एजकेल 19
19
शोगे गिह
1बिधाता बोलअ मुल्है कि इज़राईले सैणैं लै बोल शोगे गिह:
2“इज़राईली कार-करिंदैओ! थारी ईज भाल़ केही सिहणीं ज़ेही आसा ती!
सिह हआ तै तैहा फेर अर तिन्नां जैंदरी धाचा-पाल़ा ती सह आपणैं बच्च़ै।
3तैहा सखाऊअ आपणैं बच्च़ै मांझ़ै एकी का बणें ज़ीबो शकार करनअ,
ज़ांऊं सह सिह बडअ हुअ, सह लागअ मणछा खांदअ।
4देशा-देशे लोगै शूणअ तेऊए बारै, तिन्नैं डाही तेऊ ढाकणा लै डुघी खात्ती खण्हीं,
ज़ांऊं सह तिन्नैं ढाकअ, तिन्नैं लागी तेऊ लै नकेल
संघा निंयं सह मिसर देशा लै।
5तेऊ सिहे ईज रही तेऊ न्हैल़ी लागी कि सह फिरनअ बापस,
ज़ांऊं तेऊए बापस फिरनें आशा ई निं रही,
तेखअ धाचअ तैहा आपणैं बच्च़ै मांझ़ै एक होर सिह।
6बडअ हई लागअ सह सिह आपणैं छ़ुंढे होरी सिहा संघै हांढदअ-फिरदअ,
तेऊ शिखल़अ तिन्नां का बणें ज़ीबो शकार करनअ अर मणछ खाणैं।
7सह पल़अ मणछे घअरै चुटी अर तेऊ किई तिन्नें नगरी बरैबाद,
तेऊ सिहे क्रुंगा शूणीं छ़ुटा त यहूदा देशै लोगा का दर्छ़णअ।
8तेखअ हुऐ देशा-देशे लोग तेऊए मकाबलै करना लै कठा,
फेरा-फेर डाहै सोभी तेऊ ढाकणा लै ज़ज़ाल़ छ़ैई।
सह सिह शाचअ डुघी खात्ती प्रैंदै छ़ैऐ दै तिन्नें ज़ज़ाल़ा दी।
9तिन्नें लाई तेऊ लै नकेल संघा निंयं सह बाबेल देशे राज़ै सेटा लै।
सह डाहअ तिधी तिन्नैं पिंज़णा भितरी कैद करी अर बागै डाहै पहरी लाई,
ताकि तेऊए क्रुंगा इज़राईले धारा कधि निं शुण्हिंए।
10इज़राईलीओ, थारी ईज थिई गाडे बाढै लाई दी दाखे बेला ज़ेही,
तेथ तै घणैं पाच अर खास्सै फल़ लागै दै
किल्हैकि तैहा बेला लै थिअ बतेर्हअ पाणीं।
11तेथ बेला दी आसा ती मोट्टी-मोट्टी शाण्हीं लागी दी,
तिंयां ती राज़े छ़ल़ी ज़ेही अर बेल ती उझै ई लागी दी बझ़दी।
तैहा बेले शाण्हींओ ताल त उझै सोभी का उछ़टअ कि
सह घणैं पाचा आल़ी लाम्मी बेल शुझिआ ती सोभी का।
12पर दुशमणै पाई रोश्शै सह बेल गोधी का पेच़ी,
तेथ लागी पुर्बा दिशा बाखा तात्ती बागरी संघा मछैंईं सह पठ;
तेते मोट्टी-मोट्टी शाण्हीं पाई चोल़ी संघा पाई आगी दी दहई।
13ऐबै डाही सह बेल बाबेल देशै रेगीस्तानै शुक्की ज़ैगा रोही,
ज़ेथ पाणीं ई निं हंदअ।
14तैहा बेले मोट्टी डैंढी का शाची सारी शाण्हीं दी आग,
अर तैहा आगी किई शाण्हीं अर तेते फल़ दहई खतम।
ऐबै निं तिन्नां शाण्हीं दी किछ़ै बल रहअ,
अर तेता का निं ऐबै राज़ेए छ़ल़ी बणी सकदी।”
अह आसा शोगे गिह अह गिह बोल़णीं सदा।
Pilihan Saat Ini:
एजकेल 19: OSJ
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
This work is licensed under Creative Commons Attribution-ShareAlike 4.0 License.