1 करिन्थी 9
9
शधाणूंए हक अर ज़िम्मैंबारी
1हुंह आसा सोभ किछ़ करना लै आज़ाद ज़ेता हुंह च़ाहा, हुंबी आसा एक शधाणूं अर मंऐं आसा ईशू मसीहा आपणीं आछी भाल़अ द ज़ुंण म्हारअ प्रभू आसा। तम्हैं आसा मेरै तेऊ कामों फल ज़ुंण मुल्है प्रभू करना लै दैनअ। 2ज़ै लोग मुंह प्रभू ईशूओ शधाणूं नांईं समझ़े, तम्हां ता हुअ हुंह मनणअ। सह आसा हुंह ज़ुंण तम्हां तैणीं खुशीओ समाद पजैल़अ। प्रभू ईशू दी थारअ विश्वास आसा ऐहा गल्लो सबूत कि हुंह आसा शधाणूं।
3ज़ुंण मेरै शधाणूंए हके बारै सुआल पुछ़ा, तिन्नां लै आसा मेरअ अह ई ज़बाब। 4मुंह अर बरनबासा आसा शधाणूं हणें नातै तम्हां लै म्हारै कामां लै ढब्बै-धेल्लै मांगणैओ पूरअ हक। 5ज़िहै ईंयां होर शधाणूं, प्रभूए होर भाई-बैहणी अर पतरास आपणीं लाल़ी आप्पू संघै ओर्ही-पोर्ही निंयां, तिहअ आसा मुंह बी हक कि हुंह कहा विश्वासी शोहरी संघै बैह करी आप्पू संघा डाहे। 6हाम्हां बी आसा अह हक कि होरी शधाणूं ज़ेही आपणीं गरज़ा पूरी करना लै ढब्बै-धेल्लै भेटे अर हाम्हां बी निं तेता लै कामां करने ज़रुरत आथी।
7इहअ निं कोहै सपाही हंदअ ज़ुंण आप्पू लै आप्पै करा खर्च़अ। ज़ुंण मणछ दाखो बाग लाआ सह खाआ तेतो फल़ बी अर गुआल़ै डाहा गाऊई धाची करै तैहा का दुधे आशा बी।
8हुंह निं इना गल्ला मणछे साबै आथी लागअ द बोल्दअ, बधान बी बोला इहअ ई। 9किल्हैकि मोसा गूरे बधाना दी आसा लिखअ द, “खहल़ा काढणैं आल़ै बल्दा लै दैणअ खाणां लै बी तेता ई का।” परमेशर कै सिधअ बल्दे ई फिकर करा?#बधा. 25:4
10कि असली दी सह म्हारै बारै बोला? हाँ हाम्हां ई लै आसा लिखअ द, किल्हैकि खेचै हल़ा ज़ुंडणैं आल़अ ज़ुंडा किज़ू नां किज़ू आशा डाही, अर ज़ुंण नाज़ा मांडदअ खहल़ै फिरा तेऊ डाहणीं तैहा फसला का धख भाग भेटणें आशा बी।
11हाम्हैं खोज़अ तम्हां का परमेशरो समाद। ज़िहअ कुंण मणछ बऊआ तिहअ बऊअ हाम्हैं परमेशरो बैण तम्हां दी। तेही आसा अह म्हारअ हक कि तम्हैं म्हारी गरज़ा पूरी करना लै म्हारी मज़त करे।
12ज़िहअ तम्हैं तिन्नां होरी लै ढब्बै-धेल्ले मज़त करा ज़ुंण तम्हां सेटा एछी प्रच़ार करा, बरनबास अर मेरअ आसा मसीहा दी तिन्नां का बी खास्सअ हक किल्हैकि हाम्हैं तै तम्हां लै शधाणूं। पर हाम्हैं निं तम्हां म्हारी मज़त करना लै ज़ोर दैनअ ज़ेता हाम्हैं तम्हां का च़ाहा तै। पर हाम्हैं आसा सोभी गल्ला ज़िरना लै तैर ताकि हाम्हैं निं लोल़ी खुशीए समादा शुणना लै कहा लै अल़च़न हुऐ।
13तम्हां का आसा थोघ कि ज़ुंण भबनै च़ाकरी करा, तिंयां खाआ भबना ई का, अर ज़ुंण बेदीए च़ाकरी करा, तिंयां हआ तैहा बेदीए हकदार?#लेब. 6:16,26; बधा. 18:1-3
14इहअ ई आसा प्रभू बी बोलअ द कि ज़ुंण लोग खुशीओ समाद खोज़णैं आल़ै आसा तिन्नें ज़िऊंणें गरज़ा लोल़ी तिन्नां का पूरी हुई ज़ुंण खुशीओ समाद शूणां।
15पर मंऐं निं इना मांझ़ै किछ़ै हक तम्हां का मांगअ। हुंह निं एता, तै आथी लागअ द लिखदअ कि तम्हैं मुल्है एभै किज़ै करे। नां, एता का हणअ त मुल्है इहअ कि मुल्है मौत एछे! किल्हैकि मुंह निं ऐहा गल्ला दी घमंड करनै का रोक्की सकदअ कि मंऐं किई आपणीं हेर-सभाल़ आप्पै। 16ज़ै हुंह खुशीओ समाद खोज़ूं, अह निं मुल्है किछ़ै घमंडे गल्ल आथी, किल्हैकि अह ज़िम्मैंबारी आसा मुखा मसीहा सभाल़ी दी, ज़ै हुंह खुशीओ समाद निं खोज़ूं, तै आसा मुल्है आफ़त!
17किल्हैकि, ज़ै हुंह आपणीं मरज़ी दी करा, तै भेटा मुंह तेते मज़दूरी अर ज़ै आपणीं मरज़ी दी नांईं करदअ, तैबी आसा मुखा भढार सभाल़अ द। 18मेरी मज़दूरी कुंण ज़ण्हीं आसा? अह कि खुशीए समादा खोज़णा लै दैंऊं मसीहा खुशीओ समाद बाझ़ी मोलै, अह ई आसा मेरी मज़दूरी, हुंह सका बाझ़ी मज़दूरी करै बी खुशीओ समाद खोज़ी, ज़ै कि मुंह आसा हक कि हुंह सका आपणीं गरज़ा पूरी करना लै मज़त मांगी।
सोभिए च़ाकरी
19एतो मतलब हुअ इहअ कि लोग करा मेरी मज़त तै आसा हुंह तिन्नों गलाम, पर तज़ी बी बणअ हुंह सोभिओ गलाम ताकि हुंह तिन्नां मसीहा लै आणी सकूं। 20तैही ज़ेभै हुंह यहूदी संघै रहा, हुंह ज़िऊआ तिन्नां जैंदरी यहूदी ज़ेही ज़िन्दगी ताकि तिन्नां मसीहा दी आणी सके। ज़ेभै हुंह तिन्नां संघै त ज़ुंण यहूदी बधान मना मंऐं बी ज़िऊई बधाना दी रही ज़िन्दगी। एही निं मुंह बधाना मनणे ज़रुरत आथी पर मंऐं किअ अह एते तैणीं कि ज़ुंण बधाने साबै ज़िन्दगी काटा हुंह तिन्नां मसीहा लै आणी सकूं।
21ठीक इहअ ई ज़ेभै मंऐं होरी ज़ाती मांझ़ै काम किअ, मंऐं ज़िऊई आपणीं ज़िन्दगी होरी ज़ातीए मणछा ज़ेही ज़ुंण यहूदी बधाना निं मंदै ताकि हुंह तिन्नां बी मसीहा लै ज़िती सकूं। एतो मतलब निं अह आथी कि हुंह निं परमेशरे बधाना मंदअ किल्हैकि हुंह मना हर बगत मसीहो हुकम।
22ज़ेभै हुंह तिन्नां मणछा मांझ़ै त ज़ुंण विश्वासा दी दुबल़ै आसा, मंऐं ज़िऊई तिन्नां ई ज़ेही ज़िन्दगी ज़िहै तिंयां आसा ताकि हुंह तिन्नां मसीहा दी आजू बझ़णा लै मज़त करी सकूं। हुंह बणअ सोभी मणछा लै सोभ किछ़, कि किछ़ू बी तरिकै करै हुंह कई लोगा बच़ाऊई सकूं। 23हुंह करा इना सोभी गल्ला मसीहे खुशीए समादा सारै दी पजैल़णां लै। ताकि हुंबी तैहा बर्गता दी साझ़ू हई सकूं ज़ुंण खुशीए समादा करै भेटणीं।
मसीही ठुहर
24तम्हां का आसा थोघ कि ज़ेभै खास्सै ठुहर्नै आल़ै दहल़ै ठुहर दैणें मकाबलै लै ठुर्हा, तिन्नां मांझ़ै भेटा नांम सिधी एकी ई मणछा ज़ुंण ज़िता? तम्हैं ठुर्हा तिहै ई ताकि नांम ज़िती सके। 25सोभ जोधै करा सोभी च़िज़ो फरेज़, ताकि तिंयां तेऊ मछैणैं आल़ै मुगटा ज़िती सके, पर हाम्हैं करा तेऊ मुगटे तैणीं मैन्थ ज़ुंण सदा लै रहा। 26तैही ज़िऊआ हुंह आपणीं विश्वासा दी ज़िन्दगी नशाणैं बाखा ठुर्ही। एक कुश्ती लल़णैं आल़अ जोधअ निं बागरी दी धमुक्कै बाहंदअ पर सह बाहा आप्पू संघै दुजै जोधै लै। तेही ज़िऊआ हुंह आपणीं ज़िन्दगी खास मकसद डाही।
27पर हुंह करा आपणीं देही आपणैं बशै ताकि किधी इहअ निं हआ कि हुंह होरी लै ज्ञैन खोज़ूं अर आप्पू होए हुंह बृथा।
Pilihan Saat Ini:
1 करिन्थी 9: OSJ
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
This work is licensed under Creative Commons Attribution-ShareAlike 4.0 License.