2 करिन्थी 10
10
पल़सीओ हक
1मुंह पल़सीए आसा तम्हां का धख अरज़, तम्हैं सोठा इहअ कि ज़ेभै हुंह तम्हां संघै हुअ, तेभै हआ हुंह तम्हां लै शरीफ अर भोल़अ। पर ज़ेभै हुंह तम्हां का दूर हुअ तेभै करा हुंह बडी काठी गल्ला! एभै बी आसा हुंह तम्हां सेटा का दूर, पर हुंह आसा मसीहा दी तिहअ ई मानदार अर झणैल़ू। 2मेरी आसा तम्हां का एही अरज़ कि ज़ेभै हुंह तम्हां सेटा लै एछूं तेभै निं लोल़ी मुंह तिन्नां लै काठै हई बोल़णअ पल़अ ज़ुंण मुल्है इहअ बोला कि एऊए ज़िन्दगी आसा संसारे मणछे साबै। ज़ेही मुखा आशा बी हआ कि हुंह आसा बोल्दअ काठअ।
3अह आसा सच्च़ी कि हाम्हैं आसा ऐहा देही दी एऊ संसारे पर हाम्हैं निं संसारे मणछा ज़िहै आपणैं दुशमणा संघै जुध करदै आथी। 4-5म्हारै जुधा करने अस्त्र-शस्त्र निं एऊ संसारे आथी, तेथ आसा परमेशरो महान बल, ज़ेता करै हर गहल़-कोट सका ढोल़ी। हाम्हैं निं बृथा अर शरेरी गल्ला मंदै, ज़ुंण परमेशरे बारै ज़ाणनै का रोक्का। हाम्हैं बोला तिन्नां मणछा लै मसीहा ईशू दी विश्वास करना लै ज़हा सोर-समझ़ हआ। 6ज़ेभै तम्हैं आप्पू मसीहे हर गल्ला मने तै हणैं हाम्हैं तिन्नां लै सज़ा दैणैं आल़ै ज़ुंण मसीहो हुकम नांईं मंदै।
7तम्हैं भाल़ा तिन्नां ई गल्ला ज़ुंण थारी आछी का शुझिआ। ज़ै कहा आप्पू दी भरोस्सअ आसा सह आसा मसीहो, सह ज़ाणैं इहअ बी कि ज़िहअ सह मसीहो आसा, तिहै ई आसा हाम्हैं बी मसीहे। 8किल्हैकि सह हक निं प्रभू मुल्है थारै विश्वासा कमज़ोर करना लै आथी दैनअ, पर सह आसा तम्हां पाक्कै विश्वासी बणाणां लै हाम्हां लै दैनअ द। ज़ै हुंह तेऊ हके बारै होर बी घमंड रहैऊ, तै निं हुंह एता करै शर्मिंदअ हणअ।
9एता बोला हुंह एते तैणीं कि ऐहा च़िठी करै निं लोल़ी हुंह तम्हां डरैऊंणै आल़अ हुअ। 10किल्हैकि तम्हां मांझ़ै बोला कई, “तेऊए च़िठी सोर समझ़ा दैणैं आल़ी अर असर करनै आल़ी, आसा पर मुंहां सम्हनै ज़ाण्हिंआं सह देही दी दुबल़अ अर गल्ला दी हल़कअ।”
11ज़ुंण इहअ बोला, सह डाहै इहअ समझ़ी कि ज़िहै पिठी पिछ़ू च़िठी दी म्हारै बैण आसा, तिहै ई हणैं थारै सम्हनै म्हारै काम बी।
12ज़ुंण लोग आपणीं सर्राफी आप्पै करा, हाम्हैं निं तिन्नां ज़िहअ हणैं अर तिन्नों मकाबलअ करने हिम्मत करदै। पर तिंयां निं किछ़ समझ़दै आथी, तिंयां बोला आप्पू लै आप्पै कि तिंयां आसा बधिया। तिंयां हआ एकी-दुजै भाल़ै लागै दै कि तिंयां होरी का राम्बल़ै आसा कि माल़ै। इहअ करै जाआ ज़ाण्हुंई कि तिंयां आसा ऐडै।
13ज़ुंण काम परमेशरै हाम्हां लै आसा दैनअ द तेते हदा बागै निं हाम्हां कधि घमंड करनअ, पर तैहा ई हदा तैणीं ज़ुंण परमेशरै आसा दैनी दी अर तेथ आसा गऐ दै तम्हैं बी एछी, अर हाम्हां करनअ तेते ई साबै घमंड बी 14ज़धू हाम्हैं तम्हां सेटा पुजै तै हाम्हैं निं हदा का आजू डेऊऐ ज़िधी तैणीं परमेशरै हाम्हां लै काम करना लै हद थिई डाही दी। तेऊ दैनअ हाम्हां लै थारअ मुल्ख अर हाम्हैं तै पैहलै मणछ ज़ुंणी करिन्थ नगरी पुजी तम्हां का मसीहो खुशीओ समाद खोज़अ।
15हाम्हैं निं आपणीं हदा का खास्सअ दुजे मैन्था दी घमंड करदै आथी, पर हाम्हां आसा आशा कि ज़िहअ-ज़िहअ थारअ विश्वास बढदअ रहणअ, तिहै-तिहै ई रहणैं हाम्हैं आपणीं हदे साबै तम्हां करै तम्हां ओरी-पोरी होर बी खास्सै मणछा सेटा खुशीए समादा पजैल़ै लागी, 16ताकि हाम्हैं थारी हदा का आजू दूर-दूर कई ज़ैगा डेऊई खुशीओ समाद खोज़ी सके। इहअ निं आथी कि हाम्हां करनअ दुजे हदा भितरी डेऊई बणै-बणाऐं कामां दी घमंड। 17पर ज़िहअ पबित्र शास्त्रा दी आसा लिखअ द,
“ज़ै कहा घमंड करनअ, सह करे सिधअ प्रभू दी।”#1 करि. 1:31; जेर. 9:24
18किल्हैकि ज़ुंण आपणीं बड़ैई आप्पै करा, सह निं किछ़ै हंदी, पर ज़सरी बड़ैई प्रभू करा सह ई शुझिआ परमेशरा का भलअ।
Pilihan Saat Ini:
2 करिन्थी 10: OSJ
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
This work is licensed under Creative Commons Attribution-ShareAlike 4.0 License.