एजकेल 5

एजकेल गूरै किअ आपणअ मूंड लुठल़अ

1परमेशरै बोलअ भिई इहअ, “एजकेल, मणछा, आपणैं हाथै च़कै तिछी तलबार संघा छाम्बै आपणैं दाल़्ही अर मुंडे शराल़ पठी। तेखअ आणै तराकल़ संघा करै तिन्‍नां सोभी शराल़े तोली करै चअन निसब बराबर। 2ज़ांऊं एरुशलेम नगरी गोटणें धैल़ी बितणी, तेखअ पाऐ तिन्‍नां शराल़ो एक निसब नगरी भितरी दहई। दुजै निसबा करै नगरी फेर तलबारा करै छ़िन्हीं ठोर-ठोर। बाकी ज़ुण चिऊथअ निसब बच़णअ, तेऊ शोटै उझै बागरी दी, मुंह छिंगणैं तिंयां आपणीं तलबारा करै दूर। 3पर धख ज़िहै शराल़ डाहै तूह आप्पू का बच़ाऊई संघा डाहै तेता मांझ़ै धख ज़िहै आपणैं च़ोल़े पाल्‍लै पुंझ़ै गांठी अर 4धख शराल़ दहै आगी जैंदरी, तेता का भकणी आग अर सह आग शाचणी सारै इज़राईल देशै।”

5परमेशर बिधाता बोलअ इहअ, “एरुशलेम नगरी बाखा भाल़, अह नगरी आसा मंऐं संसारै मांझ़ा-मांझ़ी बसाऊई दी, होर देश आसा एता फेर बस्सै दै। 6पर एरुशलेम नगरीए परज़ा आसा पापी। तिंयां हुधूऐ मेरै बधान अर बिधी मनणा लै! तिन्‍नैं किअ द्रोह। तिंयां निं तिहअ करदै ज़िहअ मंऐं हुकम आसा किअ द। तिन्‍नैं आसा मेरै बधाना बाखा पिठ डाही दी फरेऊई। तिंयां आसा तिन्‍नां फेर बस्सै दै देशा का खास्सै कदुष्ट। 7एरुशलेम नगरीए लोगो, शूणां, ऐबै बोला हुंह थारअ परमेशर बिधाता इहअ, ‘तम्हैं आसा तम्हां फेर बस्सै दै सोभी देशा का कदुष्ट। तम्हैं निं मेरै बधाने साबै ज़िन्दगी ज़िऊई नां मेरअ हुकम मनअ। तम्हैं आसा पठी तिन्‍नां रिती-रबाज़े साबै ज़िन्दगी ज़िऊंदै लागै दै ज़ेता तम्हां फेर बस्सै दै देश मना।’ 8तैही बोला हुंह थारअ परमेशर बिधाता तम्हां लै इहअ कि हुंह आसा थारअ दुशमण। इना ई देशा नदरी दैणीं मुंह तम्हां लै सज़ा।#प्रका. 6:8 9तम्हां लै दैणीं मुंह सज़ा, मुंह करनअ तम्हां लै इहअ ज़ुंण मंऐं कधि निं किअ अर नां आजू तिहअ कधि करनअ। किल्हैकि तम्हैं किऐ मुहुर्ती पूज़ी तिंयां ई च़िल़्हखरै काम ज़ेता का हुंह नफरत करा। 10सह सज़ा हणीं एही कि एरुशलेम नगरी खाणैं ईजा-बाबा आपणैं शोहरू-शोहरी अर शोहरू-शोहरी खाणैं आपणैं ईज-बाब। ज़ुंण तेता का बच़े तिंयां छिंगणैं मुंह च़ऊ दिशा दी।#लाम. 4:10

11“तैही बोला हुंह थारअ परमेशर बिधाता आपणैं सोह खाई इहअ, ‘तम्हैं लाई कदुष्ट अर च़िल़्हखरै काम करी मेरी पबित्र ज़ैगा छ़ोत। तम्हैं पाणै मुंह तिहै ई काटी ज़िहै एजकेलै आपणैं शराल़ छ़िन्हैं। तेता लै निं मुंह तम्हां लै धख झींण बी करनी। 12थारी बादी मांझ़ै एक निसब मरनअ एरुशलेम नगरी नबिज़री बमारी अर भुखै, दुजअ निसब पाणअ नगरी बागै जुधा दी तलबारा करै मारी अर चिऊथअ निसब छिंगणअ मुंह सारै दी तिन्‍नां लै पल़णअ मुंह आपणीं तलबारा पाई पिछ़ू।’

13“तैबै जाई हणअ मेरअ रोश्श फांभअ। ज़ेभै तैणीं हुंह तिन्‍नां प्रैंदै सारअ रोश्श निं काढूं, तेभै तैणीं निं हुंह पिछ़ू हटदअ। ज़ांऊं ईंयां सोभै गल्‍ला हई जाणीं, तेभै लागणअ यहूदा अर एरुशलेम नगरीए परज़ा का थोघ कि मंऐं बिधाता बोली तिन्‍नां लै ईंयां गल्‍ला किल्हैकि मुंह खास्सी रोश्शै आई दी। 14एरुशलेम नगरी करनी मुंह एही बरैबाद कि तेस्सी बाती एछदै-डेऊंदै लोग अर तम्हां फेर देशे लोग लागणै तम्हां लै हास्सदै अर थारै सुहांगा करदै।

15“ज़ांऊं मुंह तम्हां प्रैंदै आपणैं रोश्श काढणैं, तेता करै पल़णीं तम्हां फेर होरी देशा बी डअर। तिन्‍नां लागणअ तम्हां भाल़ी प्राच अर तिन्‍नां करनै तम्हैं हास्सणां अर सुहांगा लै। तम्हां पल़णअ शर्मिंदै हणअ। अह गल्‍ल डाही मंऐं बिधाता बोली। 16थारी साल-फसल करनी मुंह पठी खतम कि तम्हैं नकाल़ा करै मरे। तम्हां लागणीं भुखै एही दाह ज़िहै कि तम्हां खुभै होए तिछै कतीर। 17तम्हां लै पाणअ मुंह नकाल़ अर बणें ज़ीबा पाणै थारै लान्हैं-सुन्हैं खाई। कई मरनै तम्हां मांझ़ै नबिज़री बमारी, कई मरनै उपद्रभा दी अर कई पाणै जुधा दी मारी। अह गल्‍ल डाही मंऐं बिधाता बोली।”#प्रका. 6:8

Pilihan Saat Ini:

एजकेल 5: OSJ

Sorotan

Salin

Bandingkan

Ingin menyimpan sorotan di semua perangkat Anda? Daftar atau masuk

This work is licensed under Creative Commons Attribution-ShareAlike 4.0 License.

Pelajari Selebihnya Tentang बाघली सराज़ी बोली दी पबित्र शास्त्र

एजकेल 5

Ayat-ayat Alkitab Ternama dari
एजकेल 5

Alkitab:

Pahari, Kullu

Versi: बाघली सराज़ी बोली दी पबित्र शास्त्र - OSJ