Baroma Khukhwaantsula
Khukhwaantsula
Paulo arona ibaluwa yino nga nikwo kumukhoosi kwe khuŋoonaŋoona khukyeniya khweewe isi babafukiilila mu Kristu, abe babaali i Roma. Inengekharengekha yeewe abe yaba ndi anyoowe khuraambakho buraambi mu bafukiilisi abo, nio ndi lwanyuma nga bamuweele buyeeti, abe atsye mu Sipeyini. Paulo arona khusontsoola isaambo isi niye abe nga n'amanya khufukiilila mu Kristu nga ni khuli, ni sheesi khumanyisa nga ni khuli khubonekhela mu bulamu bwe babafukiilila mu Kristu. Ibaluwa yino ilimo burume bwa Paulo bwoosi mu bwitsufu.
Mu baluwa yino Paulo anyoowa ni khusheesa bafukiilisi babaali i Roma, ni khubaboolela ari mu khuloomba khweewe abaloombatsakilakho. Lwanyuma lw'ebyo, Paulo arumbula kumurwe kwe baluwa yeewe, nga nikwo kukuloma kuri, “Khubirira mu Makhuwa Kamalayi kano, bukwalaafu bubwama isi Wele bwokesanisibwila mu khufukiilila khwonyene.” (1.17)
Aryo Paulo watsya nga ebaluusa khu murwe kw'elomo kuno, nga aloma ari, babaandu boosi, oba Bayudaaya namwe Banaambo, shakhiile baweentse bukhosefu, khulwekhuba boosi baakhola bibyoonako. Babaandu banyoola bukhosefu buno mu Wele khubirira mu Yezu Kristu.
Shishilakho, Paulo asontsoola isaambo isi bulamu bushaakha buno bwe khukholakana ni Wele, buli ni khubamo nga umuundu wekyelile ufukiilila mu Kristu. Umufukiilisi uyo aba afuukilisana ni Wele, nalundi iba ndi Umwoyo uwa Wele wamukangulula khurura mu maani ke bibyonako ni khuufwa.
Khukhwaama khu suula iye kharaano (5) khukhwolisila ilala khu ye shinaane (8), asontsoola shitsiililwa she Kamakaambila ka Wele ni saambo isi kamaani k'Omwoyo uwa Wele kabonekhela mu bulamu bw'omufukiilisi.
Shishilakho, Paulo wakhakakho naabi khubalaayisa khu biindu bibiwaamba khu saambo isi Bayudaaya ni Banaambo boosi atweela, nga ni bali mu nengekharengekha iya Wele.
Khukhwakamisayo aloma ari, shishiindu she Bayudaaya khulekha khufukiilila mu Kristu ta, yaba nga inengekharengekha iya Wele abe yeesi akhola, nga akana areere babaandu boosi isi bubweela bweewe, khubirira mu Yezu Kristu. Nalundi Paulo ashihandalasa ari imbuka ilyoola Bayudaaya bafukiilile mu Yezu.
Shishakamisayo, Paulo arona khu bibiwaamba khu bulamu bw'oyo ufukiilila mu Kristu nga ni bwandyakhiile khuuba, ni khufuurisila ilala isaambo yeesi khwakhiile khukanamo babaandu basheefwe. Arona khu biindu bibiwaamba khu saambo iye khuuba umwakaanisi umulayi uwa Wele, ni byeesi bafukiilisi bali ni khukholela babaali bawuli ni isi babaandu bashaawe, ni bibiwaamba khu byeesi kumwoyo kukhuboolela.
Paulo akamisayo burone buno, nga asheesa nalundi ni bilomo bye khuruuya Wele.
Inoondekhana iye bibiilimo
Khukhwaantsula ni kumurwe kwe lomo (1.1-17)
Shishikila buwonesi bwakanibwa (1.18—3.20)
Isaambo isi Wele awonesamo babaandu (3.21—4.25)
Bulamu bushaakha by'oyo ufukiilila mu Kristu (5.1—8.39)
Ba Isiraeli bali mu nengekharengekha iya Wele (9.1—11.36)
Khukhwibirisa khw'oyo ufukiilila mu Kristu (12.1—15.13)
Khusheesa ni khukhwakamisayo (15.14—16.27)
Pilihan Saat Ini:
Baroma Khukhwaantsula: LCE
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
Lumasaaba Catholic Bible © The Bible Society of Uganda, 2017.