Buraambi 26
26
Paulo elomakho nga ali isi Aguripa
1Aguripa walomela Paulo ari, “Ufukiilisibwa khukhwilomakho wamweene.”
Kila Paulo wenyusa kumukhono, welomakho ari: 2“Imbona nga ndi n'ikhabi, khubona ndi ise samweene niimikha mu moni tsoowo, umuyiinga Aguripa, khukhwilomakho shaleelo khwiibyo byeesi Bayudaaya bambaabiile ise, 3ni khufuurira ilala lwekhuba iwe wamanya bulayi tsisaambo tsoosi, ni tsikhaando tse Bayudaaya. Nashiryo, inoomba ndi umbulilise ni khukhwikhaliilikha khukali.
4“Isaambo yase iye mu bulamu khukhwaama nga ishiili umusoleeli, bweesi imenyile khukhwaama makiboole mu baandu baase, nalundi nga ni naba i Yerusalemu, Bayudaaya babumanya bulayi. 5#Bur 23.6; Filp 3.5Khukhwaama khaale, babaandu bano bayimanya ise. Abe noola bakana, banyala khuŋaŋasa bari, khukhwaama makiboole, ise n'aba mu lituuli lilimenielesa naabi mu bye diini. Ise n'aba Umufarisaayo. 6Ari nemile ano khuwotsesebwa khulwekhuba niyikina ibyo byeesi Wele asuubisa bakuuka beefwe. 7Ni khukhwiyikina khweesi bikuuka byeefwe liikhumi na bibili biliindilila khukhwoolakho, nga ni besaaya Wele kumuusi ni shiilo. Umuyiinga Aguripa, ise khulwe khukhwiyikina ndyo, shikila Bayudaaya bambaabiile. 8#2 Mak 7.9Ne lwashiina inywe mushinyoola khuuba shihangafu khushifukiilisa muri Wele alamusa baafu?
9 #
Bur 8.3; 22.4,5 “Mu ŋali, ise samweene nambaasatsaka ndi naakha khukhola shoosi sheesi inyala khukhaandisa lisiina lya Yezu uwe Nazareti. 10Isho nisho sheesi ise nakholatsaka mu Yerusalemu. Ise nafuna bunyala khukhwaama isi basaayi bakhulu, khutuumatsaka bakhosefu ba Wele bakali mu mapuusu, nalundi ni baaba nga babakhalile kwe khuufwa, ise nashiseembatsaka. 11Nalundi ise nawatsaka bafukiilisi mu Yezu bitaambiso mu ntsu tsye khukhwisaayilamo tsoosi, nga ikhakakho khubawanyiinya bafwotsole Wele. Ni khulwe lirima likali nakhakakho khubakubyeenga akhaba ni mu biriimba bye Banaambo.”
Paulo asontsoola khu khushuusibwa khweewe
(Bur 9.1-19; 22.6-16)
12“Shifukhu shitweela naba nga ndi khuutsya i Damasiko lwe shitsiililwa sheene isho, nga namalile khufuna tsi baluwa ni bunyala khukhwaama isi basaayi bakhulu. 13Paapa umuyiinga, ikhuboolela ndi khu saawa nga tsisesaba tse mwihangilwe, nabona buwaanga bukali nga bwama mwikulu, nga bufuura khukhwaburukha khwe nyaanga, bwakhosesa khukhuntsibotokhelela, ni naabo beesi naba ni nabo nga khuli khu lukyeendo. 14Feesi khwakwa asi. Ise nawulila likono lilomela mu lulimi Luheburaniya liri, ‘Saulo, Saulo, shiina kila ungubyeenga ise? Shili shiwaangafu naabi iwe khukhaandisana ni shishikhanyalikhana ta!’ 15Nase nareeba ndi, ‘Iwe naanu Umukasya?’ Umukasya welamo ari, ‘Ise Yezu isi iwe uli khukubyeenga. 16Ne ni winyukhe wiime khu ngaaki. Nakhubonekhele iwe lwekhuba nakhuroboole khuuba umwakaanisi wase, ni khuboolela babaandu bibiindu ibyo byeesi umboonelemo, ni n'ebyo byeesi kane ikhwokese. 17Ise indi khuwonesa iwe khukhwaama khu baandu be linaambo lyoowo, n'isi kamanaambo kakandi keesi indi khukhurumanayo. 18Khubimbula tsimoni tsaawe, nio banyale khushuukha khukhwaama mu shilima beele isi buwaanga. Nalundi bashuukhe khukhwaama mu maani ka Sitaani, beele isi Wele, nio banyalise khufuna shishiyakhilo she bibyonako byaawe, ni khufuna shiifwo atweela ni bakhosefu khulwe khufukiilila khwawe mus'iise.’ ”
Paulo asontsoola khu bye kumulimo kweewe
19“Nashiryo umuyiinga Aguripa, ise siingane ikhaandisana ni n'ebyo byeesi nabona khukhwaama mwikulu ta. 20#Bur 9.20,28,29Ni khunyoowa naboolelakho ibo babaaba mu Damasiko, nelakho ibo babaaba mu Yerusalemu, ni naabo be mu shiibala she Yuda shoosi, ni Banaambo nabo. Nga mbaboolela ndi bali ni khukhwibiiyisa bibyonako byaawe bakobole isi Wele, nga bakhola buraambi bubulondekhana ni khukhwibiiyisa khwawe. 21Ni khulwe lomo yino Bayudaaya bamaambila mu Lisaayilo Likhulu nga bakana bantsire. 22Ni khukhwoolisa khu shifukhu she shaleelo shino, Wele wayinjeeta ise busa, kila niimikha ano mu moni tse bakhulu ni bakyeekhe nga imbaboolela ibyo byoosi byeesi baŋoosi ni Musa baaloma bari bilibawo. 23#1 Kor 15.20 Isay 42.6; 49.6Nibo baloma bari, Kristu shimwakhila khutaambisibwa nio abe umukiboole mu khulamukha khukhwaama mu bafu, aryo olese khu Bayudaaya ni Banaambo buwaanga bwe buwonesi.”
24Paulo n'aba nga ashiloma aryo, Fesito wamukhookhela ari, “Paulo iwe wakwiile tsintsoli. Buleekele bwoowo bwe angaaki ubwo bwakhukwisile tsintsoli.”
25Ne Paulo welamo ari, “Uwelukoosi Fesito, ise sinakwiile tsintsoli ta. Byeesi inoma bya ŋali bibyeene. 26Umuyiinga bilomo bino wabimanya. Kila nase mbikanikhila mu moni tsoowo nga siniririkana ta. Nalundi ndi ni kumwiyikino ndi mbaawo na shitweela sheesi ukhabona ta, lwekhuba mbaawo shishakholebwa mu shimoonyo ta.” 27Kila Paulo areeba ari: “Umuyiinga Aguripa, ufukiilila mu baŋoosi? Namanyile ndi ubafukiililamo.”
28Kila Aguripa aloma Paulo ari, “Iwe wambaasa uri mu mbuka ifwiiti yino, unyala wangalusa ise khuuba umufukiilisi uwa Kristu?”
29Paulo welamo ari, “Oba imbuka ifwiiti, namwe ingali, ise inoomba Wele, ndi akhuba iwe wenyene ta, ne ni naabo boosi babaali khukhundekeeresa shaleelo shino, khali bekyelile nga ise, akhali bubowe buno bwonyene.”
30Lwanyuma umuyiinga, ni gafana ni Berenike, ni naabo babaaba bekhale benyukha khu ngaaki. 31Baryo ni barura ibulafu, baloma bonyene na bonyene bari, “Umuundu yuno siwakholile ilomo yoosi ikila weribwa namwe wabowebwa ta.”
32Aguripa walomela Fesito ari, “Umuundu yuno alekha khuloomba ari kumusaango kweewe kutsye wa Kayisaali, khali bamulekhuulile.”
Pilihan Saat Ini:
Buraambi 26: LCE
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
Lumasaaba Catholic Bible © The Bible Society of Uganda, 2017.
