरीरौ कमजोरीको गेपाक्चै पट्ट न गालीलौ क्षेत्राङ छेह्रा। 24होटबाटै होसकै जाट्च सेछ कामौ बारेयाङ सिरियाभरि फैलडीसा। भर्मीकै खाल खालुङ रोग लग्डीस्च, भूतै सतडीचको, छारे रोग, पक्षाघात छान्चको पट्टकी येशू लेठाङ राकार होसकै होखुरीक पट्टकी गेपाका। 25वास्टै भर्मीकै होसकोकी डुटा, होसे भर्मीको चहिँ गालील, दश वटा सहरको लेच डेकापोलिस, यरूशलेम, यहूदिया र यर्दन नदीपारी लकीङ राम्हन्या।
Pilihan Saat Ini:
मत्ती 4: EMGP
Sorotan
Bagikan
Salin
Ingin menyimpan sorotan di semua perangkat Anda? Daftar atau masuk
© 2025 by Mother Tongue Translators Society and Wycliffe Bible Translators, Inc.
