Baroma 7
7
She khubonelakho she bukhwaale
1Be buulebe, inywe mwamanya bulayi bibiwaamba khu makaambila. Ne ndi si mumanya muri kamakaambila kaba ni buwuli khu mundu nga ashiili umulamu ta? 2Shili busa nga umukhasi umukhwalikhe n'awulibwa ni kamakaambila kakawambakana n'umuseetsa weewe nga umuseetsa n'ashiili umulamu. Ne umuseetsa n'afwa, shino shiba shakanguluule umukhasi khukhwaama khu makaambila abe kakamubowa khu museetsa weewe. 3Ni abweene awo, umukhasi uyu n'atsya khu museetsa ukuundi nga umuseetsa weewe ashiili umulamu, ilala alilaangibwa khuuba umuyeyani. Ne umuseetsa weewe n'afwa, umukhasi yuno aba s'ashiili asi e kamakaambila ako ta. Nalundi abe akhakhwalikha khu musaani ukuundi, s'abalikha nga umuyeyani ta. 4Shili shitweela busa ni nanywe be buulebe. Inywe mwayikyela baafu isi kamakaambila khulwe kumubili kwa Kristu, nio akile mube b'oyo, uwalamusibwa khukhwaama mu bafu, ne shishamamo mube be kumukaso mu bwakaanisi bwa Wele. 5Ifwe ni khwaba nga khushiili mu khumenya khukhulondekhana ni busaalikhana bwe kimibili kyeefwe nga ni kili, khukhwikoomba khukhola bibyonako, abe khutsiila khu makaambila kakakholela mu myoyo kyeefwe. Na buli sheesi khukhola abe shamamo bibyaamo bye khuufwa. 6Ne ari ifwe khwamala khulekhuulibwa khukhwaama mu makaambila, ari khuli baafu isi kamakaambila abe kakakhubowa ifwe. Nashiryo si khuli babakaanisi babaloondelela kamakaambila kamakhale kakaronebwa ta, ne khulondelela bulamu bushaakha bw'Omwoyo.
Kamakaambila ni Bibyonako
7 #
Luky 20.17; Maka 5.21 Ari kane khulome khuri shiina? Khulome khuri kamakaambila kameene niko kali bibyonako? Seshinyalikha taawe. Khulwekhuba ilekha khubawo kamakaambila ta, khali ise simanya nga bibyonako nibyo shiina ta. Kamakaambila kalekha khubawo ta, khali ise imanya indyeena nga likaambila ni liloma liri, “Ukhekoomba shishiindu sh'owashoowo taawe?” 8Ne bibyonako ni byanyoola ikhabi mu makaambila byandereera kumuluungo kwe khukhwikoomba khwa buli saambo. Shikila akhaliwo kamakaambila ta, bibyonako biba biifu. 9Ne ise samweene lutweela naba umulamu nga kamakaambila kashiili khubawo ta. Ne kamakaambila ni keetsa, bibyonako byarakikha bushaakha ni nase naafwa. 10Kamakaambila katsana ni kameene yaba niko kakaaba kakareera bulamu, ne ise kandereera khufwa. 11#Rak 3.13Khulwekhuba bibyonako byanyoola ikhabi mu makaambila, byamombelesa ise lwanyuma byantsira.
12Nashiryo, kamakaambila kameene kali kamakhosefu, ni bilakilo bili bikhosefu, nalundi bilayi ate nga bya ŋali. 13Ne ari shimanyisa shiri shishiindu shilayi nisho shishandereera ise khuufwa? Taawe. Bubwonaki nibwo bubwandeerera ise khufwa. Bubwonaki buraambisa shishiindu shilayi wakila bwandereera ise khuufwa, ari nio akile bubwonaki bumanyikhe lubuula nga ni buli mu saambo yabwo. Nashiryo kamakaambila kayeeta khukhwokesana kari bubwonaki buli shiibi she angaaki naabi.
Khusoolana khukhuuli mu mibili kyeefwe
14Khwamanya khuri kamakaambila kali busa nga imbewo, sikali ni kumubili ta. Ne ise s'indi nga imbewo ta. Nalundi nakulisibwa nga umukulwa isi bibyonako. 15#Gal 5.17Ise simanya bikholwa byase nga ni bili ta. Khulwekhuba mu shifwo she khukhola ibyo byeesi ingana khukhola, ikhola byeesi ikhekoomba khukhola ta. 16Ari nga nakholile ibyo byeesi ikhekoomba khukhola ta, ifukiilisa ndi kamakaambila kali kamalayi. 17Nashiryo s'ali ise niye ukhola ibyo ta, ne akhali bibyonako bibiimenya mus'iise nibyo bibikhola biryo. 18Khulwekhuba ise namanya ndi mbaawo shishiindu shilayi shoosi shishiili mus'iise ta; khulondekhana ni busaalikhana bwe kumubili kwase nga ni kuli. Abe lukana nakhekoomba khukhola shishiindu shilayi, ninyoola ndi sinanyalile khukhola shishiindu shilayi isho ta. 19S'ikhola bilayi byeesi nikoomba khukhola ta, ne akhali ikhola bibiindu biibi byeesi ikhekoomba khukhola ta. 20Ne noola ikhola sheesi ikhekoomba khukhola ta, shimanyisa shiri s'ili ise niye ukhola isho ta, ne akhali bibyonako bibiimenya mus'iise.
21Nashiryo ari shino shekyelile busa nga likaambila shiri, buli lweesi ingana khukhola shishiindu shilayi, ninyoola nakholile shishiindu shishikhali shilayi ta. 22Ne mu mwoyo kwase, ise samweene ingana kamakaambila ka Wele. 23Ne imbona mus'iise samweene mulimo likaambila liliindi nga lisoolanisa kamakaambila kameene keesi ise nambaasa. Shino shakila ise nekyela umuundu uwabowebwa ni likaambila lye bibyonako, liliimenya mu mubili kwase. 24Nga kumutaambo kwanyoolile! Naanu ukane asikule ise khukhwaama mu mubili kuno kukuuli khukhumbila ise mu khufwa? 25Wele asiimibwe, khulwa Yezu Kristu Umukasya weefwe! Nashiryo ise samweene ni bibyambaaso byase ikhola sheesi kamakaambila ka Wele kaloma. Ne kumubili kwase kwakaanisa nga kamakaambila ke bibyonako ni kakana.
Pilihan Saat Ini:
Baroma 7: LCE
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
Lumasaaba Catholic Bible © The Bible Society of Uganda, 2017.