Meko 22

1“Ana-a-asa na aanau, kwa mbĩthukĩĩsyei ngĩtetea vala mũĩ!” 2Yĩla meewie Vaũlo aineena namo kwa kĩthyomo kya Kĩevelania, nĩmongelangile kũvindya, nake ĩndĩ amea atĩĩ,

3 # Meko 5.34-39 “Nyie nĩ Mũyuti na wumo wakwa nĩ Taliso, ndũa ya kĩsio kya Silisia, ĩndĩ nĩeewe mũsyĩnĩ ũũ wa Yelũsalemu. Naĩ mũmanyĩw'a wa Ngamalieli na nĩnamanyĩiw'e kũatĩĩa mĩao ya aaũmae maitũ. Neenenganĩte ũthũkũminĩ wa Ngai o tondũ inyw'ĩ mũkwonekana ũmũnthĩ. 4#Meko 8.3; 26.9-11 Nĩnathĩnasya o na kũaa andũ ala maĩ ma ĩla Nzĩa Mwĩai woonanisye. Nĩnakwataa aũme na aka na kũmavingĩa yela. 5Mũthembi Mũnene na atumĩa onthe ma nzama ĩno nĩ ngũsĩ. Nĩmanengie mavalũa nĩtwaĩe andũ ma mbaitũ ala matwĩe Ndamasikũ, na nakwata nzĩa nĩthi kũu ngakwate andũ asu ma ĩla Nzĩa Mwĩai woonanisye, nĩmaete Yelũsalemu me ove masilĩlwe.

Vaũlo Aielesya ũndũ Watw'ĩkie Mũĩkĩĩi wa Yesũ

(Meko 9.1-19; 26.12-18)

6“Vaa kĩndũ saa sita sya mũthenya nĩendete ngilĩlye kũvika Ndamasikũ, kyeni kingĩ kuma ĩtunĩ nĩkyamulĩkile kwa kĩthũlũmũko kĩnthyũlũlũkĩte ngalĩko syonthe. 7Nĩnavalũkile nthĩ na neew'a wasya ũũmbĩa, ‘Saũlo, Saũlo! Nĩkĩ ũũnthĩny'a?’ 8Nakwa nakũlya, ‘Nue ũũ Mwĩai?’ Nake asũngĩa, ‘Ninyie Yesũ kuma Nasaleti ũla we ũũthĩny'a.’ 9Andũ ala maĩ nakwa nĩmoonie kyeni kĩu, ĩndĩ mayaaĩw'a wasya wa mũndũ ũla waneenaa nakwa. 10Nĩvo ĩndĩ nakũlilye, ‘Nayu nĩĩka ata, Mwĩai?’ Nake Mwĩai ambĩa, ‘Ũkĩla ũthi Ndamasikũ, na kũu nũũthi kũtavw'a kyonthe kĩla ũvangĩĩwe kwĩka.’ 11Nĩnaekie kwona nthĩ nũndũ wa kyeni kĩu kyaĩ kĩtisu mũno, na kwoou nakwatwa kw'oko nĩ andũ ala naĩ namo mandwaa Ndamasikũ.

12“Kũu kwaĩ mũndũ ũmwe weetawa Anania, mũndũ waĩ na kĩkĩo kya Ngai, waatĩĩaa Mĩao ya Mwose, na wanengetwe ndaĩa mũno nĩ Ayuti onthe ala matwĩe Ndamasikũ. 13Mũndũ ũsu nĩwookie vala nĩĩ na aũngama vakuvĩ nakwa ambĩa atĩĩ, ‘Mwana-a-asa Saũlo, ambĩĩa kwona nthĩ ĩngĩ!’ Saanĩ o ũsu nĩnambĩĩie kwona nthĩ ĩngĩ na namwona o nake. 14Nĩvo ĩndĩ Anania wambĩie atĩĩ, ‘Ngai wa aaũmae maitũ nũkũnyuvĩte ũmanye kwenda kwake, ũmwone Ũla Mũlũngalu na ũimwĩw'a we mwene aineena naku. 15Ũkamũkũsĩĩa kwa andũ onthe ĩũlũ wa kĩla wonete na wĩw'ĩte. 16Kwoou yu weteelete kyaũ? Ũkĩla ũvatiswe na kũvetewa naĩ syaku kwa kwĩkaĩla ĩsyĩtwa ya Mwĩai.’

Wĩto wa Vaũlo Akatavany'e kwa Andũ-ma-mbaĩ-ingĩ

17“Ĩtina wa kũsyoka Yelũsalemu, nĩnakililye ngĩvoya Ĩkalũnĩ nakwatwa nĩ too mwingĩ na neethĩwa na woni. 18Nĩnoonie Mwĩai aineena nakwa ambĩa atĩĩ, ‘Ĩkalaate wume vaa Yelũsalemu mĩtũkĩ nũndũ andũ mavo mayĩĩtĩkĩla ũkũsĩ waku ĩũlũ wakwa.’ 19Nakwa namwĩa, ‘Mwĩai, mo ene nĩmesĩ nesa kana nĩnaendaa kĩla nyũmbanĩ ya Ayuti ya kũthaithĩa na kũmbanĩa, ngĩkwata na kũvũa andũ ala makũĩkĩĩte. 20#Meko 7.58 O na nomesĩ kana yĩla ngũsĩ yaku Sitivini wooaawa, nyie mwene naĩ vau ngĩtĩkĩlana na kũawa kwake, na ninyie nakwatĩie ala mamũaa ngũa.’ 21Nĩvo ĩndĩ Mwĩai wambĩie, ‘Enda yu, nũndũ nĩkũtũma kũndũ kũasa kwa Andũ-ma-mbaĩ-ingĩ.’ ”

22Kũka kũvika vau, andũ asu nĩmamwĩthukĩĩisye Vaũlo, ĩndĩ amina kũneena ũu, malonzany'a na wasya mũnene mayasya atĩĩ, “Mũndũ wa mũthemba ũũ nĩavetangwe ĩũlũ wa nthĩ! Ndaĩlĩte kwĩthĩwa thayũ!” 23Maendee na kũlonzany'a na kũvyũlya ngũa syoo, o vamwe na kwĩkya mũthanga na ĩũlũ, 24ũla mũnene wa asikalĩ ma Loma nĩwaumisye mwĩao Vaũlo alikw'e ũla mwakonĩ mũlũmu, na aivũwa atavany'e nĩkĩ andũ mamũlonzela mũthemba ũsu. 25Mamina kũmwovany'a nĩ kana mambĩĩe kũmũvũa, Vaũlo nĩwakũlilye mũnene ũmwe wa asikalĩ ĩana waũngeme vau atĩĩ, “Nĩ waĩlu kwenyu kũvũa mũndũ Mũlomi atambĩte kũtw'ĩĩwa ĩvĩtyo?”

26Mũnene ũsu wa asikalĩ ĩana eew'a ũu, nĩwaendie vala ve ũla mũnene wa asikalĩ ngili amwĩa atĩĩ, “Wĩĩka ata yu? Mũndũ ũya nĩ Mũlomi!”

27Mũnene ũsu wa asikalĩ ngili nĩwaendie vala ve Vaũlo amwĩa atĩĩ, “Kwa ndavye, we wĩ Mũlomi?”

Nake amũsũngĩa, “Ĩĩ, nĩ Mũlomi.”

28Mũnene ũsu amwĩa atĩĩ, “Nyie naĩvie mbesa mbingĩ mũno nĩtw'ĩke Mũlomi.”

Ĩndĩ Vaũlo amwĩa, “Nyie nĩ Mũlomi kwa kũsyawa!”

29O vau kwa vau ala andũ maĩ vakuvĩ kũmũkũlya makũlyo nĩmaekanie nake na mathi, nake ũla mũnene wa asikalĩ ngili o nake nĩwakwatiwe nĩ w'ĩa ĩtina wa kũmanya kana Vaũlo nĩ Mũlomi, nake eĩ amwovete na nyololo.

Vaũlo e Mbee wa Nzama

30Ũnĩ ũsu, mũnene ũsu wa asikalĩ nĩwamũthaisye Vaũlo, na eeta athembi anene na nzama yonthe mombane, nũndũ nĩwendaa mũno kũmanya nĩ kyaũ kĩla Ayuti mamũsikatĩe Vaũlo. Nĩvo ĩndĩ waetie Vaũlo amwia mbee woo.

Pilihan Saat Ini:

Meko 22: KAMBA

Sorotan

Salin