लूका 2
2
ईशूओ ज़ल्म
(मोत्ती 1:18-25)
1तिन्नां धैल़ै दैनअ रोम राज़ा दी अगस्तुस माहा राज़ै इहअ हुकम कि ज़ेतरै देशै रोम राज़ैओ राज़ आसा, तिन्नां सारै देशे लोगे नाअं करा दर्ज़ ज़ेथ। 2अह ती संसारै पैहली नाअं लखाई ज़ुंण तेऊ ज़मानैं हुई, ज़धू कुरेनिऊस सिरीया मुल्खो राज़पाल त। 3सोभ लोग डेऊऐ नाओंआं दर्ज़ करदै आपणीं-आपणीं नगरी लै ज़ुंण तिन्नें मूल़ ज़ैगा आसा। 4एता लै डेऊअ युसुफ बी किल्हैकि सह बी थिअ राज़ै दाबेदे खिंबा का। सह डेऊअ गलील मुल्खे नासरत नगरी का यहूदा मुल्खै बेतलेम राज़ै दाबेदे नगरी लै। 5युसुफ बी डेऊअ मरिअमा संघै आपणीं हणैं आल़ी लाल़ी मरिअम ज़ुंण सुंदी ती, ज़हा संघै तेऊ बरनीं ती लाई दी ताकि सह नाअं दर्ज़ करी सके।
6तेखअ तिन्नें बेतलेम नगरी रहंदी हुऐ मरिअमे सूंणें धैल़ै पूरै। 7तैहा दैनअ आपणैं ज़ेठै शोहरू लै ज़ल्म अर तैहा पल़ेटअ सह झिकल़ै दी अर तेखअ डाहअ सह च़राठी भितरी। किल्हैकि तिन्नां निं सराईं भितरी रहणा लै ज़ैगा भेटी ती।
स्वर्ग दूतो फुआला लै समाद
8तेऊ देशै तै कई फुआल अर तिंयां हआ तै राची आपणीं भेडा बाकरीए छ़ुंडा पहरी दहल़ै सुत्तै दै। 9प्रभूओ स्वर्ग दूत आअ तिधी अर सह खल़्हुअ तिन्नां सेटा अर प्रभूओ झ़ामण च़मकअ तिन्नां फेर अर तिन्नां फिरअ खास्सअ हैल़अ। 10तेखअ स्वर्ग दूतै तिन्नां लै बोलअ, “डरा निं आथी, भाल़ा, तम्हां का लाअ मंऐं खुशीओ समाद खोज़ी। अह खुशीओ समाद हणअ सारै संसारे मणछा लै खुशी दैणैं आल़अ। 11आझ़ आसा हुअ राज़ै दाबेदे नगरी बेतलेम तम्हां लै उद्धार दैणैं आल़ैओ ज़ल्म, अर अह ई आसा मसीहा पबित्र प्रभू। 12तेऊए बछ़ैण आसा एही कि सह भेटणअ तम्हां धणा लै घाहा खैऊंणेए च़राठी भितरी झिकल़ै दी पल़ेटअ द।”
13तैहा ई घल़ी हेरा-हेरी शुझुअ तिधी तिन्नां खास्सै स्वर्ग दूतो एक छुंड परमेशरे ज़ै-ज़ैकारा करदी इहअ बोल्दअ,
14“स्वर्गै हुअ परमेशरो प्रतप्प
पृथूई दी ज़हा मणछा लै परमेशर खुश आसा, तिन्नां शांती होए।”
15ज़ांऊं स्वर्ग दूत तिन्नां सेटा का बापस स्वर्गा लै डेऊऐ, तिन्नैं गुआल़ै फुआलै किई आप्पू मांझ़ै एही गल्ला, “च़ाल्ला हाम्हां सोभी डेऊणअ बेतलेम नगरी लै अर ज़ुंण खुशीओ समाद हाम्हां का प्रभू खोज़अ, तेता एछूंमै हाम्हैं भाल़ी।”
16तेखअ डेऊऐ तिंयां तेभी तिधा लै अर मरिअम युसुफा संघै भाल़अ तिन्नैं सह शोहरू च़राठी दी डाहअ द। 17तिन्नां भाल़ी किई तिन्नैं सह गल्ल प्रगट ज़ुंण तिन्नां का स्वर्ग दूतै तेऊ शोहरूए बारै बोली ती। 18सोभी ज़ुंणी ईंयां गल्ला शूणीं तिंयां हुऐ इना गल्ला शूणीं रहैन ज़ुंण तिन्नैं फुआलै तिन्नां सोभी का खोज़ी। 19पर मरिअमै डाही ईंयां गल्ला आपणैं मन्नैं अर सह लागी आपणैं मन्नैं सोठदी। 20तिंयां फुआल फिरै तिहअ ई शूणीं अर भाल़ी परमेशरे भज़न अर ज़ै-ज़ैकार करदी बापस।
ईशूओ नाअं दर्ज़ करनअ
21ज़ांऊं शोहरूए पैईदा हणें आठ धैल़ै पूरै हुऐ अर तेऊए खतैर करनैओ धैल़अ आअ, तिन्नैं डाहअ तेऊ नाअं ईशू, ज़ुंण स्वर्ग दूते तैहा का शोहरू पेटै एछणैं का पैहलै खोज़अ त।#मूल. 17:12; लेब. 12:3
भबनै ईशूओ नाअं डाहणअ
22तेखअ ज़ांऊं मोसा गूरे बधाने साबै च़ाल़्ही धैल़ै बाद शुचै हणें धैल़ै पूरै हुऐ, तेखअ निंयं तिन्नैं ईशू एरुशलेम नगरी भबना लै परमेशरा सम्हनै शुचै हणें बधान पूरै करना लै।#लेब. 12:6 23ज़िहअ कि प्रभूए बधाना दी आसा लिखअ द, “हरेक ज़ेठअ शोहरू हणअ प्रभू लै पबित्र।”#लुआ. 13:2,12 24तै आऐ तिंयां ताकि तिंयां प्रभूए बधाने साबै एक पालल़ीओ ज़ोल़अ, नांईं ता पालल़ीए दूई बच़ै आणी शुचै हणां लै बल़ीदान करे।#लेब. 12:8
शमौने गिह
25तधू त तिधी एरुशलेम नगरी एक शमौन नाओं मणछ अर सह थिअ बडअ धर्मीं अर भलअ भगत मणछ, अर सह हआ त इज़राईले शांती न्हैल़अ लागअ द अर पबित्र आत्मां त तेऊ संघै। 26तेऊ लै त पबित्र आत्मां का इहअ भेद खोज़अ द, “ज़ेभै तैणीं तूह प्रभूए मसीहा भाल़ी निं लए, तेभै तैणीं निं तूह मरनअ आथी।” 27सह आअ आत्मां दी भर्हुई करै भबना लै। ज़ांऊं मरिअम अर युसुफै सह होछ़अ लान्हअ ईशू भितरा लै आणअ कि बधाने साबै तेऊ लै तिंयां करे। 28तेऊ ढाकअ सह शोहरू “ईशू” आपणैं भोसल़ै संघा बोलअ परमेशरो शूकर करी इहअ,#ईशा. 40:5; 42:6; 49:6
29“हे परमेशर
ऐबै सका हुंह तेरअ दास तेरै बाहिदे साबै शांती संघै मरी।
30किल्हैकि मेरी आछी हेरअ तेरअ उद्धार भाल़ी,
31ज़ुंण तंऐं सोभी देशे लोगा लै आसा तैर किअ द कि
32सह आसा होरी सोभी ज़ातीए लोगा लै परमेशरा प्रगट करनै आल़अ प्रैश्शअ
अर तेरी आपणीं परज़ा इज़राईली मणछो प्रतप्प।”
33तेऊ शोहरूए ईज-बाब बी हुऐ रहैन ज़ुंण शमौनै तेऊ शोहरूए बारै बोली ती। 34तेखअ दैनी शमौनै तिन्नां लै बर्गत अर शोहरूए ईज मरिअमा लै बोलअ, “हेर, अह शोहरू आसा इज़राईले खास्सै मणछा लै बनाश अर खास्सै मणछा ज़िऊंदै हणां लै टांकअ द। अह हणअ परमेशरो एक नछ़ैण अर कई लोगा करनअ एऊओ बरोध।”#ईशा. 8:14-15 35इधी तैणीं कि कई मणछे गुप्त सोठ बी हणीं प्रगट अर तिछी तलबारा ज़िहै दुखा करै बिन्हणअ तेरअ आपणअ मन्न।
हनन्याह बोलअ ईशूए बारै
36आशेरे खिंबा का थिई एक आन्ना नाओंए फनुएले शोहरी परमेशरे गूर अर सह थिई खास्सी प्रोढी बी गई दी हई अर सह रही ती तेसे बैहा हणैं का बाद साता ई साला आपणैं लाल़ै संघै। 37सह थिई चरैसी साला ओर्ही बिधबा अर सह रहा ती भबनै ई। सह रहा ती ब्रत अर प्राथणां करी तिधी एछी राची धैल़ी च़ाकरी करदी लागी। 38सह बी लागी तैहा घल़ी तिधी एछी परमेशरे शूकर करदी अर तिन्नां सोभिए बारै बोली तेऊ शोहरूए बारै गल्ला करदी ज़ुंण एरुशलेम नगरीए छ़ुटकारै लै मसीहा न्हैल़ै तै लागै दै।#ईशा. 52:9
नासरत नगरी लै बापस डेऊणअ
39ज़ांऊं मरिअम अर युसुफ प्रभूए बधाने साबै सोभ गल्ला करी मुक्कै, तेखअ डेऊऐ तिंयां गलील मुल्खे आपणीं नगरी नासरत नगरी लै।
40शोहरू लागअ बढदअ अर जोधअ हंदअ अर अक्ली दी लागअ भरपूर हंदअ अर परमेशरे झींण ती तेऊ दी।
होछ़ी बारी ईशू भबनै
41तेऊए ईज-बाब करा तै हर साल ऊवार्णे थैरा लै एरुशलेम नगरी लै डेऊई।#लुआ. 12:24-27; बधा. 16:1-8
42ज़ांऊं ईशू बारा सालो हुअ, अर तिंयां डेऊऐ थैरे रिती-रबाज़े साबै एरुशलेम नगरी लै अर 43तिंयां तिन्नां धैल़ै पूरै करी बापस फिरदै लागै, सह होछ़अ लान्हअ ईशू रहअ एरुशलेम नगरी ई अर तेऊए ईजा-बाबा का निं थोघै त कि सह किधी आसा।
44तिन्नैं ज़ाणअ इहअ कि सह हणअ होरी मसाफरा संघै आजू-आजू, पर एकी धैल़ीए डेरै पाणै का बाद लागै तिंयां सोभी ज़ाणैं-बछ़ैणैं अर टबरा पुछ़दै अर तेऊ लोल़ै।
45पर ज़ांऊं सह नांईं भेटअ, तिंयां आऐ तेऊ लोल़दी-पुछ़दी एरुशलेम नगरी लै बापस फिरी अर 46चिई धैल़ै बाद भेटअ तिन्नां सह भबने खोल़ै गूरू संघै बेठअ द अर सह थिअ तिन्नें गल्ला शूणअ अर तिन्नां का सुआल पुछ़दअ लागअ द। 47संघा ज़ेतरै बी तेऊ शूणैं तै लागै दै, तिंयां हुऐ तेऊए समझ़ अर तेऊए ज़बाबा शूणीं रहैन।
48इहअ भाल़ी हुऐ तेऊए ईज-बाब बी रहैन अर तेऊए ईज मरिअमे बोलअ, “आरा शोहरूआ, तंऐं किल्है किअ हाम्हां संघै इहअ? हुंह अर तेरअ बाब थकै ताह लोल़ी-लोल़ी?”
49तेऊ पुछ़अ तिन्नां का, “तम्हैं मुंह लोल़ै किल्है लागै? तम्हां का इहअ निं थोघै कि मुंह आसा आपणैं बाबे घअरै रहणअ ज़रूरी?” 50पर ज़ुंण अह गल्ल तेऊ तिन्नां का बोली, तिंयां निं ऐहा गल्ला समझ़ै।
51तेखअ डेऊअ सह तिन्नां संघै अर नासरत नगरी पुजै अर सह रहअ तिन्नें साबै तिधी अर तेऊए ईजै डाही ईंयां गल्ला आपणैं दिलै।
52इहअ करै लागअ ईशू अक्ल, कद-काठी, परमेशरे अर मणछे शोभा दी बढदअ।#1 शमू. 2:26; सैणीं. 3:4
Pilihan Saat Ini:
लूका 2: OSJ
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
This work is licensed under Creative Commons Attribution-ShareAlike 4.0 License.
