Baroma 9
9
Wele ni Babaandu beewe Barobole
1Mu lisiina lya Kristu, indikho inoma bya ŋali. S'indi khukanikha bye bubeeyi ta. Kumwoyo kwase nga kuli atweela n'Umwoyo Umukhosefu, kuwandalasa kuri ise s'indi khukanikha bye bubeeyi ta. 2Mu khuloma bino musaambo yino, indi ni kumutaambo kumukali ni butsiina bukali mu mwoyo kwase bubukhaakama ta. 3Khulwe be buulebe baase babaali ba Isiraeli ni khulwase samweene, ise nandikanile ndi shitsubo shishiili khu Kristu, khali shibeele khus'ise nio indekha khuba uwa Kristu ta. 4#Luky 4.22Wele awa babaana ba Isiraeli ikhabi iye khukhwikyela babaana beewe. Wabawa ni shiriifwa sheewe, wakhola ni nabo tsindakaano tseewe, wabawa kamakaambila keewe, wabawa khukhwisaaya, nalundi abawo byeesi abasuubisa. 5Bakuuka baawe beene babamanyikhana abo baaba bakuuka baabwe, ni Kristu mu khusaalikhana khweewe nga umuundu aba uwe linaambo lyabwe lyeene. Wele afumisibwe biilo ni biilo. Amiina.
6Ne ise s'indikho inoma ndi byeesi Wele aloma byakhasibwa ta; khulwekhuba babaandu babaama mu Isiraeli boosi si bali babaandu ba Wele ta. 7#Rak 21.12Namwe boosi babaama munda iya Ibulayimu si bali babaana beewe khulwekhuba bari niye ubasaala ta, akhali babalikha nga babaana beewe khubirira mu Isaaka. 8Shino shimanyisa shiri si bali abe babaasaalikha mu mubili nibo babaabalikha nga babaana ba Wele ta, ne akhali babaana babaasaalikha nga babirira mu khusuubisa khweesi Wele akhola, nibo bababalibwa nga babetsukhulu beewe. 9#Rak 18.10Khulwekhuba Wele mu khusuubisa Ibulayimu aloma ari, “Indikobola mu mbuka nga yino iri. Isi indi kobolela, umukyelema woowo Sara akhaabe ali n'umwaana umusiinde.”
10Ne seshili isho shonyene ta. Khulwekhuba akhaba Rebeka naye n'asaala basiinde bakhwana, paapa waabwe aba mutweela, nga niye Kuuka weefwe, Isaaka. 11#Rak 25.23Akhaba abe ni baaba nga bashiili khusaalikha ta, namwe abe bashiili khukhola shishiindu shoositsana oba shiibi namwe shilayi ta, Wele aboolela Lebeka ari, “Umwaana woowo umukhulu aliba umuraambi w'omukyeekhe.” 12Shino shakholebwa khulwe khulaangibwa kheewe, ari nio manya shitsiililwa sha Wele sheesi amurobolelamo shiloosele, ne shiili bari khulwe bikholwa bilayi ta. 13#Mal 1.2,3Nga ni sharonebwa shiri, “Nakana Yakobo, ne nabiyila Esau.”
14Ari khulome khuri shiina? Khulome khuri Wele akhola bye bubwonaki? Taawe. 15#Luky 33.19Khulwekhuba alomela Musa ari, “Indiyakhila uyo isi ingana khukhwiyakhila; nalundi indiwambila shiisa uyo yeesi isi ingana khuwambila shiisa.” 16Nashiryo shino shimikha khu shiisa sha Wele, ne shiili khu sheesi umuundu akana khukhola ta. 17#Luky 9.16Nga bibyaronebwa bikhosefu ni biloma khu Farawo, umuyiinga uwa Misiri biri, “Nakhwikesa umuyiinga nio akile lisiina lyase lifumisibwe mu shiibala mwoosi.” 18Nashiryo Wele eyashila umuundu isi umweene akhalilewo khukhwiyashila. Shitweela busa akhola kimyoyo kyaabo beesi ekanisa, kyaba ni shikili.
Lirima lya Wele ni Shiisa sha Wele
19Mutweela khusi inywe kane andeebe ari, “Ne noola shili shiryo, khulwashiina kila Wele ekiitsa babaandu balala? Naanu unyala khukhaandisa khukana khwa Wele?” 20#Isay 29.16; 45.9; Makh 12.12Ne iwe niye naanu? Iwe umuundu shiina unyala khukhaandisa Wele? Shibuumbe shinyala khureeba uwashibuumba shiri, “Shiina kila wamuumba uri?” 21#Makh 15.7; Sir 33.13Umubuumbi s'ali ni bunyala khukhola sheesi akana ni liiloba lyeewe ta? Umubuumbi s'anyala khuumekakho liiloba ilyo wakhola shibuumbe shitweela nga shimiliwu nalundi she angaaki, ni shishindi nga shiryo busa ta?
22 #
Makh 12.20,21 Shinyala shaba khana Wele, khulwe khukana khukhwokesana lirima lyeewe, ni khukana khukhwokesana kamaani keewe, wayikhalilikha naabi khulwe bibuumbe ibyo abe bibyashila khukhwonakisibwa. 23Nalundi Wele akana okesanise buyiindifu bwe shiriifwa sheewe shikali isho, sheesi atsukha khusi ifwe khukhwakaanila shiisa sheewe, abo khusi ifwe beesi amala khuŋoonaŋoona nga bushiili. 24Ifwe khuli babaandu beesi alaanga. Ne shiili ifwe Bayudaaya fwenyene ta, ne ni naabo beesi alaanga khukhwaama mu Banaambo. 25#Hos 2.23Shili busa nga Wele n'alomela khubirira mu muŋoosi Hoseya ari, “Abo makiboole babakhaaba babaandu baase ta, indibalaanga ndi ‘Babaandu baase.’ Ni linaambo abe lyeesi ikhakana ta, indililaanga ndi, ‘Likanwa lyase.’
26 #
Hos 1.10
“Ni mu shifwo shisheene mweesi babalomela bari, ‘Simuli babaandu baase ta,’ ibweene iyo balilaangibwa bari, ‘Babaana ba Wele Umulamu.’ ”
27 #
Isay 10.22,23 N'umuŋoosi Yisaaya alomela angaaki khu biwaamba khu Isiraeli nga aloma ari,
“Akhaba nga bukali bwe babaandu be mu Isiraeli
buli nga kumuyekhe kwe khu ndulo khwe inyaantsa,
ne shitweela busa bafwiiti bari
nibo babaaliwonesebwa.
28Khulwekhuba Umukasya
alikhalila shiibala kumusaango wangu,
akhali khuliindakho
na khafwiiti ta.”
29 #
Isay 1.9
Nalundi shili busa nga Yisaaya n'aloma makiboole ari,
“Iba nga Wele unyala byoosi uyo
alekha khukhulekhela ifwe lisaaye lyeefwe,
khali nafwe khwayikyela nga Sodoma.
Khali khwayikyela nga Gomora.”
Ba Isiraeli si bakana khufukiilila ta
30Ne ari kane khulome khuri shiina? Kane khulome khuri Banaambo abe babakhaweentsa bukwalaafu ta, ari bafunile bukwalaafu khulwe khufukiilila. 31Ne ba Isiraeli babaweentsa bukwalaafu nga baloondelela kamakaambila si banyoola bukwalaafu ta, khulwekhuba siboolelesa sheesi kamakaambila kaakana ta. 32Ne khulwashiina kila shaba shiryo? Shaba shiryo khulwekhuba ba Isiraeli si baweentsa bukwalaafu nga bemikhile khu bye khufukiilila ta. Baaweentsa bukwalaafu nga bemikha khu bikholwa byaabwe. Bali busa nga babetuya khu shisiindi shishireera biwaangafu. 33#Isay 28.16Nga ni sharonebwa mu byaronebwa bikhosefu shiri, “Bona ndi khurawo libaale mu Sayuuni, lilikane likile babaandu betuyekho. Nilyo lyeesi kane betuyekho ni bakwa asi. Ne umuundu yeesi ufukiilila mu Yezu, s'aliwambisibwa kamaŋaanyu ta.”
Pilihan Saat Ini:
Baroma 9: LCE
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
Lumasaaba Catholic Bible © The Bible Society of Uganda, 2017.