ले़बि 2
2
पोगुगे़न् कुजा सिदुङ्जभा
1“‘कुभा मनाःल्ले़ यहवे दाङ्बे़ल्ले़ कुलागि कुभा पोगुगे़न् कुजा सिदुङ्जभा तोःन्दुने़भग्र खे़ल्ले़ तोःन्दुबा सिदुङ्जभान् चुन्जुम्बा फेॽरुम्मिल्ले़न् पोङ्मा पोङ्ॽ॥ खुने़ॽ खे़ल्ले़ कुसम्धाङ् निःङ्गेल्ले़ ले़ःक्तुआङ् सुक्पा याक्तुर॥ 2खे़ब्याङ् खे़ल्ले़ हारुने़ल्ले़ कुस्सा निङ्वाॽफुसाम्बाहाॽओ खे़न् तारुर॥ खे़न्लाम्बा निङ्वाॽफुसाम्बाल्ले़ हुक्पुप्थिक् काङ्गाङ्बा चुन्जुम्बा फेॽरुम् नु निःङ्गेन् के़रे़क् सुक्पान्नु सोरिक् लःत्तु लारुर॥ हे़क्क्याङ् निङ्वाॽफुसाम्बाल्ले़ यहवे दाङ्बे़ल्ले़ खे़न् कुसिराॽ के़धाङ्बा कुनाम्गे़नुॽबा, मिलाम्बा तोःम्मनाबा सिदुङ्जभा, हुक्वा हे़क्के ले़त्ति तोःम्मादे़न्नो मिधिक्खुदेसुर॥ 3पोगुगे़न् कुजा सिदुङ्जभालाम् के़नम्बा कुजान् हारुने़न् नु खुने़ॽ कुस्साहाॽरे़ खुन्छिॽ लक् पोङ्ल॥ यहवे दाङ्बाल्ले़ कुलागि मिलाम्बा तोःम्मनाबा सिदुङ्जभाहाॽओ कन् साॽरिक् सेसेबा सिदुङ्चभारो॥
4“‘मिहाॽलुङ्ङो ओॽमनाबा पोगुगे़न् कुजा सिदुङ्जभा तोःम्मा निङ्वाॽ वाॽने़भग्र, के़भङ्बा सिदाॽ मे़न्याक्केबा खरे़ःङ् ले़ःङ्मा पोङ्ॽ॥ खे़न् चुन्जुम्बा फेॽरुम् नु चैतुन निःङ्गेॽओ सॽमनाआङ् ले़ःङ्मनाबा के़धुङ्बा खरे़ःङ् पोङ्मा पोङ्ॽ इग्र के़भङ्बा सिदाॽ मे़न्याक्केबा निःङ्गेॽ हुःप्मनाबा पाॽबाःम्बा खरे़ःङ् पोङ्मा पोङ्ॽ॥
5“‘खिनिॽ पोगुगे़न् कुजा सिदुङ्जभान् खेःक्याओ ले़ःङ्मनाबाने़ग्र, खरे़ःङ् निःङ्गेॽओ सॽमनाबा के़भङ्बा सिदाॽ मे़न्याक्मनाबा चुन्जुम्बा फेॽरुम्मिल्ले़न् पोङ्मा पोङ्ॽ॥ 6खे़न् खे़ल्ले़क् खे़ल्ले़क् खे़ःक्खे़ॽआङ् खे़प्मो निःङ्गेन् हुक्खे़ॽ॥ खे़ङ्ग पोगुगे़न् कुजा सिदुङ्जभारो॥
7“‘खिनिॽ पोगुगे़न् कुजा सिदुङ्जभान् खरे़ःङ् ले़ःङ्मा खेःक्याओ के़एःप्सुम्बाने़भग्र, खे़न् चुन्जुम्बा फेॽरुम् नु निःङ्गेॽले़न् पोङ्मा पोङ्ॽ॥ 8कन् कुजाहाॽलाम् के़जोगुम्बा पोगुगे़न् कुजा सिदुङ्जभान् यहवे दाङ्बाओ तेॽरे़म्मे़ॽ॥ निङ्वाॽफुसाम्बाओ खे़न् तारे़म्मे़ॽ हे़क्क्याङ् निङ्वाॽफुसाम्बाल्ले़ खे़न् ले़त्ति तोःम्मादे़न्नो तारुर॥ 9हे़क्क्याङ् निङ्वाॽफुसाम्बाल्ले़ पोगुगे़न् कुजा सिदुङ्जभालाम्बा हुक्वा कुइसिक् कुलक् लःत्तुर खे़ब्याङ् यहवे दाङ्बे़ल्ले़ खे़न् कुसिराॽ के़धाङ्बा कुनाम्गे़नुॽबा, मिओलाम् तोःम्मनाबा सिदुङ्जभा कुइसिक् ले़त्ति तोःम्मादे़न्नो मिधिक्खुर॥ 10पोगुगे़न् कुजा सिदुङ्जभालाम् के़नम्बा कुजान् हारुने़न् नु खुने़ॽ कुस्साहाॽरे़ खुन्छिॽ लक् पोङ्ल॥ यहवे दाङ्बे़ल्ले़ कुलागि मिओलाम् तोःम्मनाबा सिदुङ्जभाहाॽओ कन् साॽरिक् सेसेबा सिदुङ्चभारो॥
11“‘यहवे दाङ्बे़ल्ले़ कुलागि खिनिॽ के़दोःन्दुम्बा आत्तिन् पोगुगे़न् कुजाःन्नाङ् के़भङ्बा सिदाॽ याक्मनाबा पोङ्मा मे़नुॽने़न्, थेआङ्भे़ल्ले़ यहवे दाङ्बे़ल्ले़ कुलागि मिओलाम् तोःम्मनाबा सिदुङ्जभाओ खिनिॽ के़भङ्बा सिदाॽ नु सक्वाघुन् मिमे़धिक्खे़म्मिन्ने़ॽ॥ 12खे़ङ्ग तगि के़दुम्बा पोगुगे़न् कुजा सिदुङ्जभाहाॽ कुइसिक् यहवे दाङ्बे़ल्ले़ कुलागि के़दोःन्दुम्मिल्ले़ पोङ्ॽ, कर कुनाम्गे़नुॽबा सिदुङ्जभारे़ लागि खे़ङ्हाॽ ले़त्ति तोःम्मादे़न्नो मे़दोःन्दे़म्मिन्ने़ॽ॥ 13खिनिॽ के़रे़क् पोगुगे़न् कुजाःल्ले़ सिदुङ्जभान् युम्मिल्ले़ के़लिम्बा चोगे़म्मे़ॽ, थेआङ्भे़ल्ले़ निङ्वाॽफुमाङ्ङिन् नु खिनिॽ लुम्मोबा माङ्हुप्पिन् युम्मिल्ले़ ओसेःन्धाङ् चोगु॥ खिनिॽ के़रे़क् सिदुङ्जभाओ युम्माङ् तोःन्दे़म्मे़ॽ॥
14“‘यहवे दाङ्बे़ल्ले़ कुलागि तगि के़दुम्बा खिनिॽ पोगुगे़न् कुजा सिदुङ्जभा के़दोःन्दुम्ने़भग्र, खिनिॽ पोगुगे़न् कुजा सिदुङ्जभाःल्ले़ लागि युःप्मनाबा नु मिओ सिप्फङ्ग्रा चोःक्मनाबा कुजा तोःन्दे़म्मे़ॽ॥ 15खे़प्मो निःङ्गेॽ याक्ते़म्मे़ॽ हे़क्क्याङ् सुक्पा केःत्ते़म्मे़ॽ॥ खे़ङ्ग पोगुगे़न् कुजा सिदुङ्जभारो॥ 16हे़क्क्याङ् निङ्वाॽफुसाम्बाल्ले़ के़रे़क् सुक्पान्नु सोरिक् निःङ्गेॽ नु युःप्मनाबा कुजालाम् कुभा लक् याङ्सिङ्ङाङ् खे़न् हुक्वा कुइसिक् मिधिक्खुर॥ यहवे दाङ्बे़ल्ले़ कुलागि खे़न् मिओलाम् तोःम्मनाबा कुजा सिदुङ्जभारो॥’”
© 2009, 2023, Wycliffe Bible Translators, Inc. All rights reserved.