जेरमयाह 32
32
जेरमयाह लअ एक खेच मोलै
1सिदकिया ती यहूदा मुल्खै राज़ करदी दसुई साल लागी दी अर बाबेल देशे राज़ै नबूकदनेसरा ती ठार्हुई साल लागी दी, तधू किई बिधाता मुंह जेरमयाह संघै गल्ला।#2 राज़. 25:1-7 2तिन्नां धैल़ै ती बाबेल देशे राज़ै नबूकदनेसरे सैना राज़धानी एरुशलेम फेर बेठी दी अर हुंह जेरमयाह गूर थिअ यहूदा मुल्खे राज़ेए पहरीए मैहले खोल़ै कैद डाहअ द करी। 3हुंह थिअ तिधी राज़ै यहूदा मुल्खे राज़ै सिदकिया कैद किअ द, तेऊ लाअ मुल्है अह दोश कि मंऐं इहअ किल्है बोलअ, “बिधाता बोला इहअ, ‘ऐहा नगरी लै लाअ इहअ करी कि बाबेल देशा करनअ ऐहा नगरी दी कबज़अ अर 4यहूदा मुल्खो राज़अ सिदकिया निं तिन्नें हाथा का बच़दअ। सह ढाकणअ बाबेल देशे राज़ेए सैना। तेऊ भाल़णअ बाबेल देशो राज़अ आपणीं आछी अर तिन्नां करनीं एकी-दुजै संघै सम्हनै गल्ला। 5नबूकदनेसरा निंणअ सिदकिया कैद करी बाबेल देशा लै अर सह डाहणअ तिन्नां तेभै तैणीं तिधी, ज़ेभै तैणीं हुंह आप्पै निं बोलूं। ज़ै सह बाबेल देशे सैना संघै मकाबलै करना लै ज़िहअ ज़ोर बी लाए, पर सह निं सफल हणअ। अह गल्ल डाही मंऐं बिधाता बोली।’”
6बिधाता बोलअ मुल्है इहअ, 7“जेरमयाह, तेरै च़ाच़ू शलूमो शोहरू हनमेल एछणअ ताह सेटा लै। तेऊ बोल़णअ ताल्है, ‘अनातोत नगरी ज़ुंण मेरअ खेच आसा, तेऊ लअ तूह मोलै, किल्हैकि तूह आसा मेरअ ज़ात सक्कअ टबर।’”
8हुअ बी तिहअ ज़िहअ बिधाता बोलअ, मेरै च़ाच़ूओ शोहरू हनमेल आअ पहरीए मैहले खोल़ै मुंह सेटा लै संघा लागअ इहअ बोल्दअ, “बिन्यामीन मुल्खै अनातोत ज़ुंण मेरअ खेच आसा, तेऊ लअ तूह मोलै किल्हैकि तूह आसा मेरै सोभी का सक्कअ अर तेता मोल लणेंओ हक आसा सोभी का आजी तेरअ।” तेखअ गअ मुखा ज़ाण्हुंई कि तिंयां गल्ला किई मुंह संघै असली दी बिधाता ई।
9तेखअ लई मंऐं अनातोत सह खेचे ज़ैगा हनमेला का मोलै अर तेता लै दैनअ मंऐं तेऊ लै सतारा च़ंदीए#32:9 सतारा च़ंदीए 200 गराम च़ंदी सिक्कै। 10मंऐं बझ़ैल़ी खेच मोलै लणें करारनामे कागदा दी मोहर लाणैं अर मंऐं बी किऐ तेथ दसकत अर तेखअ दैनै शाजता नदरी तिंयां च़ंदीए सिक्कै तराकल़ी दी तोली करै तेऊ लै। 11तेऊ खेचा मोलै लणें तै करारनामै लिखै, एकी दी थिई मोहर लागी दी अर दुजी थिई तेते नकल खुल्ही। तिन्नां दी थिई लणें अर बेच़णें बिधी अर सूल लिखै दै। 12मंऐं दैनै तिंयां करारनामे कागद तिधी सोभी नदरी नेरीए शोहरू बारूका का ज़ुंण मासेयो पोचअ थिअ। तिधी त च़ाच़ूओ शोहरू मेरअ भाई हनमेल, तिंयां शाजत ज़ुंणीं करारनामै दी दसकत किऐ तै अर होर बी थिऐ तिधी यहूदी खोल़ै बेठै दै।
13मंऐं किअ तिन्नां नदरी बारूका लै हुकम, 14“स्वर्गे सारी सैनो मालक बिधाता ज़ुंण इज़राईलो परमेशर आसा, तेऊ किअ ताल्है हुकम, ‘इना करारनामे कागदा ज़ेथ मोहर आसा लागी दी अर ज़ुंण दुजी एते खुल्ही नकल आसा, इना डाह तूह आप्पू का। इना डाहै कहा माट्टे भांडै भितरी बुदरी ताकि ईंयां नांईं खोईए।’ 15इज़राईलो परमेशर स्वर्गे सारी सैनो मालक बिधाता बोला इहअ, ‘आजू एछणैं भिई इहै धैल़ै कि एऊ देशे घअर, खेच अर दाखे बाग बेच़णैं बी अर मोलै बी लणैं।’”
जेरमयाह किई बिधाता सेटा अरज़
16ज़ांऊं हुंह तिंयां खेच बेच़णैं-मोलै लणें दसकत किऐ दै कागद नेरीए शोहरू बारूका का सभाल़ी मुक्कअ, तेखअ किई मंऐं बिधाता सेटा अरज़,
17“मेरै मालक बिधाता, तंऐं आसा आपणैं महान ज़ोरा करै सारअ भ्रमंड बणाअं द, एही निं किछ़ गल्ल आथी ज़ुंण तेरै भलै हई निं सकदी। 18तूह झ़ूरा हज़ारो लोगा लै कबल्लअ, पर तूह दैआ लोगा लै तिन्नें पापे सज़ा आजू तिन्नें आद-लुआदा लै तोही। तूह आसा महान परमेशर ज़हा का सारी शगती आसा। ताह नाअं आसा स्वर्गे सारी सैनो मालक बिधाता। 19ज़ुंण तूह सोठा, सह हआ भलअ ई। तेरै काम आसा महान। तूह हआ मणछे सोभी कामां भाल़अ लागअ द, तूह दैआ तिन्नां लै ज़ेऊ साबै तिंयां ज़िन्दगी ज़िऊआ, तिन्नां लै तेऊ साबै तिन्नें कर्मो फल। 20पराणैं ज़मानै किऐ तै तंऐं मिसर देशै महान च़मत्कार, अर तेता आसा तूह आझ़ तैणीं बी करदअ लागअ द। तिंयां च़मत्कार किऐ तंऐं इज़राईल अर होरी सोभी देशे मणछा जैंदरी, तैही आसा आझ़ बी सोभी ज़ैगा तेरअ नाअं।
21“तेरै महान च़मत्कार अर नुआहरै कामां करै लागी ती दुशमणा डअर-भगैर, तंऐं आणै आपणैं महान बल अर ज़ोरा करै आपणीं इज़राईली परज़ा मिसर देशे गलामी का छ़ड़ैऊई। 22तेखअ दैनी तंऐं आपणीं परज़ा लै अह रज़दी-पज़दी ज़ैगा ज़ेही तंऐं तिन्नें दादा-बाबा लै ज़बान ती दैनी दी कि ताह करनअ इहअ। 23पर ज़ांऊं तिंयां एऊ देशै पुजै अर ऐहा ज़ैगे मालक बणै, तिन्नैं तेरै बधाने साबै आपणीं ज़िन्दगी ज़िऊई ज़िहअ तंऐं हुकम त किअ द। तैही दैनी तंऐं तिन्नां लै ईंयां एतरी आफ़ता पल़णै।
24“ऐबै भाल़ तूह आप्पै! बाबेल देशे सैना हेरै एरुशलेम नगरी फेर रोक्कै च़िणीं, अर तिन्नैं लाअ जुध छ़ेल़ी। ऐबै करनअ दुशमण बाबेल देशे सैना ऐहा नगरी दी कबज़अ। जुध, नकाल़ अर नबिज़री बमारी करै हणीं अह नगरी तिन्नें बशै। ताखा आसा शुझदअ लागअ द कि ज़िहअ तंऐं बोलअ थिअ, तिंयां गल्ला लागी ऐबै तेही ई निभदी। 25मेरै मालक बिधाता, ऐहा नगरी दी हणअ दुशमण कसदीओ कबज़अ! तज़ी बी बोलअ तंऐं मुल्है इहअ खेच मोलै लणा लै! तंऐं बोलअ इहअ, ‘एऊ खेचा लै लअ च़ंदीए सिक्कै दैई शाजता नदरी मोलै।’”
बिधाता बोलअ इज़राईली एछणैं बापस
26तेखअ बोलअ बिधाता इहअ, 27“जेरमयाह, हुंह आसा बिधाता अर हुंह आसा संसारे सोभी मणछो परमेशर। इहअ निं किछ़ आथी ज़ुंण हुंह निं करी सकदअ। 28मंऐं लाई अह नगरी बाबेल देशे राज़ै नबूकदनेसर अर तेऊए सैना काबू दैई करनै, तिन्नां करनअ एथ कबज़अ।#2 राज़. 25:1-11; 2 इति. 36:17-21 29बाबेल देशे सैना हेरअ ऐबै जुध छ़ेल़ी लाई, तिंयां पेशणैं नगरी भितरी संघा पाणीं आग चैल़ी दहई। तिन्नां करनै तिंयां घअर दहई-प्लुशी खतम ज़हा घअरै बाल देअआ लै धूप ज़ाल़ी अर तिन्नां लै अर्घअ दैई मुल्है रोश्श ठैऊई। 30ज़धकअ अह देश बणअ, तधा ओर्ही रहै इज़राईल अर यहूदा मेरी आछी सम्हनै कदुष्ट अर बृथा काम करदै। तिन्नैं निं मुल्है रोश्श आणनैं का सुआई किछ़ किअ! तिंयां रहै आपणैं हाथै बणाऐं दै देअए मुहुर्ती पूज़दै लागी। 31ऐहा नगरी दी बस्सै दै मणछै ठैऊऐ मुल्है खास्सै रोश्श। अह आसा तधा ई ओर्ही हंदअ लागअ द, ज़धा ओर्ही अह नगरी बणी। ऐबै हेरअ मंऐं सोठी कि अह करनीं मुंह मेरी आछी सम्हनै का दूर।
32“इज़राईल अर यहूदा आणी मुल्है ऐबै खास्सी रोश्शै। तिन्नैं किऐ बतेर्है कदुष्ट काम, तिन्नें राज़ै, कार-करिंदै, प्रोहत अर गूरै बी किऐ घणैं पाप। राज़धानी एरुशलेम बस्सै दै सोभी लोगै बी निं पाप करने कसर छ़ाडी। 33इनै आसा सोभी मुंह बाखा लै पिठ डाही दी फरेऊई। हुंह रहअ इना भिई-भिई नैरदअ लागी पर इनै किई मेरी गल्ला शूणीं-नां शूणीं अर ज़ाथी निं मुंह बाखा धैन ई दैनअ। 34तिन्नैं डाही आपणीं तिंयां च़िल़्हखरी मुहुर्ती तेऊ भबनै तोही ज़ुंण मेरै नाओंऐं आसा। तेता करै लाई तिन्नैं मेरै भबनै बी छ़ोत।#2 राज़. 23:10; जेर. 7:30,31; 19:1-6 35#2 राज़. 23:10; जेर. 7:31; लेब. 18:21तिन्नैं बणाईं बाल देअए एक बेदी हिनोम खागै! तेथ करा तिंयां आपणैं शोहरू-शोहरी मोलक देअआ लै बल़ीदान! इहअ करना लै निं मंऐं तिन्नां लै बोलअ आथी त, हुंह निं एही गल्ल सोठी बी सकदअ। तिन्नैं किअ सह ई काम ज़ेता का मुंह नफरत आसा अर तिन्नैं लाई इहअ पाप करी सोभी यहूदी लै छ़ोत।”
आजू लै आशा
36इज़राईले परमेशर बिधाता बोलअ आजू इहअ, “जेरमयाह, लोग आसा इहअ बोल्दै लागै दै, ‘जुध, नकाल़ अर नबिज़री बमारी करै हणीं अह नगरी बाबेल देशे राज़े बशै।’ पर ऐबै शुण कि आजू मुंह किज़ै करनअ। 37मुंह करनै आपणैं सोभ लोग तिन्नां सोभी देशा का झाल़ी कठा ज़ेता लै मंऐं रोश्शै तिंयां दरल़ाऊई काढै तै। मुंह पजैल़णैं तिंयां ऐहा ज़ैगा बापस। तेखअ दैणअ मुंह तिन्नां एथ निहंचै बस्सणै। 38तेखअ हणीं तिंयां मेरी परज़ा अर हुंह हणअ तिन्नों परमेशर।#2 करि. 6:16 39तिन्नें दिले पाणीं मुंह ज़िऊंणें एक्कै ई गल्ल कि तिंयां सदा मेरी डरा हेठे रहे अर तिन्नों आपणअ बी भलअ होए अर आजू तिन्नें आद-लुआदो बी भलअ होए। 40तिन्नां संघै करनी मुंह सदा लै करार। तिन्नां लै निं हुंह भलअ करनअ छ़ाडदअ तिन्नें दिलै पज़ेरनअ मुंह आप्पू लै इहअ अदर कि तिंयां कधि मुखा दूर नां होए। 41हुंह रहा इना लै भलअ ई करना लै खुश, ईंयां बसाऊंणै मुंह ऐहा ज़ैगा सदा लै।#लूक. 22:20; 1 करि. 11:25; 2 करि. 3:6; इब्रा. 13:20
42“ज़ेही मंऐं इना लै आफ़त दैनी पल़णै तेही ई दैणीं मुंह इना लै तिंयां सोभ भली गल्ला ज़ेते मंऐं ज़बान आसा किई दी। 43लोग आसा ऐबै इहअ बोल्दै लागै दै कि अह ज़ैगा हणीं एही उज़र कि एथ नां कुंण मणछ रहणअ अर नां एथ कुंण बणों ज़ीब बस्सणअ, ऐहा ज़ैगा हणअ बाबेल देशो कबज़अ। पर ऐहा ज़ैगा लणैं भिई खेच मोलै। 44लोगा करनअ तेतो ढब्बै करै मोल-भाअ अर तिन्नां करनै तेते करारनामे कागदा दी दसकत, मोहर बी लाणीं अर शाजत बी हणैं। ईंयां गल्ला हणीं बिन्यामीन मुल्खै, एरुशलेम नगरी फेर-फिरदै गराऊंऐं, यहूदा मुल्खे होरी सोभी नगरी, धारा बाखलै देशे सोभी नगरी, धारा गोधे सोभी नगरी अर यहूदा दखण सारै देशै। मुंह करनी आपणीं परज़ा भिई कठा। अह गल्ल डाही मंऐं बिधाता बोली।”
Pilihan Saat Ini:
जेरमयाह 32: OSJ
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
This work is licensed under Creative Commons Attribution-ShareAlike 4.0 License.