एजकेल 38

राज़अ गोग आसा बिधाते हाथो शस्त्र

1बिधाता दैनअ मुल्है भिई समाद, तेऊ बोलअ इहअ, 2“मणछा, तूह भाल़ मागोग देशे राज़ै गोगा बाखा, संघा खोज़ तेऊए बारै मेरअ समाद। अह आसा रोष, मेशक अर तूबल नगरीओ सैणअ।#39:1 3तूह खोज़ तेऊ लै कि हुंह परमेशर बिधाता बोला तेऊ लै इहअ, ‘रोष, मेशक अर तूबल नगरीए सैणैं गोग राज़ैआ, हुंह आसा ऐबै तेरअ दुशमण। 4तूह फरेऊंणअ मुंह फेर। मुंह लाणीं तेरी कुकल़ी मुर्क अर तूह निंणअ मुंह घिशी करै। तेरी सैना, घोल़ै अर कबच बान्हैं दै घोल़े शुंआर बी हणैं ताह संघै। सह हणीं खास्सी बडी सैना अर तिन्‍नां सोभिए हाथै हणैं शस्त्र अर ढाल़ा अर तलबारा। 5ऐहा सैना संघै हणीं फारस, कूश अर पुत देशे सैना बी। तिन्‍नैं सोभी हणैं मुंडै टोप बान्हैं दै अर हाथै ढाल़ा च़की दी। 6गोमेर अर उतर दिशा बाखा सिऊंआं दी बेथ-तोगर्मा नगरीए सैना बी हणीं ताह संघै ज़ुल़ी दी। इहअ करै हणीं ताह संघै खास्सै देशे सैना।’

7“गोग राज़ै लै बोल इहअ, ‘जुधा लै रह तैर्हुई! तूह रहै ताह संघै ऐहा बडी सैना लै हुकम दैणा लै तैर। 8खास्सी साला बाद लागणीं ताह आपणीं सैना जुधा करना लै कठा करनी। तूह छ़ाडणअ मुंह तेऊ देशा संघै मकाबलै करदअ ज़ुंण देश जुधा बाद भिई आसा बस्सअ द। तेऊ देशै हणैं कई देशा का आऐ दै लोग बस्सै दै। तिंयां हणैं इज़राईले धारा बाखे मुल्खै बस्सै दै ज़ुंण खास्सी साला तैणीं पठ उज़र अर शुन्‍नअ त हुअ द। ईंयां इज़राईली आसा देशा-देशे गलामी का छ़ुटी इधी निहंचै बस्सै दै। 9तूह पल़णअ तिन्‍नां लै आप्पू संघै ज़ुल़ी दी सोभी देशे सैना संघी ढिश-बागरी ज़िहअ चुटी अर तैहा ज़ैगा भर्हनै तम्हैं घणैं बादल़ा ज़िहै।’”

10परमेशर बिधाता बोला इहअ, “गोग, ज़ेभै अह बगत एछणअ, ताह लागणअ तेभै सोठदै अर ताह सोठणअ कदुष्ट कामां करने बारै। 11ताह सोठणअ, ‘मुंह पल़णअ तेऊ देशा लै चुटी ज़ेथ गराऊंआं फेर दुआली निं आथी च़िणीं दी अर ज़ेथ लोग निहंचै आसा बस्सै दै अर ज़हा किछ़ी गल्‍ले डअर निं आथी। तिन्‍नें निं आपणीं फाज़त करना लै उछ़टी दुआली अर पाक्‍की प्रऊल़ी आथी। 12हाम्हां छ़ेल़णअ तिन्‍नां संघै जुध अर तिन्‍नां मारी करै लुटणीं हाम्हां तिन्‍नें सोभ किम्मती च़िज़ा आप्पू लै। तिंयां लोग आसा देशा-देशा जैंदरा का गलामी का छ़ुटी बापस आऐ दै। तिंयां बस्सै तिंयां नगरी दी भिई ज़ुंण एकी ज़मानै पठ बरैबाद ती हुई दी। ऐबै आसा तिन्‍नां का खास्सै डागै-चैणैं अर किम्मती च़िज़ा। तिंयां बस्सै मांझ़ा-मांझ़ी तैहा ज़ैगा ज़हा बाता पृथूईए कई देश बपार करा।’ 13शेबा, ददान अर तरशीश नगरीए बपारी बी पुछ़णअ ताखा इहअ, ‘तंऐं किल्है आसा एतरी सैना झाल़ी दी? तंऐं इज़राईला संघै जुध छ़ेल़ी तिन्‍नों सुन्‍नअ, च़ंदी अर किम्मती च़िज़ा आप्पू लै लाई लुटी निंईं? ताह तिन्‍नें डागै-चैणैं अर सोभ च़िज़ा आप्पू लै निंणीं? ताह अह एतरी ज़ैदात पठी आप्पू लै निंणीं?’

14“मणछा, तूह लअ राज़ै गोगे बारै मेरअ समाद खोज़ी। तूह बोल कि हुंह परमेशर बिधाता बोला तेऊ लै इहअ, ‘ज़ांऊं मेरी परज़ा इज़राईली आपणैं देशे ज़ैगा निहंचै हणैं बस्सै दै, तेभै एछणी ताह तिन्‍नां संघै जुधा करने लहर। 15तूह एछणअ तिन्‍नां लै उतरा बाखा दूर देशा का आप्पू संघै बलबान सैना लई। तेरी सैना एछणी घोल़ै प्रैंदै शुंआर हई अर सह सैना हणीं खास्सी। 16ताह पल़णअ मेरी परज़ा इज़राईली लै ढिश-बागरी ज़िहै तिन्‍नें सारै देशै चुटी। गोग, ज़ेभै अह बगत एछे, तूह छ़ाडणअ मुंह यहूदा मुल्खा संघै जुधा लै। ज़ुंण मुंह ताह करै करनअ, तेता करै जाणअ सोभी देशा का शुझुई कि हुंह आसा पबित्र। तिन्‍नां का शुझणअ कि मंऐं ताल्है किज़ै किअ।’”

17परमेशर बिधाता बोलअ इहअ, “गोग, तूह आसा सह ई ज़सरै बारै मंऐं पैहलकै ज़मानै आपणैं दासा का खोज़ी त हेरअ द ज़ुंण इज़राईली जैंदरी मेरै गूर आसा तै। तिंयां रहै कई साला तैणीं इना गल्‍ला खोज़दै लागी कि आजू हणअ इहअ कि गोग नाओंए एकी राज़ै छ़ेल़णअ इज़राईले आद-लुआदा संघै जुध।”

गोग राज़ै लै परमेशर सज़ा

18परमेशर बिधाता बोलअ इहअ, “ज़ेभै गोग राज़ै इज़राईला संघै जुध छ़ेल़णअ, तेभै हणअ मेरअ कोप प्रगट। 19मंऐं डाही अह ज़बान दैई कि मेरै आगी ज़िहै रोश्श करै हणीं तैहा धैल़ी इज़राईल देशै बडी भारी खास्सी ज़ाज़री। 20ज़ांऊं हुंह प्रगट हणअ, सोभी ज़ीबा अर मणछा छ़ुटणअ डरै दर्छ़णअ। समुंदरे म्हाछ़ली, सरगै डैऊंदै च़ेल्‍लू-पखीरू, बणें ज़ीब, धरती दी हांढणै-फिरनैं आल़ै होछ़ै-होछ़ै ज़ीब लागणै डरै काम्बदै। बडी-बडी धारा बडै-बडै पर्बत अर नगरी फेर बडै-बडै गहल़ ढुल़णै धरना लै।”#होश. 4:3 21परमेशर बिधाता बोलअ इहअ, “इज़राईल देशे धारा डरैऊंणअ मुंह गोग इहअ कि तेऊए सैना लागणीं आप्पू ई मांझ़ै एकी दुजै तलबारा करै मारदी। 22मुंह करनअ गोग राज़ैओ नसाफ, तेऊए सैना मरनी बमारी अर आप्पू मांझ़ै काट-मार करी। तिन्‍नां लै छ़ाडणीं मुंह ढिश-बागरी, सरगा का फुटणै तिन्‍नां लै पाणींए बादल़। तिन्‍नां लै बरशाऊंणै मुंह सरगा का बडै-बडै शरू अर गंधक, तिन्‍नां लै शोटणी मुंह बीज।#ईशा. 66:16 23सोभी देशा का रहैऊंणअ मुंह कि हुंह आसा पबित्र अर महान। तेखअ लागणअ तिन्‍नां का थोघ कि हुंह आसा बिधाता।”

Pilihan Saat Ini:

एजकेल 38: OSJ

Sorotan

Salin

Bandingkan

Ingin menyimpan sorotan di semua perangkat Anda? Daftar atau masuk

This work is licensed under Creative Commons Attribution-ShareAlike 4.0 License.

Pelajari Selebihnya Tentang बाघली सराज़ी बोली दी पबित्र शास्त्र

एजकेल 38

Ayat-ayat Alkitab Ternama dari
एजकेल 38

Alkitab:

Pahari, Kullu

Versi: बाघली सराज़ी बोली दी पबित्र शास्त्र - OSJ