मोत्ती 12
12
बशैघे धैल़ीओ मालक
(मार्कुस 2:23-28; लूका 6:1-5)
1थोल़ै धैल़ै बाद डेऊअ ईशू किधा लै नाज़े खेचा बाती, सह ती यहूदीए बशैघे धैल़ी। तेऊए च़ेल्लै ती भुखै आई दी। तिंयां लागै कणके सील चोल़ी अर हाथै मरोक्की करै खांदै। 2तिन्नां च़ेल्लै इहअ करदै भाल़ी बोलअ फरीसी मणछै ईशू लै, “भाल़, तेरै च़ेल्लै आसा बशैघे धैल़ी इहै कामां करदै लागै दै ज़ुंण बधाने साबै ऐहा धैल़ी करनअ ठीक निं आथी।”
3ईशू दैनअ तिन्नां लै ज़बाब, “तम्हैं कै कधू इहअ निं पहल़अ कि ज़धू दाबेद राज़ै ज़रुरत पल़ी अर ज़ांऊं सह अर तेऊए साथी भुखै थिऐ, तेभै तेऊ किज़ै किअ? 4सह किल्है डेऊअ परमेशरे भबना भितरी? अर तेऊ किल्है खाअ परमेशरे बेदी दी छ़ाडअ द भोज़न? अर आपणैं साथी लै बी दैनअ! ज़ेता बधाने साबै प्रोहता का सुआई होर कोह निं खाई सकदअ त?
5 “इहअ बी हणअ तम्हां का थोघ कि प्रोहत करा हर बशैघे धैल़ी परमेशरे भबनै काम, इहअ करै चोल़ा तिंयां बशैघे धैल़ीओ बधान, पर तज़ी बी आसा तिंयां बधाने साबै नर्दोश।#12:5 गण. 28:9-10; जोह. 7:22-23 6पर हुंह खोज़ा तम्हां का सत्त कि इधी आसा सह, ज़हा का परमेशरे भबना का बी ज़ादअ हक आसा!
7 “ज़ै तम्हैं पबित्र शास्त्रे ऐहा गल्ला समझ़दै, ‘हुंह निं थारै डागै-चैणैंओ अर बल़ीदान च़ाहंदअ, हुंह च़ाहा इहअ कि तम्हैं झींण करे।’ तै निं तम्हैं मेरै इना नर्दोश च़ेल्लै दोश लाणअ त।#12:7 होश. 6:6 8हुंह मणछो पूत आसा बशैघे धैल़ीओ बी मालक।”#12:8 मार्क. 2:28
मछैंऐं दै हाथो मणछ किअ नरोगअ
(मार्कुस 3:1-6; लूका 6:6-11)
9ज़ांऊं ईशू तिधा का डेऊअ, तेखअ पुजअ सह यहूदी सभागृहा। 10तिधी थिअ एक मणछ इहअ, तेऊओ हाथ त मछैंअ द। फरीसी मांझ़ै पुछ़अ कुंणी ईशू का सुआल, “बशैघे धैल़ी कै अह मणछ नरोगअ करना भलअ आसा?” तिंयां तै एही ताका कि ईशूए किज़ै गलती भेटे अर तेऊ लै दोश लाई सके कि सह आसा बधाने साबै गलत करदअ लागअ द।
11तेखअ पुछ़अ ईशू तिन्नां का, “तम्हां मांझ़ै इहअ कुंण आसा कि ज़हा का एक्कै भेड़ होए अर बशैघे धैल़ी पल़े सह भेड़ डुघी खाल़्ही दी अर सह तैहा भेडा बशैघे धैल़ी उझै नांईं काढे? 12इहअ ता हणअ तम्हां का थोघ कि मणछो मोल आसा भेडा का खास्सअ! इहअ करै आसा बशैघे धैल़ी रोगी मणछ नरोगअ करनअ बधाने साबै भलअ।”
13तेखअ बोलअ ईशू तेऊ मणछा लै, “आपणअ हाथ कर आजू।” तेऊ किअ आपणअ हाथ ईशू सेटा आजू अर सह हाथ हुअ दुजै हाथा ज़िहअ ताज़अ-नरोगअ। 14तेखअ किअ फरीसी पंथे तिन्नैं मणछै तिधा बागै डेऊई इहअ एक्कअ कि हाम्हां पाणअ त अह किहअ करै मारी।
परमेशरो छ़ांटअ द दास
15ईशू हेरी अह गल्ल भुझ़ी संघा लागअ तिधा का हांढदअ। खास्सै मणछ लागै तेऊ पिछ़ू हांढदै। ईशू किऐ तिंयां सोभ दाह-खिज़ा का नरोगै। 16ईशू बोलअ तिन्नां भूता लै चतैनगी दैई इहअ, “मेरै बारै निं कोही का खोज़ी कि हुंह कुंण आसा, 17ताकि ज़ुंण बैण ईशायाह गूरा बाती परमेशरै बोलअ त, सह पूरअ होए,
18‘भाल़ा, अह आसा मेरअ दास ज़ुंण मंऐं छ़ांटअ द आसा,
अह आसा सह ज़हा लै हुंह झ़ूरा अर ज़हा करै हुंह खुश आसा।
मुंह पाणीं आपणीं आत्मां एऊ दी
अर तेऊ दैणअ होरी ज़ातीए सोभी लोगा लै नसाफ हणैंओ समाद।
19तेऊ नां झांशा काढणीं, अर नां लोगा संघै हठल़दै लागणअ,
अर नां तेऊ च़फै का ज़ोरै-ज़ोरै बोल्दअ शुण्हनअ।
20तेऊ करनी जैंटी दी नगाल़ै ज़िहै दुबल़ै मणछा लै झींण।
तेऊ निं हिठदी धूँआं दैंदी बाती ज़िहै खरी दी पल़ै दै मणछा मरनै दैंदअ,
तेऊ बणाणैं नसाफ करी तिंयां नर्दोश
21अर होरी ज़ातीए सोभी लोगा डाहणीं
तेऊ दी आशा।’”
ईशू अर भूतो राज़अ
(मार्कुस 3:20-30; लूका 11:14-23)
22तेखअ आणअ तिधी लोगै एक मणछ, सह थिअ कांणअ बी अर काल्लअ बी। तेऊ दी त भूत शाचअ द। ईशू किअ सह नरोगअ अर सह लागअ तेभी भाल़अ अर गल्ला करदअ। 23एता लै हुऐ सोभ लोग रहैन अर तिंयां लागै बोल्दै, “अह कै राज़ै दाबेदे लुआद आसा?”
24पर फरीसी पंथे लोगै बोलअ ऐहा गल्ला शूणीं ईशू लै इहअ, “अह काढा भूते राज़ै राख्से शगती करै भूत।”
25ईशू बोलअ तिन्नें मन्नें गल्ल भुझ़ी करै तिन्नां लै, “ज़हा राज़ा दी फूट पल़ा, सह हआ खतम, अर ज़हा नगरी अर टबरा जैंदरी फूट पल़ा, तिन्नों हआ बनाश। 26इहअ करै ज़ै राख्स ई राख्सा काढे, तै हणअ सह इहअ करै आपणअ ई दुशमण। तेखअ तेऊओ राज़ किहअ करै रहणअ बणी?
27 “ज़ै अह तम्हैं मुल्है इहअ बोला कि हुंह काढा राख्सा करै इना भूता दूर। तै हुई अह गल्ल बी शुची कि थारै च़ेल्लै बी काढा भूत राख्से शगती करै! मुखा बी आसा इहअ थोघ कि अह गल्ल आसा गलत! ऐहा गल्लो नसाफ हेरअ तिन्नैं करी कि तम्हैं बोला झ़ुठी गल्ला।
28 “पर ज़ै हुंह परमेशरे आत्मां करै भूत काढा, तै गअ परमेशरो राज़ तम्हां सेटा पुजी। 29कोहै मणछ निं दैंत्तर जोधै मणछे घअरै पेशी करै तेऊओ धन तेभै तैणीं लुटी सकदअ, ज़ेभै तैणीं किई सह तेऊ जोधै मणछा बान्हीं नां लऐ, अर तेखअ सका सह तेऊओ धन लुटी।
30 “ज़ुंण मुंह संघै नांईं आथी, सह आसा मेरै खलाफ। ज़ुंण मुंह संघै परमेशरे राज़ा लै मणछा नांईं झाल़दअ सह डाहा तिन्नां छिंगी।
31 “तैही खोज़ा हुंह तम्हां का सत्त, ‘मणछो सोभी रंगो पाप अर निंदा हणैं माफ, पर पबित्र आत्में निंदा करनी निं माफ हणीं।’ 32ज़ुंण बी मुंह मणछे पूते खलाफ कोई गल्ला करे, तेऊओ पाप सका माफ हई, पर ज़ुंण बी पबित्र आत्में खलाफ किज़ै बोले, तेऊओ ज़ुल्म एऊ संसारै ता कै च़ाल्लअ माफ हई पर आजू एछणैं आल़ै संसारै बी निं सह माफ हणअ।
बूट अर तेतो फल़
(लूका 6:43-45)
33 “ज़ै बूट राम्बल़अ होए, तै हणैं तेते फल़ बी राम्बल़ै। ज़ै होए बूट निक्कअ तै हणैं तेते फल़ बी निक्कै। किल्हैकि बूट बछ़ैणियां तेते फल़ा करै।
34 “तम्हैं आसा झ़रीली दानुईंए शोहरू ज़िहै! तम्हैं निं भली गल्ला करी ई सकदै किल्हैकि तम्हैं आसा बूरै, ज़ुंण तम्हैं बोला, तेता करै जाआ थोघ लागी कि थारै मन्नैं किज़ै आसा। 35भलअ मणछ काढा आपणैं मन्नें भलै भढारा का भली गल्ला अर बूरअ मणछ काढा आपणैं मन्नें बूरै भढारा का बूरी गल्ला।
36 “हुंह खोज़ा तम्हां का सत्त कि मणछा ज़ुंण बृथा गल्ला बोल़णीं, तेभै भेटणीं तिन्नां तेते साबै सज़ा ज़ेभै परमेशरा नसाफ करनअ कि तम्हैं खाखा का किज़ै-किज़ै बोलअ। 37किल्हैकि तूह हणअ आपणीं गल्ला करै ई शुचअ अर आपणीं ई गल्ला करै हणअ तूह झ़ुठअ।”
स्वर्गे नछ़ैण रहैऊंणे मांग
(मार्कुस 8:11-12; लूका 11:29-32)
38ऐहा गल्ला लै बोलअ कई शास्त्री अर फरीसी ईशू लै, “हे गूरू, हाम्हैं च़ाहा ताखा सरगै एक नछ़ैण भाल़णअ ताकि हाम्हां इहअ भरोस्सअ होए कि तूह आसा परमेशरै हाम्हां सेटा लै छ़ाडअ द।”
39ईशू दैनअ तिन्नां लै ज़बाब, “एऊ जुगे कदुष्ट अर विश्वास घाती मणछ लोल़ा नछ़ैण। पर जोना गूरे नछ़ैणां छ़ाडी निं तिन्नां लै होर किछ़ै भेटणअ आथी। 40ज़िहअ परमेशरो गूर जोना रहअ चिई राची अर चिई धैल़ी पाणीं जैंदरी म्हाछ़े पेटा भितरी, तिहअ ई रहणअ हुंह मणछो पूत बी चिई राची धैल़ी पृथूई भितरी।
41 “निनबे नगरीए लोगा बी लाणअ नसाफ हणें धैल़ी एऊ ज़मानें लोगा लै दोश। किल्हैकि जोना गूरे प्रच़ारा शूणीं किअ तिन्नैं आपणैं पापा लै प्राश्त, पर तम्हां निं अज़ी बी सुंबल़ी सोर आथी! हेरा, इधी आसा परमेशरे गूर जोना का बी बडअ।
42 “दखण देशे राणीं बी लाणअ नसाफ हणें धैल़ी एऊ ज़मानें लोगा संघै उझ़ुई करै तिन्नां लै दोश कि सह आई सुलैमाने ज्ञैना शुणदी पृथूईए दुजै बाढा का पर तम्हां निं अज़ी बी सुंबल़ी सोर आथी! हेरा, इधी आसा सुलैमाना का बी बडअ।
एऊ जुगे मणछे दशा
(लूका 11:24-26)
43 “ज़ांऊं भूत मणछा का बागै निखल़ा, सह लोल़ा शुक्की ज़ैगा आप्पू लै रामा करना लै अर ज़ांऊं तेऊ नांईं भेटा ता। 44तेखअ बोला सह आप्पू लै इहअ, ‘मुंह डेऊणअ तेऊ ई मणछा दी बस्सणा लै बापस ज़िधा का हुंह पैहलै आसा निखल़अ द।’ बापस फिरी करै भाल़ा सह तेऊ मणछा शुन्नैं, धोअ-शोअ अर सज़ाऊऐ दै घअरा ज़िहै। 45तेखअ आणा सह भूत आप्पू का बी बूरै सात होर भूत आप्पू संघै शादी अर तिंयां बस्सा सोभ तेऊ दी। तेऊ मणछे हआ तेखअ पैहलै का बी खास्सी बूरी दशा। एऊ जुगे कदुष्ट मणछे दशा बी हणीं एही।”
ईशूए ईज अर भाई
(मार्कुस 3:31-35; लूका 8:19-21)
46ज़ांऊं ईशू झाल़ै जैंदरी इना गल्ला करदअ लागअ द त, तेऊए ईज अर कान्हैं भाई तै बागै खल़्हुऐ दै, अर तिंयां च़ाहा तै तेऊ संघै गल्ला करनी। 47एकी बोलअ ईशू सेटा एछी इहअ, “भाल़, तेरी ईज अर तेरै भाई आसा बागै खल़्हुऐ दै, अर ताह संघै च़ाहा तिंयां गल्ला करनी।”
48इहअ शूणीं ईशू दैनअ तेऊ लै ज़बाब, “मेरी ईज कुंण आसा? कुंण आसा मेरअ भाई? 49मेरअ भाई-बैहण कुंण आसा? तेखअ ईशू आपणैं च़ेल्लै बाखा हाथ करी बोलअ, ‘ईंयां आसा मेरी ईज अर भाई-बैहण।’ 50किल्हैकि ज़ुंण मेरै स्वर्गै रहणैं आल़ै बाब परमेशरो बैण शूणां अर मना तिंयां ई आसा मेरै भाई-बैहणी अर मेरी ईज।”
Pilihan Saat Ini:
मोत्ती 12: OSJ
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
This work is licensed under Creative Commons Attribution-ShareAlike 4.0 License.
