मार्कुस 3

मछैंऐं दै हाथो मणछ किअ नरोगअ

(मोत्ती 12:9-14; लूका 6:6-11)

1तेखअ डेऊअ एकी होरी बारी भिई ईशू यहूदी सभागृहा। तिधी थिअ एक मणछ इहअ, तेऊओ हाथ त मछैंअ द। 2फरीसी पंथे लोग थिऐ ईशू लै दोशा लाणें तैणीं ताखुऐ दै कि तिंयां भाल़े कि ईशू बशैघे धैल़ी एऊ मणछा नरोगै करा कि नांईं ज़ुंण मोसा गूरे बधाने साबै करनअ गलत आसा थिअ।

3ईशू बोलअ तेऊ मछैंऐं दै हाथे मणछा लै, “इधी खल़्हू सोभी नदरी।” 4तेखअ पुछ़अ ईशू तिन्‍नां का, “बधाना दी किज़ै आसा लिखअ द? बशैघे धैल़ी भलअ करनअ ठीक आसा कि बूरअ करनअ? प्राण बच़ाऊंणै कि मारनअ?” पर तिंयां सोभ रहै च़ुप्पी।

5ईशू भाल़अ फेर संघा बोलअ तेऊ तिन्‍नें काठै मना का दुखी हई रोश्शा संघै तेऊ मणछा लै, “आपणअ हाथ कर आजू।” तेऊ बी किअ आपणअ हाथ आजू अर तेऊओ हाथ हुअ ताज़अ-नरोगअ।

6तेखअ लागै फरीसी तिधा का बागै डेऊई तेभी हेरोदेस राज़ेए पक्ष लणैं आल़ै लोगा संघै एक्‍कअ करी इहअ बोल्दै, “अह पाणअ त हाम्हां किहअ करै मारी।”

ईशू संघै डेऊऐ खास्सै मणछ

7कफरनहूम नगरी का डेऊअ ईशू आपणैं च़ेल्‍लै संघै गलील समुंदरा बाखा लै। 8गलील, यहूदा, इदूमिआ मुल्खै, एरुशलेम नगरी अर जरदण नदी पार अर सूर अर सैदा नगरी ओरी-पोरी का आऐ खास्सै मणछ ईशू पिछ़ू। तिन्‍नैं शूणअ कि ईशू करा बडै-बडै नुआहरै काम अर तेता भाल़ै आऐ तिंयां सोभ ईशू सेटा लै।

9ईशू बोलअ आपणैं च़ेल्‍लै का, “इधी हुअ लोगो खास्सअ झाल़अ एता लै करा तम्हैं मुल्है एक होछ़ी किश्ती तैर ताकि तेथ प्रैंदै बेशी हुंह इना लोगा संघै गल्‍ला करूं।”

10किल्हैकि ईशू किऐ तै तधू कई रोगी मणछ नरोगै अर ज़ेतरै बी रोगी थिऐ आऐ दै, तिंयां पल़ै ईशू छ़ुंहंदै एकी-दुजै प्रैंदी चुटी।

11भूता आल़ै मणछ बी ज़ांऊं ईशू भाल़ा तै, तिंयां बी पल़ा तै ईशू सेटा उटी बाखा अर लैल़ा-पकारा लाई करै बोला तै तिंयां इहअ, “तूह आसा परमेशरो पूत।” 12ईशू बोलअ तिन्‍नां भूता लै चतैनगी दैई इहअ, “मेरै बारै निं कोही का खोज़ी कि हुंह कुंण आसा।”

ईशूए बारा खास च़ेल्‍लै

(मोत्ती 10:1-4; लूका 6:12-16)

13तेखअ डेऊअ ईशू धारा प्रैंदा लै अर ज़ुंण तेऊ आप्पू संघै निंणै च़ाहै तिंयां शादै तेऊ आप्पू सेटा अर तिंयां डेऊऐ तेऊ संघै।

14तेखअ छ़ांटै ईशू बारा ज़ण्हैं संघा बोलअ तिन्‍नां लै तेऊ शधाणूं कि तिंयां तेऊ संघा-संघा रहे अर सह तिन्‍नां प्रच़ार करदै छ़ाडी सके, 15अर तिन्‍नां का इहअ हक बी होए कि तिंयां लोगा का भूत काढी सके। 16तिंयां बारा ज़ण्हैं आसा ईंयां:

शमौन ज़हा नाअं ईशू पतरास डाहअ,

17जबदीए शोहरू याकब अर तेऊओ भाऊ जोहन्‍ना ज़हा नाअं ईशू गुल़ूबिज़ल़ूओ शोहरू डाहअ त।

18आन्दरू, फलिप्प, बरतुलमी, मोत्ती, थोमा, हलफीओ शोहरू याकब, तेदैई शमौन कनानी,

19करेती गराऊंओ यहूदा ज़ुंणी ईशू ढाकणैं बी बझ़ैल़अ त।

ईशू अर भूतो राज़अ

(मोत्ती 12:22-32; लूका 11:14-23; 12:10)

20तेखअ आऐ ईशू अर तेऊए च़ेल्‍लै कफरनहूम नगरी एकी घअरै अर तिधी हुऐ एतरै खास्सै मणछ कठा कि तिन्‍नां निं रोटी खाणेंओ बगत बी भेटअ।

21ज़ांऊं ईशूए टबरै ईशूए बारै गल्‍ला शूणीं, तिंयां आऐ तेऊ घअरा लै निंदै। किल्हैकि कई लोगै बोलअ तिन्‍नां का, “सह आसा बेगरअ हुअ द।”

22एरुशलेम नगरी का थिऐ शास्त्री बी आऐ दै अर तिंयां बी बोला तै इहअ कि एऊ दी आसा, “राख्स” अर, “अह काढा भूते राज़ै राख्से शगती करै भूत।”

23ऐहा गल्‍ला लै शादै ईशू तिंयां आप्पू सेटा लै अर तिंयां समझ़ाऊऐ एही कथ्या खोज़ी करै, “राख्स किहअ करै सका भूत पोर्ही काढी! तिंयां ता तेऊए आपणैं आसा?

24 “ज़हा राज़ा दी फूट पल़ा, सह हआ खतम। 25ठीक इहअ ई ज़िधी टबरा जैंदरी फूट पल़ा, तेऊ घअरो हआ बनाश। 26इहअ करै ज़ै राख्स आपणअ ई बरोधी हई आप्पू ई मांझ़ै फूट पाए, तेऊओ राज़ किहअ करै सका बणी रही? तेऊओ राज़ हआ खतम।

27 “पर कोहै निं जोधै मणछे घअरै पेशी तेऊओ धन तेभै तैणीं लुटी सकदअ ज़ेभै तैणीं किई सह तेऊ जोधै बान्हीं नां लऐ। तेखअ सका सह तेऊओ धन लुटी।

28 “हुंह खोज़ा तम्हां का सत्त कि मणछे सोभ पाप अर निंदा हणैं माफ, 29पर ज़ुंण बी पबित्र आत्में खलाफ निंदा करे सह पाप निं कधि माफ हणअ। अह दोश रहणअ तेऊ लै सदा।” 30तिंयां बोला तै इहअ, “एऊ दी आसा भूत शाचअ द।” तैही बोली ईशू ईंयां गल्‍ला।

ईशूए ईज अर भाई

(मोत्ती 12:46-50; लूका 8:19-21)

31तेखअ आऐ ईशूए ईज अर भाऊ तेऊ भाल़ै। तिंयां खल़्हुऐ घअरा बागै अर तिन्‍नैं दैनअ ईशू लै समाद कि बागै एछी कर हाम्हां संघै गल्‍ला।

32ईशू फेर तै खास्सै मणछ कठा हुऐ दै, तिन्‍नां मांझ़ै बोलअ एकी ईशू लै, “भाल़, तेरी ईज, तेरै भाऊ अर बैहण आसा बागै ताह न्हैल़ै लागै दै, तिंयां च़ाहा ताह संघै गल्‍ला करनी।”

33ईशू दैनअ तिन्‍नां लै ज़बाब, “मेरी ईज अर मेरै भाई अर बैहण कुंण आसा?” 34तेखअ भाल़अ ईशू आप्पू फेर अर ज़ुंण तिधी थिऐ, तेऊ बोलअ तिन्‍नां लै, “भाल़ा, मेरी ईज अर मेरै भाई अर बैहण आसा ईंयां। 35मेरी ईज, मेरै भाई बैहणी आसा तिंयां ज़ुंण ज़िहअ परमेशर बोला तेही ई ज़िन्दगी ज़िऊआ।”

Pilihan Saat Ini:

मार्कुस 3: OSJ

Sorotan

Salin

Bandingkan