ईशायाह 39
39
हिजकिया आअ घमंड
(2 राज़ै 20:12,19)
1तिन्नां ई धैल़ै हुअ इहअ कि बलदानो शोहरू बरोदक-बलदान थिअ बाबेल देशो राज़अ। तेऊ का लागअ थोघ कि हिजकिया राज़अ आसा ता बमार अर सह गअ तेता का बिज़री। तेऊ लिखी हिजकिया लै एक च़िठी संघा छ़ाडे भैंट लई आपणैं दूत। 2हिजकिया किअ तैहा च़िठी पजैल़णैं आल़ैओ सुआगत संघा रहैऊई तिन्नां का आपणीं सारी ज़ैदात, सुन्नअ, च़ंदी, भढारै किम्मती च़िज़ा, खुशबूदार मसालै अर किम्मती तेल अर सैने सारै अस्त्र शस्त्र। एही निं किज़ै च़ीज रही ज़ुंण तेऊ तिन्नां का नांईं रहैऊई। 3तेखअ डेऊअ ईशायाह गूर राज़ै हिजकिया सेटा लै संघा पुछ़अ, “तिंयां दूत किधा का थिऐ आऐ दै अर तिन्नैं ताखा किज़ै बोलअ?”
हिजकिया बोलअ, “तिंयां थिऐ खास्सै दूर बाबेल देशा का आऐ दै।”
4ईशायाह पुछ़अ, “तिन्नैं राज़ दरबारै किज़ै-किज़ै भाल़अ?”
हिजकिया बोलअ, “तिन्नैं भाल़ी सोभै गल्ला। एही निं भढारै किज़ै च़ीज़ ई रही ज़ुंण तिन्नैं निं भाल़ी होए।”
5तेखअ बोलअ ईशायाह राज़ै हिजकिया लै, “स्वर्गे सारी सैनो मालक बिधाता बोला ताल्है इहअ कि 6एक बगत एछणअ इहअ कि ज़ुंण बी तेरै मैहले भढारै तेरै दादै-बाबै आझ़ तैणीं आसा झाल़अ द, सह निंणअ बाबेल देशा लै अर एथ निं तिन्नां किछ़ छ़ाडणअ। 7तेरी आद-लुआदा मांझ़ै बी निंणै तिन्नां कैद करी बाबेल देशा लै अर तिधी पल़णअ तिन्नां शर्मिंदै हणअ अर तिंयां डाहणैं तिधी गुंझी ज़िहै राज़े च़ाकरी करदै लाई।”
8हिजकिया सोठअ इहअ कि तेऊए ज़िऊंदी ज़िता ता हणीं मेरी परज़ा लै शांती अर तिंयां रहणैं राज्ज़ी अर तेऊ बोलअ ईशायाह लै, “ज़ुंण बिधाते गल्ला तंऐं मुखा खोज़ी तिंयां हणीं भली ई।”
Pilihan Saat Ini:
ईशायाह 39: OSJ
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
This work is licensed under Creative Commons Attribution-ShareAlike 4.0 License.