Mateo 4
4
Kwesekwa kwa Yesu
(Mako 1:12-13; Luka 4:1-13)
1 #
Hebe 2:18; 4:15 Ponkapo Mupashi wamutwajile Yesu mungye amba bamweseke kwi Diabola. 2Kabiji pa kuzhikilwa na nzala moba makumi ana mute ne bufuku, kepo aumvwine nzala. 3Ne Diabola pa kwiya wamwambijile amba, “Umvwe mwi Mwana Lesa, ambilai ano mabwe aluke ke bashinkwa.”
4 #
Mpitu 8:3
Kumvwa Yesu amba, “Kyanembwa amba, muntu kechi ukamwena bumi ku shinkwa yenka ne, poso ku byambo byonse bifuma mu kanwa ka Lesa.”
5Ponkapo Diabola wamutwajile Yesu ku muzhi wazhila, kabiji wamubiikile peulu ya jikonka ja nzubo ya Lesa, 6#Sala 91:11,12 ne kumwambila amba, “Umvwe wi Mwana Lesa, witaye obewa mwine panshi, mambo kyanembwa amba,
“Ukakambizha bamalaika banji, na mambo a obewa
amba bakakusenda mu maboko abo,
kuchiina amba waketuntula kuulu kobe ku jibwe.”
7 #
Mpitu 6:16
Kumvwa Yesu wamwambijile amba, “Kabiji kyanembwa amba, kechi umweseke Nkambo Lesa wobe ne.”
8Ponkapotu Diabola wamutwajile ku mutumba walepesha bingi, ne kumumwesha bufumu bonse bwa pano pantanda, ne lukumo lwabo. 9Ne kumwambila amba, “Bino byonse nsakwimupa, umvwe mundambile ne kumpopwela.”
10 #
Mpitu 6:13
Kumvwa Yesu wamwambijile amba, “Fumako, Satana! Mambo kyanembwa amba,” “Ukamupopwela Nkambo Lesa wobe ne kumwingijila aye yenka.”
11Ponkapo Diabola wamulekele; kabiji bamalaika baishile ke bamwingijile.
Yesu byo atatwile mwingilo wanji mu Ngalilea
(Mako 1:14-15; Luka 4:14-15)
12 #
Mat 14:3; Mako 6:17; Lu 3:19,20 Kabiji Yesu pakumvwa amba, Yoano uji mu kaleya, Yesu wafumineko ne kuya ku Ngalilea. 13#Yoa 2:12Ne pa kufuma mu Nazala, waishile na kwikala mu Kapenama uji ku kizhiba, mu kyalo kya Zebuluna ne Nafitali. 14Mukufikizha akya kya ambile ngauzhi Isaya amba,
15 #
Isa 9:1,2 “Kyalo kya Zebuluna ne kya Nafitali,
mukwakwa wa ku kalunga ka mema, bushiya bwa Yodano,
Ngalilea wa bantu ba mitundu yapusanapusana!
16Bantu bekala mu mfishi
bakamona kyeya kikatampe.
Kabiji kwi aba baikala mu kyalo ne mu kimvule kya lufu,
kyeya kikebasamina.”
17 #
Mat 3:2
Kufuma pa kyokya kimye Yesu watatwile kusapwila amba, “Lapilai, mambo bufumu bwa mwiulu bwafwenya ke pepi!”
Yesu byo ebechile baana banji babwanga batanshi
(Mako 1:16-20; Luka 5:1-11)
18Kabiji Yesu byo a sezhezhenga kizhiba kya Ngalilea, wamwene baana bankazhi babiji, Shimona yebateela amba Petelo, ne Andeleo mulongo wanji, kasa bata bukonde mu mema, mambo baingilanga mwingilo wa kukwata masabi. 19Ne aye wibambijile amba, “Ndondelai, kabiji nkemwalula ke bamwingilo wa kukwata bantu.” 20Kabiji ponkapotu bashiile makonde abo ke bamulondele.
21Byo a endeleko pacheche wamwene baana bankazhi bakwabo babiji, Yakoba mwana Zebede, ne Yoano mulongo wanji, bajinga pamo mu bwato ne shabo Zebede, na kununga makonde abo. Kabiji ne abo wibechile, 22ponkapotu ne abo nabo bashiile bwato ne shabo, ke bamulondele.
Yesu byo a ingijile mu Ngalilea
(Luka 6:17-19)
23 #
Mat 9:35; Mako 1:39 Kabiji Yesu wapitang'enenga monse mu Ngalilea, na kufunjisha mu mashinagoga abo, kasa asapwila Mambo Awama a bufumu, ne kubuka misango yonse ya bikola ne ya bulema mu bantu. 24Kabiji ne nkuwa yanji yakumbene monse mu Silya, kabiji bamuletejile bonse bakolwa, bajinga na bikola ne misongo ya misango ne misango, ne banonkelwe ku bademona, ne ba kishimu ne ba kalepu, ne abo nabo wibabukile. 25Kabiji kwa mulondejilenga mabumba akatampe afumine mu Ngalilea ne mu Ndekapolisa, ne mu Yelusalema, ne mu Yudea, ne ku musela wa Yodano.
Pilihan Saat Ini:
Mateo 4: KNTP
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
The Kaonde New Testament © The Bible Society of Zambia, 2019.