Mateo 2
2
Kwiya kwa Bamaana
1Kabiji Yesu, byo asemenwe mu Betelema wa mu Yudea mu myaka ya Heloda mfumu, ponkapo Bamaana ba ku musela basolomokele ku Yelusalema 2ne kwipuzha amba, “Lelo uji kwepi wasemwa Mfumu wa Bayudea? Mambo kabangabanga kanji twikamwene ku musela, kyo twaishila na kumupopwela.”
3Ne Heloda mfumu pakumvwa, waubile kijikila, ne bonse bamu Yelusalema pamo. 4Kabiji pa kwibakonkanya bang'anga bakatampe ne banembeshi, wibepwizhe amba, “Nanchi Kilishitu ukasemwa kwepi?”
5Kepo abo bamukumbwile amba, “Mu Betelema wa mu Yudea, byonka byanembele ngauzhi amba,”
6 #
Mika 5:2
“Kabiji obewa Betelema wa mu kyalo kya Yuda,
kechi wi mucheche wa mu binemanga bya mu Yuda ne.
Mambo monka mobe mukafuma mfumu,
ye ukekala kafunga wa bantu bami bena Isalela.”
7Ponkapo Heloda wibechile kumbaji aba Bamaana, ne kumvwa waumvwine kine kimye kyo kamwekejilemo kabangabanga. 8Kepo ebatumine ku Betelema amba, “Yainga, kamukebeshai bulongo ao mwana, kabiji pa kumutaana mukambuule, ne amiwa nkayeko nkamupopwele.”
9Ne abo, pa kumumvwa mfumu, baimene kebaye kabiji ne aka kabangabanga, ko bamwene ku musela, ke kebatangijileko, poso byo kafikile pajinga mwana kaimene peulu. 10Ponkapo pa kwikamona kabangabanga, basekejile na lusekelo lukatampe lwine! 11Kabiji pa kutwela mu nzubo bamwene Mwana kasa aji ne inanji Maliya, bamulambijile panshi ne kumupopwela. Ponkapo basolwele nsabo yabo ne kumupa bya bupetu, bya ngolode ne libona ne mola.
12Kabiji byo bebajimwine kwi Lesa mu kiloto amba, “Kechi mubwele kwi Heloda ne,” babwelele kwabo mu jishinda jikwabo.
Kunyemena kwa Yosefwa ne Maliya ne Mwana mu Ijipita
13Kabiji byo bafumineko, ponkapo malaika wa Nkambo wamwekele kwi Yosefwa mu kiloto ne kumwambila amba, “Buuka, utwale mwana ne inanji, unyemene mu Ijipita, ukekale monka poso nkakubuule, mambo Heloda ukakeba mwana amba, amwipaye.”
14Kabiji byo abuukile waimene bufuku wasendele Mwana ne inanji, ke baye ne kuya ku Ijipita, 15#Hos 11:1waikelenga monka poso byo afwile Heloda. Kufikizha akya kyo a ambile Nkambo mu kanwa ka ngauzhi wanji amba, “Mu Ijipita momo naichile Mwanami.”
Kwipayiwa kwa baana bamu Betelema kwi Heloda
16Kepo Heloda, pa kumona byo bamwendelekele ku Bamaana, wabuukile bingi bukaji. Ponkapo wakambiizhe kwibepaya baana ba bacheche bonse ba balume bamu Betelema, ne bamonse mumbaji, ba myaka ibiji, ne bakyangye kufikizha myaka ibiji monka mo aumvwijile mwaka ku Bamaana. 17Kepo kyafikile kya ambile Yelemiya, ngauzhi amba,
18 #
Yele 31:15
“Mu Lama mwaumvwanyikile jiwi
ja kujila majilo ne mabingo akatampe.
Lachela kasa ebajila baana banji,
ne kukana kumutekenesha pa muchima,
mambo baafwa.”
Kubwela kwa Yosefwa ne Maliya ne Mwana kufuma mu Ijipita
19Kabiji byo afwile Heloda, ponkapo malaika wa Nkambo wamwekele mu kiloto kwi Yosefwa mu Ijipita, 20amba, “Buuka, utwale mwana ne inanji, ubwele mu kyalo kya Isalela, mambo basakilenga kwipaya Mwana baafwa.”
21Ne pa kubuuka wasendele Mwana ne inanji, kubwela mu kyalo kya Isalela. 22Kabiji pakumvwa amba, Alakeleusa wamuswana shanji Heloda, walama kyalo kya Yudea, wachiine kuyako. Kabiji byo bamujimwine kwi Lesa mu kiloto, wasezhezhe ne kwiya mu kyalo kya Ngalilea 23#Mako 1:24; Lu 2:39; Yoa 1:45kabiji pa kubwela, waikajile mu muzhi yebatela amba Nazala, kufikizha kya ambile bangauzhi amba, “Bakamutela amba mwina Nazala.”
Pilihan Saat Ini:
Mateo 2: KNTP
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
The Kaonde New Testament © The Bible Society of Zambia, 2019.