शधाणूं 22
22
खास्सै मणछे झाल़ै लै पल़सीओ ज़बाब
1“भाईओ, अर यहूदी सैणैंओ, मेरअ ज़बाब शूणां, ज़ुंण मंऐं ऐबै तम्हां सम्हनै लाअ बोली।”
2तिंयां इहअ शूणीं कि अह आसा लागअ द हाम्हां संघै इब्रानी दी बोल्दअ, तिंयां हुऐ होर बी च़ुप्पी। तेखअ बोलअ पल़सी,
3“हुंह आसा यहूदी मणछ, मेरअ ज़ल्म आसा हुअ द किलकिआ मुल्खै तरसुस नगरी, पर ऐहा नगरी गमलिएल गूरूए च़रणैं लई मंऐं शिक्षा, अर दादा-बाबे बधान आसा मुखा राम्बल़ै करै सखाऊऐ दै। हुंह मना त तिन्नां सोभी गल्ला किल्हैकि हुंह च़ाहा त परमेशरो हुकम मनणअ, ज़िहै तम्हैं आझ़ बी आसा मंदै लागै दै।
4“मंऐं दैनअ मर्ध अर बेटल़ी सोभी कैद करी एऊ पंथे विश्वासी मणछा लै खास्सअ कष्ट अर इना मांझ़ै कई पाऐ तै मंऐं मारी बी। 5मेरी ऐहा गल्ले आसा माहा प्रोहत अर सोभी सैणैं माहा सभा शाजत कि तिन्नां मांझ़ै कई यहूदी भाईए नाओंए च़िठी ढाकी थिअ हुंह दमिश्क नगरी लै डेऊंदअ लागअ द, कि तिधी बी ज़ुंण बी मसीही होए, तिंयां आणनैं कैद करी एरुशलेम नगरी लै ताकि तिन्नां लै सज़ा दैई सके।
आपणैं दिला बदल़णें बारै खोज़णअ
(शधाणूं 9:1-19; 26:12-18)
6“ज़ांऊं हुंह हांढदी-हांढदी दमिश्क नगरी नेल़ पुजअ, इहअ हुअ खरै दपहरो बगत त अर हेरा-हेरी च़मकी सरगा का सुरज़ा का बी खास्सै झ़ामणा आल़ी बिज़ल़ी मुंह फेर। 7हुंह बधल़ुअ धरनीं, अर मंऐं शूणअ इहअ बैण, ‘हे शाऊल, ए शाऊल, तूह किल्है आसा मुंह दुखी करदअ लागअ द?’
“मंऐं पुछ़अ इहअ, ‘हे प्रभू तूह कुंण आसा?’
8“तेऊ दैनअ मुल्है ज़बाब, ‘हुंह आसा ईशू नासरी ज़हा तूह दुखी करदअ आसा लागअ द?’ 9मेरै तिन्नैं होरी साथी सह प्रैश्शअ, भाल़अ तिंयां बोल निं तिन्नें समझ़ा दी आऐ कि किज़ै बोलअ।
10“तेखअ बोलअ मंऐं, ‘हे प्रभू, तै हुंह किज़ै करूं?’
“प्रभू बोलअ मुखा इहअ, ‘खल़अ उझ़ू संघा डेऊ दमिश्क नगरी लै, ज़ुंण ताह आजू करनअ सह हेरनअ ताखा खोज़ी।’ 11ज़ांऊं हुंह तेऊ प्रैश्शे झ़ामणा करै कांणअ हुअ, हुंह पुजअ आपणैं तिन्नां साथीए हाथ ढाकी करै दमिश्क नगरी।
12“दमिश्क नगरी थिअ एक हनन्याह नाओं मणछ, सह आअ मुंह सेटा लै, सह थिअ परमेशरे डरा हेठै रहणैं आल़अ भगत अर यहूदी मणछे बधाना दी लिखी दी मना त सह हर गल्ला। दमिश्क रहणैं आल़ै सोभ यहूदी करा तै तेऊए इज़त। 13मुंह सेटा खल़्हुई करै तेऊ बोलअ, ‘भाई शाऊल, ताखा लोल़ी भिई आछी का शुझणअ लागअ’ अर तेभी खुल्ही मेरी आछी अर मुखा लागअ सह शुझदअ।
14“तेखअ बोलअ तेऊ, ‘म्हारै दादा-बाबे परमेशरै आसा तूह एते तैणीं छ़ांटअ द कि तूह एऊए मरज़ी ज़ाणें अर तूह तेऊ धर्मीं भाल़े, संघा तेऊए खाखा का निखल़ै दै बैण शुणें। 15किल्हैकि तूह हणअ तेऊ बाखा का सोभी मणछे सम्हनै तिन्नां गल्लो शाजत ज़ुंण तंऐं भाल़ी अर शूणीं दी आसा। 16ऐबै निं बल़ैग पाऐ, खल़अ उझ़ू, हुंह दैंऊं ताल्है डुबकी। मसीहा ईशू दी कर विश्वास ताकि परमेशर तेरै पाप माफ करे।’#जोए. 2:32
होरी ज़ाती मांझ़ै खुशीओ समाद खोज़णें बारै
17“ज़ांऊं हुंह भिई एरुशलेम नगरी एछी भबनै प्राथणां करदअ त लागअ द, हुंह पल़अ नर्तान। 18प्रभू बोलअ मेरै बारै इहअ, ‘एभी डेऊ एरुशलेम नगरी का किल्हैकि इधी निं तिन्नां तेरै बारै तेरी ईंयां गल्ला मनणी।’
19“पर मंऐं बोलअ, ‘हे प्रभू, तिन्नां का आसा थोघ कि हुंह तेरै विश्वासी लोगा किहै पाआ कैद खानै अर ज़ैगै-ज़ैगै सभागृहा किहै च़िक्का त। 20ज़धू तेरै शाजत स्तिफनुसा मारदै तै लागै दै, हुंह बी त तेभै तिधी खल़्हुअ द, अर ऐहा गल्ला दी त राज्ज़ी, अर तेऊ मारनै आल़ेए, झिकल़ै बी तै मुखा।’ 21पर प्रभू बोलअ मुखा, ‘पोर्ही डेऊ, किल्हैकि मुंह छ़ाडणअ तूह होरी ज़ाती सेटा दूर-दूर तैणीं।’”
22तिंयां लोग ऐहा गल्ला तैणीं, रहै शुणदै लागी पर ऐहा गल्ला शूणीं बोलअ तिन्नैं ज़ोरै-ज़ोरै लैल़ा लाई, “एऊ इहै मणछा पाआ मारी, एऊओ ज़िऊंदअ रहणअ निं ठीक आथी।” 23ज़ांऊं तिंयां लैल़ा लांदै झिकल़ै धेल़दै अर रोश्शै धूल़ै माट्टै झ़ैऊंदै लागै, 24सपाही दले सुबैदारै बोलअ, “एऊ निंयां गहल़ा लै, अर कोल़ै बाही करा पुछ़-ज़ाच़, ताकि मुखा बी लोल़ी थोघ लागअ कि ईंयां लोग किल्है आसा लागै दै एऊए खलाफ इहै लैल़ा लांदै।”
25ज़ांऊं पल़सी तिन्नैं राश्शी करै बान्हअ, तेखअ बोलअ पल़सी तेऊ सुबैदारा लै ज़ुंण तिधी खल़्हुअ द त, “अह कै ठीक आसा कि तम्हैं एकी रोमी मणछा लै, अर सह बी बाझ़ी दोशै च़िक्का कोल़ै करै?”
26सुबैदारै बोलअ इहअ शूणीं सपाही दले सरदारा का, “तंऐं अह कै आसा लाअ द करी? अह ता रोम. आसा।”
27तेखअ पुछ़अ सपाही दले सरदारै पल़सी सेटा डेऊई, “मुखा खोज़ कि तूह कै रोमी आसा?”
पल़सी बोलअ, “हाँ।”
28इहअ शूणीं बोलअ सपाही दले सरदारै, “मुंह आसा रोमी हणें पदबी खास्सै ढब्बै दैई भेटी दी!”
पल़सी बोलअ, “हुंह आसा हुऐ-ज़ल्मां ओर्ही रोमी।”
29तेखअ ज़ुंणी तेऊए पुछ़-ज़ाच़ ती लाई दी करी, तिंयां हटै तेभी तेऊ सेटा का दूर, अर दलो सरदार बी, इहअ थोघ लागी करै कि अह आसा रोमी, मंऐं आसा अह बान्हअ द, सह डरअ।
माहा सभा दी पल़सीए पेशी
30दुजै धैल़ै सह ठीक-ठीक थोघ करने च़ाहा दी कि यहूदी तेऊ लै किज़ै दोश लाआ, तेऊए शांघल़ी लोहै खोल्है, अर बडै प्रोहत अर सारी सभा लै दैनअ कठा हणैंओ हुकम अर पल़सी निंयं तिन्नैं उंधै माहा सभा लै संघा किअ सह तिन्नां सम्हनै खल़अ।
Pilihan Saat Ini:
शधाणूं 22: OSJ
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
This work is licensed under Creative Commons Attribution-ShareAlike 4.0 License.
