लूका 13

प्राश्त करा कि करा आपणअ बनाश

1तेभै आऐ ईशू सेटा तिधी कई लोग अर तिंयां लागै गलीली लोगे बारै दी च़रच़ा करदै, ज़ुंण राज़पाल पिलातुसै तैहा ई ज़ैगा पाऐ तै मारी ज़िधी यहूदी भबनै बल़ीदान करदै तै लागै दै अर तिन्‍नां मणछो लोहू पल़अ तिधी बल़ीदान किऐ दै पशूए लोहू जैंदरी कठा।

2इहअ शूणीं दैनअ ईशू तिन्‍नां लै ज़बाब, “तम्हैं किज़ै समझ़ा कि ईंयां गलीली मणछ कै होरी गलीली मणछा का पापी तै कि तिन्‍नां लै पल़ी एही खरी? 3हुंह बोला तम्हां लै कि तिंयां नांईं तै पापी आथी। पर ज़ै तम्हैं आपणैं पापो प्राश्त करी परमेशरा बाखा नांईं फिरे, थारअ बी हणअ इहअ ई बनाश।

4 “तम्हैं कै समझ़ा कि तिंयां ठारा लोग ज़हा प्रैंदै शिलोहे पुंडरी पल़ी अर तिंयां मूंऐं तेथ हेठै दाभूई करै। तिंयां कै एरुशलेम नगरी दी रहणैं आल़ै होरी सोभी का खास्सै पापी तै? 5हुंह बोला तम्हां लै कि तिंयां नांईं तै पापी आथी। पर ज़ै तम्हैं आपणैं पापो प्राश्त नांईं करे, थारअ बी हणअ इहअ ई बनाश।”

फल़ा बाझ़ी फेडूए बूटे कथ्या

6तेखअ खोज़ी ईशू तिन्‍नां का एक कथ्या, “एकी मणछे दाखे बागा दी त एक फेडूओ बूट लागअ द। सह एछा त हर साल तेथ फल़ा लोल़अ पर तेऊ निं तेता का किछ़ भेटअ।#13:6 मोत्त. 21:19-20; मार्क. 11:12-14

7 “तेखअ बोलअ तेऊ बागे पहरी लै, ‘भाल़, चिई साला ओर्ही आसा हुंह एऊ फेडूए बूटा दी फल़ा न्हैल़अ लागअ द। पर मुखा निं एथ एक दाणअ बी शुझुअ! एऊ पाआ ऐबै काटी। अह आसा थोघै बाझ़ी ज़िम्मीं दी शल़ैऊआ लांदअ।’ 8तेऊ पहरी बोलअ इहअ, ‘हे मालक ऐहा साला दै एऊ रहणैं, हुंह पाऊं एता च़ऊ बाखा खण्हीं करै खाद। 9ज़ै आगली साला एथ फल़ एछे, ठीक, नांईं ता तेखअ पाणअ मुंह अह काटी।’”

बशैघे धैल़ी कुबल़ी बेटल़ी ठीक करनी

10बशैघे धैल़ी त ईशू सभागृहा शिक्षा दैंदअ लागअ द, 11तिधी ती एक बेटल़ी एही, तैहा ती ठारा साला ओर्ही एक दुबल़ै करनै आल़अ भूत शाचअ द। सह थिई एतरी कुबल़ी हुई दी कि सह निं आज़री खल़ी बी हई सकदी ती।

12तैहा भाल़ी शादी सह ईशू आप्पू सेटा लै अर तैहा लै बोलअ, “हे ज़नानी, तूह गई ऐहा बमारी का ऐबै राम्बल़ी हई।” 13तेखअ ईशू तैहा दी हाथ लाअ अर सह हुई आज़री खल़ी अर सह लागी परमेशरे ज़ै-ज़ैकार करदी।

14ईशू किई ती सह बशैघे धैल़ी नरोगी, सभागृहे कारदारै बोलअ रोश्शै लोगा का इहअ, “हबतै दी आसा कामां करना लै छ़ह धैल़ै, अर नरोगै हंदै बी एछा तिन्‍नां ई धैल़ै, बशैघे धैल़ी एछणअ निं ठीक आथी।”#लुआ. 20:9-10; बधा. 5:13-14

15इहअ शूणीं प्रभू ज़बाब दैई बोलअ, “हे कपटी मणछो, बशैघे धैल़ी कै तम्हैं आपणैं गाधै अर बल्द खोल्ही करै पाणीं निं पणैंऊंदै? 16अह बेटल़ी बी आसा आबरामे खिंबा का। राख्सै ती अह ठारा साला ओर्ही डाही दी बशै करी अर अह कै माल़ी गल्‍ल हुई कि आझ़ छ़ुटी अह बशैघे धैल़ी तैहा गल़ैऊंडी का?”

17ज़ांऊं ईशू ईंयां गल्‍ला बोली, ईशूए सारै बरोधी हुऐ शर्मिंदै अर होर सारै लोग हुऐ ईशूए तिन्‍नां महान कामां भाल़ी खुश ज़ुंण सह करा त।

शाऊईए बेज़े कथ्या

(मोत्ती 13:31,32; मार्कुस 4:30-32)

18तेखअ बोलअ ईशू तिन्‍नां लै, “परमेशरो राज़ किज़ू ज़िहअ आसा अर हुंह कहा कथ्या खोज़ी करै समझ़ाऊं? 19सह आसा एक शाऊईए दाणैं ज़िहअ ज़ुंण एकी मणछै आपणैं बागा दी बऊअ। ज़ांऊं सह बझ़अ, सह बणअ बडअ बूट अर सरगै डैऊंदै च़ेल्‍लू-पखीरू बणाऐं तेते शाण्हीं जैंदरी कोल्ह।”#13:19 मोत्त. 13:31-32; एज. 31:6; दान. 4:21

स्वर्गो राज़ सज़ेल़ै ज़िहअ

(मोत्ती 13:33)

20तेखअ बोलअ ईशू इहअ, “हुंह तम्हां का परमेशरो राज़ किज़ू ज़िहअ खोज़ूं? 21स्वर्गो राज़ आसा धख ज़िहै सज़ेल़ै ज़िहअ ज़ुंण कुंणी बेटल़ी खास्सै पिठै जैंदरी मुछ़अ। थोल़ी घल़ी बाद बणअ सह सारअ मुछ़अ द पिठअ सज़ेल़अ।”

सांगल़अ दुआर

(मोत्ती 7:13,14; 21:23)

22ईशू त लागअ द नगरी-नगरी अर गराऊंऐं-गराऊंऐं शिक्षा दैंदी च़ेल्‍लै संघै एरुशलेम नगरी लै डेऊंदअ। 23तेखअ बोलअ कुंणी इहअ, “हे प्रभू, सदा रहणैं आल़ी सज़ा का कै सिधै थोल़ै ई मणछ बच़णैं?” 24ईशू बोलअ तिन्‍नां लै, “सांगल़ी प्रऊल़ी बाती करा डेऊणे कोशिश। हुंह खोज़ा तम्हां का सत्त कि कई लोगा डेऊणअ होरी बाता खुल्ही प्रऊल़ी बाती पर तिंयां निं डेऊई सकदै। 25ज़ांऊं घअरे मालका हूल़ी हेरनअ, तम्हैं हणैं बागै खल़्हुऐ दै अर लेरा लाई-लाई अरज़ करी दुआरा टोक्‍कदै, ‘हे प्रभू, हाम्हां लै घुआल़ दुआर कि हाम्हैं भितरी एछी सके,’ अर तेऊ दैणअ इहअ ज़बाब, ‘हुंह निं तम्हां बछ़ैणदअ कि तम्हैं किधा का आऐ?’ 26तेभै बोल़णअ तम्हां इहअ, ‘हाम्हैं हआ तै ताह संघै खांदै-पिंदै अर तंऐं दैनी ती म्हारै मुल्खै शिक्षा बी।’ 27#13:27 भज. 6:8 पर तेऊ बोल़णअ तम्हां लै इहअ, ‘हुंह निं तम्हां बछ़ैणदअ कि तम्हैं किधा का आऐ? ओ कदुष्ट काम करनै आल़ैओ मुंह सेटा का डेओआ दूर।’

28 “ज़ेभै तम्हां आबराम, इसहाक, याकब अर परमेशरे सारै गूरा परमेशरे राज़ा दी बेठै दै भाल़े अर आप्पू शुझणैं तम्हैं बागै निखल़दै। तिधी हणैं तिंयां लैल़ा लांदै अर दाहे झोशा करै दांदा कटिल्‍लदै लागै दै। 29तिधी एछणैं च़ऊ दिशा का हर ज़ातीए लोग परमेशरे राज़ा दी भोज़ा खांदै।#13:29 ईशा. 66:18; प्रका. 7:9; भज. 107:3; मला. 1:11 30ज़ुंण पिछ़ू आसा तिंयां हणैं आजू अर ज़ुंण आजू आसा तिंयां हणैं पिछ़ू।”

हेरोदेस राज़ेए ज़ीद

31तेभै बोलअ कई फरीसी मणछे इहअ ईशू लै, “इधा का डेऊ दूर किल्हैकि हेरोदेस च़ाहा ताह मारनअ।” 32ईशू बोलअ तिन्‍नां लै, “डेओआ, तेऊ शैल़ी ज़िहै कपटी मणछा लै बोला इहअ कि भाल़ आझ़ अर काल्‍ला काढा हुंह भूता अर बमारा करा हुंह राम्बल़ै अर चिऊथै धैल़ै करनअ मुंह आपणअ काम पूरअ। 33तैबी आसा मुंह आझ़, काल्‍ला अर पर्शी हांढणअ ज़रूरी, किल्हैकि इहअ निं हई सकदअ कि परमेशरे गूरा कुंण एरुशलेम नगरी का बागै मारे।

एरुशलेम नगरी लै फिटक

(मोत्ती 23:37-39)

34 “हे एरुशलेम नगरीए लोगो, तम्हैं ज़ुंण परमेशरे तिन्‍नां गूरे हत्या किई ज़ुंण तम्हां सेटा लै परमेशरै छ़ाडै तै। तम्हैं पाऐ तिंयां पात्थरे ढो दैई मारी। मंऐं सोठअ कई बारी कि ज़ेही मुर्गी आपणैं बच्च़ै आपणैं फैंखा हेठै कठा करा, तिहै ई करूं हुंबी थारै बाल-बच्च़ै बी कठा पर तम्हैं निं इहअ हणैं दैनअ। 35भाल़ा, थारअ घअर छ़ाडअ मंऐं तम्हां लै उज़र अर ज़ेभै तैणीं तम्हैं आप्पै निं इहअ बोले,

# 13:35 भज. 118:26; जेर. 12:7 “परमेशर दैआ तेऊ मणछा लै बर्गत ज़ुंण प्रभूए नाओंए एछा, तेभै तैणीं निं हुंह तम्हां का भिई शुझणअ।”

Pilihan Saat Ini:

लूका 13: OSJ

Sorotan

Salin

Bandingkan