जोहन्ना 12
12
ईशूए च़रणैं खुशबूदार किम्मती तेल लाणअ
(मोत्ती 26:6-13; मार्कुस 14:3-9)
1तेखअ आअ ईशू ऊवार्णे थैरा का छ़हा धैल़ै पैहलै बेथनी गराऊंआं लै, ज़िधी सह लाज़र थिअ ज़ुंण ईशू ज़िऊंदअ किअ त। 2तिधी बणाईं तिन्नैं ईशू लै रोटी, मार्था लागी च़ाकरी करदी अर लाज़र बी त तिन्नां मांझ़ै रोटी खांदअ बेठअ द ज़ुंण ईशू संघै रोटी खांदै तै बेठै दै। 3तेखअ मल़अ मरिअमै आधअ सेर जटामांसीओ किम्मती खुशबूदार तेल ईशूए च़रणैं संघा टुशै आपणैं मुंडे शराल़ा करै ईशूए खूर, अर तेले खुशबू भर्हुई सारै घअरै अर सारअ घअर हुअ खुशबूदार।
4पर तिन्नां च़ेल्लै मांझ़ै करेती गराऊंओ यहूदा ज़ुंणी ईशू कैद करनै बझ़ैल़अ त तेऊ बोलअ, 5“अह खुशबूदार किम्मती तेल चिई शौआ च़ंदीए सिक्कै बराबर किम्मता दी बेच़ी गरीबा लै किल्है निं दैनअ?” 6तेऊ निं अह गल्ल तै बोली कि तेऊ ती गरीबे फिकर, तेऊ बोली अह तै सह थिअ च़ोर। तेऊ का रहा तै ढब्बै-धेल्ले थैल्लू, अर तेता का करा त सह च़ोरी। 7ईशू दैनअ ज़बाब, “तेऊ दै मुंह दाबणे धैल़ी तैणीं एक्कै रहणैं। 8गरीब रहणैं कबल्लै तम्हां ई संघै तम्हैं ज़ेभै च़ाहे तेभै सका तिन्नां लै दैई, पर हुंह निं तम्हां संघै कबल्लअ च़ाल्लअ रहई।”#12:8 मार्क. 14:7
लाज़रे खलाफ छ़ल़
9यहूदी मांझ़ै ज़ुंण आम लोग ज़ुंण ईशूए बारै किछ़ निं बोल्दै तै, तिन्नां का गअ थोघ लागी कि सह आसा तिधी, तिंयां निं सिधै ईशूए तैणीं तिधा लै भाल़ै आऐ पर तिंयां आऐ लाज़रा भाल़ै ज़ुंण ईशू मरी करै ज़िऊंदअ किअ त। 10बडै प्रोहतै दैनअ इहअ हुकम कि एऊ लाज़रा बी पाआ ऐबै मारी 11किल्हैकि तेऊए पिछ़ू डेऊऐ कई यहूदी अर तिन्नैं किअ ईशू दी विश्वास कि सह आसा मसीहा।
ज़िती करै एरुशलेम नगरी लै डेऊणअ
(मोत्ती 21:1-11; मार्कुस 11:1-11; लूका 19:28-40)
12दुजै धैल़ै थिऐ खास्सै मणछ एरुशलेम नगरी ऊवार्णे थैरा लै आऐ दै, तिन्नैं शूणअ इहअ कि ईशू आसा लागअ द एरुशलेम नगरी लै एछदअ, 13तिन्नैं आणी खज़ूरे बूटा का डाल़ी चोल़ी। तेखअ डेऊऐ ईशू सेटा लै शधाणूं, संघा लागै ज़ोरै-ज़ोरै बोल्दै,#भज. 118:25-26
“ज़ै-ज़ैकार, ज़ै-ज़ैकार,
परमेशर दैआ इज़राईले राज़ै लै बर्गत
ज़ुंण तेऊए नाओंऐं एछा।”
14तेखअ भेटअ ईशू एक गाधू अर सह बेठअ तेऊ प्रैंदै। 15ज़िहअ पबित्र शास्त्रा दी आसा लिखअ द,
“हे एरुशलेम नगरीए लोगो,
डरा निं आथी,
थारअ राज़अ एछणअ गाधीए बच्च़ै प्रैंदै बेशी।”
16ईशूए च़ेल्लै निं पैहलै ईंयां गल्ला समझ़ी ती, पर ज़ांऊं ईशू प्रतप्पा दी प्रगट हुअ, तेखअ फिरी तिन्नां आद कि ईंयां गल्ला आसा ईशूए बारै शास्त्रा दी लिखी दी, अर लोगै किअ तेऊ संघै इहअ बर्ताअ। 17तेखअ लोगे छ़ुंडा मांझ़ा का लोग ज़ुंण तेभै तेऊ संघै तै, तिन्नैं बोलअ इहअ कि ईशू शादअ लाज़र घोरी दी दाबअ द लाज़र बागा लै, अर मूंऐं दै मांझ़ा का किअ ज़िऊंदअ। 18एते ई बज़्हा आऐ तै लोग ईशू सेटा मिलदै, किल्हैकि तिन्नैं शूणअ त कि ईशू किअ अह च़मत्कार। 19तेखअ लागै फरीसी आप्पू मांझ़ै गल्ला कि सोठा, सोठा आरो, थारै निं किछ़ हई सकदअ, भाल़ा, खास्सै मणछ च़ाल्लै संसारै तेऊ पिछ़ू डेऊई!
यूनानी लोगो ईशू लोल़ै लागणअ
20ज़ुंण लोग ऊवार्णे थैरा लै च़ाकरी करदै एरुशलेम नगरी थिऐ आऐ दै, तिन्नां मांझ़ै थिऐ कई यूनानी मणछ बी। 21तिन्नैं गलील मुल्खे बैतसैदा गराऊंऐं रहणैं आल़ै फलिप्पा सेटा डेऊई अरज़ किई, “हे जनाब हाम्हैं च़ाहा ईशू सेटा मिलणअ।” 22फलिप्पै बोली ईंयां गल्ला आपणैं साथी आन्दरू का, अर तिंयां दूई बोलअ ईशू का।
23ऐहा बोलअ गल्ला शूणीं ईशू तिन्नां का, “सह बगत गअ पुजी, ऐबै रहैऊंणअ परमेशरा मुंह मणछे पूतो प्रतप्प। 24हुंह खोज़ा तम्हां का सत्त कि ज़ेभै तैणीं कणको दाणअ खेचै पल़ी नांईं मरदअ, तेभै तैणीं रहा सह एक्कै पर ज़ांऊं सह मरा, तेखअ लागा तेथ कई दाणैं। 25ज़ुंण बी एऊ संसारै आपणैं प्राणा लै झ़ूरी करा, सह करा तेता बरैबाद। पर ज़ुंण एऊ संसारै आपणैं प्राणा का झ़ूरी नांईं करदअ, सह डाहा सदा रहणैं आल़ी ज़िन्दगी तैणीं तेता सभाल़ी। 26ज़ै कुंण मेरअ च़ेल्लअ हणअ च़ाहे, सह लागै मुंह पिछ़ू हांढदअ, अर ज़िधी हुंह आसा, तिधी हणअ मेरअ दास बी। ज़ै कुंण मेरी च़ाकरी करे, तेऊ भेटणअ बाब परमेशरा का अदर।
क्रूसे मौतो नछ़ैण
27 “ऐबै हुअ मेरअ ज़िऊ कमज़ोर, इहअ करै मंऐं कै लाअ बोली? मेरै बाब मुंह बच़ाऊ ऐहा घल़ी का पर हुंह आसा पुजअ द एते ई तैणीं एऊ बगता दी। 28मेरै बाब, आपणैं नाओं प्रतप्प रहैऊ।”
तेखअ किई परमेशरै स्वर्गा का एही गल्ला, “मंऐं आसा हेरअ द एऊओ प्रतप्प रहैऊई, अर आजू बी रहणअ करदअ।” 29ज़ुंण तिधी खल़्हुऐ दै लोग शूणैं तै लागै दै, तिन्नैं बोलअ, “गुल़ूबिज़ल़ू लागअ,” अर कई बोलअ, “स्वर्ग दूतै किई एऊ संघै गल्ला।”
30एता लै बोलअ ईशू, “अह बोल निं मुल्है आई पर अह आसा तम्हां लै। 31ऐबै हणअ एऊ संसारो नसाफ अर एऊ संसारा आपणैं बशै करी राज़ करनै आल़ै राख्सा भेटणीं सज़ा। सह काढणअ ऐबै बागा लै। 32ज़ेभै मुंह ऐहा पृथूई का उझै च़के, तै आणनैं मुंह सोभ आप्पू सेटा लै।” 33इहअ बोली किई तेऊ अह गल्ल प्रगट कि सह केही मौता मरनअ।
34ऐहा गल्ला शूणीं बोलअ लोगै तेऊ लै, “हाम्हैं आसा बधाना दी अह गल्ल शूणीं दी कि मसीहा रहणअ सदा ज़िऊंदअ। पर तै तूह किल्है बोला, ‘हुंह मणछो पूत आसा उछ़टै दी छ़ड़ाऊंणअ ज़रूरी?’#दान. 7:14 35अह ‘तूह मणछो शोहरू’ कुंण आसा?”
ईशू बोलअ तिन्नां लै, “प्रैश्शअ आसा तम्हां सेटा थोल़ी घल़ी, ज़ेभै तैणीं प्रैश्शअ तम्हां सेटा आसा, तेभै तैणीं लागा हांढदै, इहअ निं हआ कि तम्हैं रहा न्हैरै दी, ज़ुंण न्हैरै दी हांढा, तेऊ का निं इहअ थोघ हंदअ कि केस्सी डेऊणअ। 36ज़ेभै तैणीं प्रैश्शअ तम्हां संघै आसा, प्रैश्शैओ विश्वास करा ताकि तम्हैं प्रैश्शे लुआद बणी सके।”
इना गल्ला बोली लागअ ईशू हांढदअ अर तिन्नें आछी का रहअ दूर ई।
यहूदी मणछो विश्वास नांईं करनअ
37तेखअ रहैऊऐ तेऊ तिन्नां का कई नछ़ैण पर तैबी निं यहूदी मणछै विश्वास किअ। 38अह हुअ इहअ कि परमेशरे गूर ईशायाह बोली दी ईंयां गल्ला होए,#ईशा. 53:1
“हे प्रभू, म्हारै समादो विश्वास निं कोही किअ!
अर नां प्रभूए बाहो बल कहा दी प्रगट हुअ!”
39तिंयां निं इहअ करै विश्वास करी सकै कि ईशायाह आसा इहअ बी बोलअ द,#ईशा. 6:10
40“तेऊ किई तिन्नें आछी कांणी
अर तिन्नों मन्न किअ काठअ,
इहअ निं होए कि तिंयां भाल़े
अर मना का समझ़े,
अर तिंयां आपणअ मन्न फरेओए
अर हुंह करूं तिन्नां च़ोखै।”
41ईशायाह बोली ईंयां गल्ला तेखअ ज़ांऊं तेऊ प्रभूओ प्रतप्प भाल़अ। 42तैबी किअ कई सरकारी अफसरै बी ईशू दी विश्वास पर फरीसी मणछे डरै निं तिंयां प्रगटै मंदै तै, ताकि इहअ नां होए कि तिन्नां तिंयां सभागृहा का बागै नां काढे। 43किल्हैकि होरी मणछे बड़ैई करने लागा तिन्नां परमेशरे च़ाकरी का बी खास्सी झ़ूरी।
ईशूए बैण, नसाफ हणें आथरी
44ईशू बोलअ तिन्नां लै ज़ोरै-ज़ोरै, “ज़ुंण मुंह दी विश्वास करा, सह करा तेऊओ बी विश्वास ज़ुंणी हुंह संसारा लै आसा छ़ाडअ द। 45ज़ुंण मुंह भाल़ा, सह भाल़ा तेऊ बी ज़ुंणी हुंह आसा छ़ाडअ द।
46 “हुंह आसा आअ द एऊ संसारै प्रैश्शअ बणी ताकि ज़ुंण मुंह दी विश्वास करे, सह न्हैरै दी नां रहे। 47ज़ै कुंण मेरी गल्ला शूणीं नांईं मने, तेऊ लै बी निं हुंह दोश लांदअ। किल्हैकि हुंह निं संसारे मणछा लै दोशा लांदअ आथी आअ द। पर हुंह आसा आअ द संसारा बच़ाऊंदअ। 48ज़ुंण मुंह बृथा समझ़ा अर मेरी गल्ला नांईं मंदअ, तेऊ लै दोशा लाणैं आल़अ आसा मेरअ बैण, ज़ुंण मंऐं बोलअ, तेऊ करै लागणअ खिरी तेऊ लै दोश।
49 “किल्हैकि मंऐं निं आपणीं बाखा किछ़ै गल्ला किई। पर बाब परमेशर ज़ुंणी हुंह छ़ाडअ द आसा, तेऊ आसा मुखा खोज़अ द कि किज़ै बोल़णअ? अर किज़ै खोज़णअ? 50मुखा आसा थोघ कि तेऊओ हुकम आसा सदा रहणैं आल़ी ज़िन्दगी। तैही बोला हुंह कि ज़िहअ ई मेरै बाब परमेशरै मुखा खोज़अ, मंऐं बोलअ तिहअ ई।”
Pilihan Saat Ini:
जोहन्ना 12: OSJ
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
This work is licensed under Creative Commons Attribution-ShareAlike 4.0 License.
