एजकेल 30
30
बिधाता दैणीं मिसर देशा लै सज़ा
1बिधाता बोलअ मुल्है भिई इहअ, 2“मणछा, तूह खोज़ लोगा का ज़ोरै-ज़ोरै हाक्का पाई कि हुंह परमेशर बिधाता बोला तिन्नां लै इहअ,
‘मिसर देशे लोगो! हिक्का पटाक्की लाआ ज़ोरै-ज़ोरै लेरा! बनाश च़ाल्लअ हई!
3बनाशे धैल़ी गई पुजी! बिधाते सह धैल़ी गई एछी
ज़ेभै बनाशे घणैं बादल़ घोर्हनै, सह धैल़ी हणीं देशा-देशा लै आफ़त!
4तैहा धैल़ी हणअ मिसर देशा संघै घणअ जुध,
मिसर देशे धन-माया लुटणीं तिन्नें दुशमणा पठी,
खास्सै लोग पाणै तलबारा करै मारी।
तिन्नां करनअ सारै मिसर देशै बनाश अर
तिन्नें दशा भाल़ी लागणै कूश देशे लोग डरै काम्बदै।’
5“होरी देशे सैना ज़ुंण कूश, पुत, लूद, लिबिया, लिदिया अर अरब देशा का मिसर देशा बाखा जुध करदै हणैं आऐ दै, तिंयां बी पाणै तेऊ जुधा दी मारी। मेरी आपणीं परज़ा मांझ़ै बी ज़ुंणी मिसर देशा बाखा जुध करने करार हणीं किई दी, तिंयां बी मरनै।”
6बिधाता बोला इहअ, “उतरा बाखा मिगदोल नगरी उंधै दखणा बाखा सबेन नगरी तैणीं ज़ुंण बी मिसर देशे साथ दैणैं आल़ै हणैं, तिंयां पाणै जुधा दी सोभ मारी। मिसर देशो घमंड तेऊए सैना हणीं बरैबाद। अह गल्ल डाही मंऐं मालक बिधाता बोली। 7संसारै ज़ेतरै बी देशो उज़र हुअ, मिसर देश हणअ तिन्नां मांझ़ै सोभी का खास्सअ उज़र, एऊ देशे नगरी छ़ुटणीं सिधी पात्थरे डिंगरी। 8ज़ेभै मुंह मिसर देशे आग चैल़णीं अर तिन्नों साथ दैणैं आल़ै सोभ खतम करनै, तेभै लागणअ तिन्नां का थोघ कि हुंह आसा बिधाता।
9“ज़ेभै मिसर देशो बनाश हई जाणअ, तेभै छ़ाडणैं मुंह समुंदरे ज़हाज़ा दी कूश देशा लै समाद लई दूत। तिन्नां दूता पाणीं तिन्नां कूशी लै डअर ज़ुंण आपणैं घअरै निहंचै आसा रहै दै। सह धैल़ी आसा एछणैं आल़ी!”
10परमेशर बिधाता बोलअ इहअ, “मुंह दैणअ बाबेल देशे राज़ै नबूकदनेसरा का मिसर देशे सैनो बनाश करनै। 11बाबेल देशे राज़ै अर तेऊए सैना एछणअ सारै मिसर देशै उज़र करदै। तिंयां आसा सोभी का नर्दैई। तिन्नां पाणै मिसर देशे लोग तलबारा करै मारी अर सारै देशै हणीं ल्हासा ई ल्हासा पल़ी दी। 12नील नदीओ पाणीं शकेऊणअ मुंह पठी। सारी मिसर देशे ज़ैगा दी दैणअ मुंह कदुष्ट लोगा कबज़अ करनै। परदेसी करनअ सारै देशै हर च़िज़ा बरैबाद। अह गल्ल डाही मंऐं बिधाता बोली।”
13परमेशर बिधाता बोलअ इहअ, “मुंह करनी सोभ देअए मुहुर्ती खतम, तिंयां काढणीं मुंह नोप नगरी का बागै। मिसर देशै राज़ करनै आल़अ निं कोह रहणअ, मुंह पाणीं मिसर देशे लोगा जैंदरी खास्सी डअर। 14मिसर देशो दखणा बाखो पत्रोस मुल्ख करनअ मुंह पठ शुन्नअ अर उतरा बाखा सोआन नगरी चैल़णीं मुंह आग। मिसर देशे राज़धानी तेबेस नगरी लै दैणीं मुंह सज़ा। 15मिसर देशे सोभी का पाक्कै गहल़ा आल़ी सीन नगरी लै बी पल़णअ मेरअ कोप। राज़धानी तेबेस नगरीए बडी सैना करनी मुंह खतम। 16सारअ मिसर देश करनअ मुंह आगी जैंदरी दहई खतम। सीन नगरी उझ़णीं खास्सी दाह। तेबेस नगरी पाणीं दुशमणा ढोल़ी। नोप नगरीए लोगा हणअ धैल़ फिकर पल़अ द। 17ओन अर पिबसेत नगरीए खारकै मणछ मरनै जुधा दी। तिन्नें बेटल़ी करनी परदेसी लोगा कैद संघा डाहणीं गलाम बणाईं। 18तपनेस नगरी लै हणीं सह धैल़ी खास्सी न्हैरी ज़ेभै मुंह मिसर देशो राज़ अर तिन्नों ज़ोर खतम करनअ ज़ेतो तिन्नां घमंड आसा त। मिसर सारै देशै घोर्हनै काल़ै घणैं बादल़ अर मिसर देशे सोभी नगरीए लोग निंणै दुशमणा कैद करी गलामी लै। 19ज़ांऊं मुंह मिसर देशा लै एही सज़ा दैणी, तेखअ लागणअ तिन्नां मिसरी का थोघ कि हुंह आसा बिधाता।”
मिसर देशे राज़ैओ बल खतम करनअ
20यहूदा मुल्खे राज़ै गई ती बाबेल देशे गलामी निंईं गैर्हूई साल लागी। तैहा साला साता च़ैत्रै पुजअ मुंह सेटा भिई बिधातो समाद। 21बिधाता बोलअ इहअ, “मणछा, मंऐं किअ मिसर देशे माहा राज़ैओ ज़ोर खतम। सह आसा हुंह ज़ुंणी तेऊए बाह पाई चोल़ी। तैहा निं कोह शाक-पांझ़ बान्हीं करै बी ज़ोल़ी सकदअ। सह निं ऐबै कधि जुधा करना लै तलबार ढाकी सकदअ।”
22परमेशर बिधाता बोला इहअ, “ऐबै हुअ हुंह मिसर देशे माहा राज़ैओ दुशमण। ऐबै लाई मंऐं तेऊए दुजी बाह बी चोल़ी ज़ेथ अज़ी ज़ोर आसा! सह करनअ दुही बाझ़ी एही अर तेखअ निं जुधा करनै जोगी रहणअ ई आथी। 23मिसर देशे लोग छिंगणैं मुंह संसारै देशा-देशा जैंदरी। 24बाबेल देशे राज़ै लै दैणअ मुंह खास्सअ बल कि सह मुंह बाखा जुध करे। पर मिसर देशो माहा राज़अ करनअ मुंह बाख कमज़ोर। बाबेल देशे राज़ै दैणैं तेऊ लै इहै ज़खम कि तेऊ दैणीं तैहा दाहे झोशा दी तिधी ज़िक्की संघा मरनअ। 25हाँ, मुंह दैणअ बाबेल देशे राज़ै लै खास्सअ बल। मिसर देशो माहा राज़अ करनअ मुंह बाख दुबल़अ। बाबेल देशे राज़ै लै दैणअ मुंह बल कि सह मुंह बाखा जुध करे। तेऊ बला करै करनअ तेऊ मिसर देशा संघै मकाबलअ। तेखअ लागणअ सोभी का थोघ कि हुंह आसा बिधाता। 26मुंह छिंगणैं मिसर देशे लोग सारै संसारै। तेखअ लागणअ तिन्नां मिसरी का थोघ कि हुंह आसा बिधाता।”
Pilihan Saat Ini:
एजकेल 30: OSJ
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
This work is licensed under Creative Commons Attribution-ShareAlike 4.0 License.