ईशायाह 15
15
मोआब देशे बरैबादी
1मोआब देशा लै आसा इहअ समाद खोज़अ द:
एर अर कीर नगरी किई दुशमणै एकी राची भितरी बरैबाद, मोआब देश हुअ पठी शुन्नअ। 2दबोन नगरीए लोग निखल़ै लेरा-पकारा लांदै उझै धारा तिन्नें देहुरै लै। मोआब देशे लोगा पल़अ नेबो अर मेदबा नगरीओ शोग, तिंयां लागै हिक्का-पटाक्की लेरा लांदै। तिन्नैं क्रुंडै आपणैं मूंड अर दाल़्ही-मुछ़ा बी छाम्बी पठी। 3मोआबी लोग आसा नगरी दी बाता, च़फै अर उझै दल़बै#15:3 दल़बै छ़ाप्पर हआ तै सरलै दल़बै प्रैंदै खिंथल़ै पल़ेटी बेशी लेरा लांदै लागै दै।
4हेशबोन अर एलीला नगरीए लोगै लाई ज़ोरै-ज़ोरै ढाहा, तिन्नें लैल़ा शुण्हुंई दूर जहास नगरी तैणीं। तेता शूणीं छ़ुटअ मोआब-देशे शूरबीरा बी दर्छ़णअ अर तिन्नैं चोल़अ हैअ ई। 5मुंह बी लागी भितरा का मोआब देशे तैणीं लेरा! लोग ठुर्है ज़ोआर अर एग्लात-शेलिशिया नगरी तैणीं। कोई ठुर्है लेरदी-लेरदी उझै खल़ी कुआल़ी लुहित नगरी डेऊणे बाता, कोई होरोनेईम नगरी डेऊणे बाता संघा आसा ज़ोरै-ज़ोरै लेरा लांदै लागै दै। 6निमरीम गाड शुक्की पठी, तेते बाढो घाह बी मछैंअ पठी, पाणीं बाझ़ी फिरै सोभ डाल़-बूट पिंऊंल़ै।
7मोआब देशे लोग आसा तेऊ खागा बाखा लै लागै दै डेऊंदै ज़ेथ मधनूंए बूट आसा लागै दै अर ज़ुंण तिन्नैं आप्पू लै ज़ैदात आसा झाल़ी दी, सह पाई तिन्नैं आप्पू संघा। 8मोआब देशै आसा एकी बाढा का दुजै बाढा तैणीं च़ऊ बाखा एगलैम पोर्ही बीर-एलीम नगरी तैणीं लेर-पकारा ई शुण्हदी लागी दी। 9दबोन नगरी नेल़ गाड आसा लोहू करै लाल फिरी दी, तज़ी बी आसा बिधाता तिन्नां लै एता का बी खास्सी आफ़त आजू होर डाही दी। हाँ हेरे, ज़ुंण मोआब देशे काट-फणाटी का बच़ी निखल़ै तिन्नां खद्रेल़दै एछणैं आजू सिह!
Pilihan Saat Ini:
ईशायाह 15: OSJ
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
This work is licensed under Creative Commons Attribution-ShareAlike 4.0 License.