जेरमयाह 19
19
फुटी दी झ़ारी
1बिधाता बोलअ मुल्है, “जेरमयाह, तूह डेऊ संघा आण खमारा का माट्टे बणाईं दी झ़ारी मोलै लई। आप्पू संघै निंऊं परज़ा मांझ़े यहूदी सैणैं अर प्रोढै प्रोहत, 2संघा डेऊ बेन-हिनोम खागा बाखा लै। संघा खल़्हू फुटै दै ठिक्करै शोटणें प्रऊल़ी नेल़। तूह खोज़ै मेरै तेऊ समादा सोभी का ज़ुंण ताखा मुंह खोज़णअ।#2 राज़. 23:10; जेर. 7:30-32; 32:34,35 3तूह बोलै लोगा का इहअ कि यहूदा मुल्खे राज़ै अर एरुशलेम नगरीए लोगो! तम्हैं शूणां समाद कि स्वर्गे सारी सैनो मालक बिधाता किज़ै बोला। इज़राईलो परमेशर बोला इहअ कि शूणां, मंऐं लाई ऐहा ज़ैगा लै एही आफ़त पाई कि ज़ुंण बी तिन्नां गल्ला शुणें तिंयां हणैं हक्कै-बक्कै।
4“मेरी यहूदी परज़ा छ़ाडअ हुंह पठी, तिन्नैं लाई ऐहा ज़ैगा होरी देअआ लै बल़ीदान करी अर धूप ज़ाल़ी छ़ोत। तिंयां देअ नां तिन्नें दादै-बाबै ज़ाणैं-भाल़ै अर नां तिन्नें बारै यहूदा मुल्खे राज़ै तेते बारै किछ़ ज़ाणदै। तिन्नैं शोटी अह ज़ैगा नर्दोश मणछे लोधल़ै करै भरी। 5तिन्नैं बणाईं बाल नाओंए देअआ लै बेदी कि तिधी तिंयां तेऊ लै आपणैं शोहरू काटी हूम करे! तिन्नां लै इहअ करनैओ हुकम निं मंऐं आथी किअ द, एही गल्ल निं हुंह सोठी बी सकदअ।#लेब. 18:21 6आजू एछणअ इहअ बगत कि ऐहा ज़ैगा लै निं लोगा तोपेत या हिनोम खाग बोल़णअ। ऐहा ज़ैगा लै बोल़णअ काटणै-मारनैओ खाग। 7ऐहा ज़ैगा करनी मुंह यहूदा अर एरुशलेम नगरीए लोगे सोठी दी सोभ बिक्री बृथा। इधी दैणअ मुंह तिन्नें दुशमणा तिन्नां लै चुटी पल़णै अर जुधा दी तलबारा करै मारनै। तिन्नें ल्हासा दैणीं मुंह काअ-गरली च़ोच़ल़णै अर तिन्नें साल-फसल दैणीं मुंह बणें ज़ीबा खाणैं। 8मुंह आणनीं ऐहा एरुशलेम नगरी लै एही बरैबादी कि अह ज़ैगा करनी मुंह पठी उज़र। एसी बाती हांढदै-फिरदै लागणअ तेता भाल़ी प्राच अर तिंयां लागणै मुंडकी झ़ल़ाऊंदै। 9दुशमणा गोटणी अह नगरी फेरा-फेर अर तिंयां पल़णै मारदै पिछ़ू। नगरीए लोग रहणैं भितरी इहै कैद हई कि खिरी खाणैं भुखै तिन्नां एक-दुजअ मारी करै, होर ता होर तिन्नां खाणैं आपणैं लान्हैं-सुन्हैं बी।
10“जेरमयाह, ऐहा माट्टे झ़ारी पाऐ तूह तिन्नां नदरी फाल़ी ज़ुंण ताह संघा हणैं आऐ दै। 11तेखअ बोलै तूह तिन्नां लै कि स्वर्गे सारी सैनो मालक बिधाता बोला इहअ, ‘अह नगरी अर एथ बस्सै दै पाणै मुंह इहै ई फाल़ी, तिंयां हणैं ऐहा माट्टे झ़ारीए फुटै दै ठिक्करै ज़िहै ज़ुंण भिई निं ज़ुल़दै। लोगा डाहणीं इधी तोपेत खागै एतरी ल्हासा दाबी कि तेखअ निं ल्हासा दाबणा लै तेथ ज़ैगा ई बच़णीं। 12मंऐं डाहअ बोली कि एरुशलेम नगरी संघै करनअ मुंह इहअ ई। अह नगरी करनीं मुंह तोपेत खागा ज़ेही।’ 13एरुशलेम नगरी सोभी घअरै आसा तोपेत खागा ज़ेही छ़ोत लागी दी। तिहै ई आसा यहूदा मुल्खे राज़े मैहलै बी। सोभी लोगै ज़ाल़ै सरगे ग्रहा लै आपणीं च़ाऊल़ी का धूप। तिंयां रहै देअए मुहुर्ती लै अर्घै दैंदै लागी।”#शधा. 7:42
14तेखअ आअ हुंह तोपेत खागा का फिरी ज़िधा लै बिधाता हुंह आपणैं समादा खोज़दअ छ़ाडअ त। तेखअ डेऊअ हुंह बिधाते भबने खोल़ै लै संघा रहअ तिधी खल़्हुई संघा खोज़ी मंऐं ईंयां गल्ला तिधी सोभी लोगा का। 15मंऐं बोलअ तिधी इहअ कि स्वर्गे सारी सैनो मालक बिधाता ज़ुंण इज़राईलो परमेशर आसा, सह बोला इहअ, “मंऐं लाई एरुशलेम अर तेता ओरी-पोरी सोभी नगरी लै सज़ा दैई, तिन्नां लै लाई मंऐं ज़ुंण मंऐं बोलअ तेही आफ़त पाई किल्हैकि ईंयां हुऐ हठू अर ईंयां निं ज़िहअ मंऐं बोलअ तिहअ शुणदै।”
Pilihan Saat Ini:
जेरमयाह 19: OSJ
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
This work is licensed under Creative Commons Attribution-ShareAlike 4.0 License.