मत्ती 24
24
मांदरे बरैबाद हणें बारै गल्ला प्रगट करनी
(मरकुस 13:1,2; लुका 21:5,6)
1ज़ांऊं ईशू मांदरा का निखल़ी करै हांढदअ लागअ, ता च़ेल्लै लागै ईशू सेटा मांदरे शोभा रहैऊंदै। 2ईशू बोलअ तिन्नां लै, “तम्हैं कै इना सोभी गल्ला भाल़दै निं आथी? हुंह खोज़ा तम्हां का सत्त कि इधी ज़ै पात्थर प्रैंदै पात्थर बी होए टेक्कअ द सह बी पाणअ तिन्नां ढोल़ी।”
दुख-सांगट
(मरकुस 13:3-13; लुका 21:7-19)
3ज़ांऊं ईशू जैतून धारा दी त बेठअ द, ता च़ेल्लै बोलअ कांगनरांगै ईशू सेटा एछी करै, “हाम्हां का खोज़ कि ईंयां गल्ला केभै हणीं? तेरै एछणेंओ और एऊ संसारा खतम हणैंओ कै नछ़ैण हणअ?”
4ईशू बोलअ तिन्नां लै, “भाल़ै तम्हैं रहै चतैन कि कोई हेरे तम्हां धोखै दी नां पाए। 5कई लोगा एछणअ तम्हां सेटा लै मेरै नांओंऐं और तिन्नां बोल़णअ इहअ कि हुंह आसा परमेशरै छ़ाडै दै मसीहा। तिन्नां पाणै इहअ करै मेरै कई लोग कबाता।
6 “ज़ेभै तम्हां का देशै जुध हणें और जुधे गल्ला शुणें, ता तम्हैं निं डरी। किल्हैकि ईंयां गल्ला हणीं आसा ज़रूरी, पर तेसा बेला बी निं अंत हणअ। 7किल्हैकि एकी ज़ाती करनअ दुजी ज़ाती संघै जुध और एकी राईसी करनअ दुजी राईसी संघै जुध। देशै हणीं कई ज़ैगा ज़ाज़री और कई ज़ैगा पल़णै नकाल़। 8अह हणीं दुखे शुरूआत ज़ेही एकी बेटल़ी सूंणें दाह उझ़िआ। 9ज़ुंण थारअ बरोध करा तिन्नां ढाकणैं तम्हैं दाह-दुख दैणा लै और तम्हैं पाणै तिन्नां मारी और मुंह दी विश्वास करनै पिछ़ू हणीं सोभी ज़ातीए लोग थारै दुशमण। 10तेभै छ़ाडणअ तम्हां मांझ़ै कई लोगा मुंह दी विश्वास करनअ। 11बडै भारी झ़ुठै गूर निखल़णैं और तिन्नां पाणै कई लोग कबाता। 12ज़ांऊं पाप बढणअ ता कई लोगा परमेशरे गल्ला मनणी और कई लोगे निं एकी दुजै संघै निं झ़ूरी रहणीं। 13पर ज़ुंण मुंह दी खिरी तैणीं विश्वास डाही सबर करे, तेऊओ हणअ उद्धार। 14स्वर्ग राज़ो खुशीए समादो प्रच़ार खोज़णअ सारै संसारै सोभी ज़ाती का ताकि सोभी देशे लोगा लै खुशीए समादा मनणैंओ मोक्कअ होए, तेखअ हणअ अह संसार खतम।
माहा सांगटे शुरूआत
(मरकुस 13:14-23; लुका 21:20-24)
15 “एकी धैल़ै भाल़णीं तम्हां सह बरैबाद करनै आल़ी छ़ोतली च़ीज़ मांदरै पबित्र ज़ैगा दी खल़ी, ज़ेते बारै खास्सी साला पैहलै परमेशरो गूर दानिएल बी बोला त। (पहल़णैं आल़अ दै एसा गल्ला लै धैन)। 16तेभै ज़ुंण यहूदा लाक्कै दी होए तिंयां ठुर्है धारा लै। 17ज़ुंण छ़ाप्परै होए, तिंयां निं घरा भितरा का किछ़ी गल्ला निंणे तैणीं उंधै होथी और नां घरा भितरा लै डेऊई करै बगत बरैबाद करी। 18ज़ुंण खेचै होए, तिंयां निं आपणैं झिकल़ै आणदै पिछ़ू डेऊई।
19 “तिन्नां धैल़ी ज़ुंण सुंदी बेटल़ी और आपणैं शोहरू लै दुधा पणैंऊंदी होए तैहा लै हणअ ठुहर्नअ बडअ कठण! 20प्राथणां करदै रहै लागी कि तम्हां हिंऊंदे धैल़ै और बशैघे धैल़ै ठुहर्नअ नां पल़े। 21किल्हैकि तैहा घल़ी एछणअ इहअ दुख-सांगट कि ज़ुंण एऊ संसारे शुरू का आझ़ तैणीं कधि निं हुअ और नां कधि हणअ। 22परमेशरै आसा आपणैं विश्वास करने आल़े बारै सोठी करै ईंयां सांगटे धैल़ी घटाऊई दी, नांईं ता संसारै निं कोहै मणछ बच़णअ त। 23ज़ै कुंण तिन्नां धैल़ी तम्हां लै इहअ बोले, भाल़ा मसीहा आसा इधी, और मसीहा आसा तिधी, ता तिन्नां दी निं विश्वास करी।
24 “किल्हैकि झ़ुठै मसीहा और झ़ुठै गूर निखल़णैं और तिन्नां पाणै ज़ादू करी करै बडै-बडै नछ़ैण और च़मत्कार रहैऊई कबाता। ज़ै तिन्नों बश च़ले ता तिन्नां पाणै परमेशरे छ़ांटै दै लोग बी कबाता। 25हेरे, एसा गल्लो डाहै धैन मंऐं हेरी ईंयां गल्ला तम्हां का पैहलै ई खोज़ी। 26तैहीता ज़ै तिंयां तम्हां का बोले कि भाल़ा, सह आसा बणैं, ता तम्हैं निं बागै निखल़ी। ज़ै कुंण इहअ बोले कि सह आसा इधी लुक्कअ द, तम्हैं निं भरोस्सअ करी।
27 “किल्हैकि ज़ेही बिज़ल़ी पुर्बा का निखल़ी करै पछ़मा दी च़मकदी सोभी का शुझिआ तिहअ भाल़णअ हुंह मणछो शोहरू सोभी स्वर्गा का पृथूई लै फिरी एछदअ बी। 28ज़िधी ल्हासा होए तिधी हणीं गरली बी।
मुंह मणछे शोहरूओ फिरी एछणअ
(मरकुस 13:24-27; लुका 21:25-28)
29 “तिन्नां धैल़ीए दुख-सांगटा का बाद फिरनअ सुरज़ न्हैरअ और ज़ोथ हणीं काल़ी; और सरगा का अल़णैं तारै और सरगे सारी शगती बी सिकणीं आजू-पिछ़ू। 30तेभै शुझणअ तम्हां का मेरअ नछ़ैण सरगा दी। तेभै हणैं पृथूईए सोभ खांनदान-ज़ातीए लोग हिक्का पटाकदै। हुंह मणछो शोहरू भाल़णअ तिन्नां बडी शगती दी और बडै शगती और प्रतपा संघै सरगै बादल़ा बाती एछदअ। 31मुंह छ़ाडणैं नरशिंगेए एकी बडै बोला संघै आपणैं स्वर्ग दूत और तिन्नां सरगे एकी कूणैं का दुजै कूणैं तैणीं करनै च़ऊ दिशा का आपणैं छ़ांटै दै कठा।
फेडूए बूटे कथ्या
(मरकुस 13:28-31; लुका 21:29-33)
32 “फेडूए बूटा का लआ सीख; ज़ेभै तेते शाण्हटी नरम हआ, ज़ांऊं तेथ प्लीर एछा, ता तेभै हेरा तम्हैं ज़ाणीं कि बसंते ऋत आसा नेल़। 33ठीक इहअ ई ज़ांऊं तम्हां ईंयां गल्ला हंदी हेरनी, ता तम्हैं समझ़ै कि तिंयां धैल़ै आसा नेल़ मतलब तिंयां गई डेहल़ा बागै पुजी। 34हुंह खोज़ा तम्हां का सत्त कि ज़ेभै तैणीं ईंयां गल्ला हई निं मुक्के, तेभै तैणीं निं एसा पोस्तीए लोग मरनै आथी। 35सरग और पृथूई टल़णीं पर मंऐं ज़ुंण गल्ला बोली ईंयां हणीं सोभ पूरी।
बिऊंतै रहै
(मरकुस 13:32-37; लुका 17:26-30,34-36)
36 “एसा गल्लो निं कोही का थोघ आथी कि ईंयां केभै हणीं। नां एतो थोघ स्वर्ग दूता का आथी और नां शोहरू का। पर एसा गल्लो थोघ आसा सिधअ बाप्पू परमेशरा का।
37 “ज़िहअ म्हारै पित्तर नूहे ज़मानैं हुअ, तिहअ ई हणअ मुंह मणछे शोहरूओ फिरी एछणअ बी। 38किल्हैकि ज़िहै पाणीं करै हुई दी प्रल़या का पैहलै ज़ेभै तैणीं नूह ज़हाज़ा दी नांईं बेठअ, तेभै तैणीं रहै लोग खांदै-पिंदै और तिन्नां मांझ़ै रहा ती बैह शादी हंदी। 39ज़ांऊं तैणीं तिंयां पाणीं करै प्रल़या दी डुबी करै मूंऐं निं आथी, तेभै तैणीं निं तिन्नां का किछ़ बी थोघ लागअ। ठीक तिहअ ई हणअ तेभै बी ज़ेभै हुंह मणछो शोहरू एछणअ। 40तैहा घल़ी दूई ज़ण्हैं हणैं खेचै, तिन्नां मांझ़ै एक च़कणअ उझै और एक छ़ाडणअ तिधी। 41दूई बेटल़ी हणीं संघा लागी दी शिला दी पिशदी, एक च़कणीं उझै और दुजी छ़ाडणीं तिधी।
42 “तम्हैं रहै बिऊंतै, किल्हैकि तम्हां का निं इहअ थोघ आथी कि थारअ प्रभू कसा धैल़ी एछणअ। 43पर इहअ लआ समझ़ी की ज़ै घरे मालका का इहअ थोघ हंदअ कि च़ोर केऊ पहरै एछणअ, तै रहणअ त तेऊ बिऊंतै और आपणैं घरै निं दैणीं ती तेऊ च़ोरी हणैं। 44ठीक इहअ ई तम्हैं बी रहा हर बगत तैर। किल्हैकि ज़हा घल़ी तम्हैं सोठी बी निं सकदै, तेसा ई घल़ी एछणअ हुंह मणछो शोहरू बी।
विश्वासा करने जोगी टैहलू और कदुष्ट टैहलू
(लुका 12:41-48)
45 “इहअ भरोस्सै करनै जोगी और समझ़कार मणछ कुंण आसा ज़सरै मालकै सह होरी टैहलू लै कामां ढेऊंदअ और कामां कराऊंदअ शैहण बणांअ, ताकि तिन्नां लै रोटी पाणीं करे दैई? 46मालक हआ तेऊ टैहलू करै खुश ज़हा तेऊओ मालक इहअ ई करदै भाल़े। 47हुंह खोज़ा तम्हां का सत्त कि तेऊ बणांणअ सह आपणीं सारी ज़ैदातो भढारी।
48 “पर ज़ै सह कदुष्ट टैहलू इहअ सोठे कि मेरै मालका एछणा लै आसा अज़ी देर। 49संघा लागे सह होरी टैहलू च़िकदअ मारदअ और आप्पू शूर-शराबा झुटदअ, 50ता तेऊ टैहलूओ मालक एछणअ तेसा धैल़ी फिरी, ज़ेभै सह न्हैल़अ बी निं होए लागअ द। ज़ेभै तेऊओ मालक एछणअ तेऊ का निं थोघ बी लागणअ। 51तेऊ लै भेटणीं एही घोर सज़ा ज़ेही कपटी मणछा भेटा और तिधी हणैं लोग सिधै लेरा लांदै और दाहे झोशा दी तिन्नां लै सिधअ दांदा पिशणैंओ काम।”
Pilihan Saat Ini:
मत्ती 24: OSJNT
Sorotan
Bagikan
Bandingkan
Salin
Ingin menyimpan sorotan di semua perangkat Anda? Daftar atau masuk
This work is licensed under Creative Commons Attribution-ShareAlike 4.0 License.
