Buraambi 23
23
1Paulo womiisila tsimoni khu baandu be mu lukhobo, waloma ari, “Be buulebe, ba Isiraeli bashaase, ise namenyile mu moni tsa Wele nga nitsililisa naabi, ni kumwoyo kumulayi, khukhwoolisa khu shifukhu she shaleelo.” 2Ne umusaayi ufuura bukhulu Ananiya waloma ibo abe babeemile ambi ni Paulo bamukhupe khu minwa. 3#Mat 23.27,28Kila Paulo aloma ari, “Nawe Wele alikhukhupa! Iwe litikiiyi liliwakhibwile ni luloongo luwanga. Unyala uryeena khukhukhalila ise kumusaango khulondekhana ni kamakaambila, ne ate iwe walekha khukalondelela, walakila uri bakhupe ise?”
4Abo abe babeemile ni Paulo bamuloma bari, “Unyala uryeena khukhomyaasa umusaaayi ufuura bukhulu uwa Wele?”
5 #
Luky 22.28
Paulo welamo ari, “Be buulebe, abe ise ishiili khumanya ndi niye Umusaayi ufuura bukhulu ta.”
6 #
Bur 26.5; Filp 3.5 Ne lwanyuma Paulo n'ashimanya ari batweela khuubo babaaba mu lukhobo Basadukaayo, ni babaandi nga Bafarisaayo, walomela angaaki ari, “Be buulebe, ise indi Umufarisaayo, lundi indi umwaana we Bafarisaayo. Shishikila balikho bambotsesa bari lwekhuba ise niyikina, nalundi ifukiilila mu khulamukha khwe baafu.” 7Paulo n'aloma aryo, abawo khukhaandisana akari e Bafarisaayo, ni Basadukaayo. Abawo khukhwawukhana mu lukhobo, 8#Mat 22.23; Mrk 12.18; Luk 20.27lwekhuba Basadukaayo bafukiilila bari mbaawo khulamukha khukhwaama mu baafu ta, bari mbaawo bamalayika ta, namwe kimyoyo ta. Ne Bafarisaayo bino byoosi babifukiilila. 9Ulwo abawo khutumbuukha khukali. Ni baleekeli be kamakaambila babaaba khu luwande lwe Bafarisaayo benyukha beema, bakhaandisana nga baloma bari, “Ifwe sikhubona ilomo yoosi khu mundu yuno ta. Shinyalikhana khuuba nga mwoyo namwe malayika wamukanikhileyo.”
10Nga khukhaandisana khwekyelile shisaayumba, umukhulu we basilikhale warya ari Paulo banyala bamutabulakamo bisiintsa, aryo walakila basilikhale beewe bamuruseyo mu baandu ni kamaani, bamureere mu lumako.
11Mu shilo shishelakho, Umukasya weetsa weema isi Paulo, wamuloma ari, “Yinyindaalila kumwoyo, lwekhuba nga niwawa bujulisi khusiise mu Yerusalemu, shikhwakhila khukhola shishiindu sheene nisho shitweela ni mu Roma namwo.”
Luwomelo lwe khukhwiira Paulo
12Ni bwasha kumutikhinyi, basaani Bayudaaya bakhola luwomelo, bekuta nga betsuba bari, si bakane balyekho namwe banywekho khakhaandu khoosi ta, khukhwoolesa nga bamalile khukhwiira Paulo. 13Abo babaaba mukhwikuta khuno baaba babirisa mu baandu kamakhumi kane. 14Shikila batsya isi basaayi bakhulu ni basakhulu babaloma bari, “Khukhwitsuba khwetsubiile ilala khuri singene khukhoombe khu shilyo shoosi ta, khukhwoolisa nga khwamalile khukhwiira Paulo. 15Nashiryo, ana ari, inywe ni be mu lukhobo, ni mulaalikhe umusilikhale umukhulu khumureera isi muli, mufwane nga mumutsya khukhalawo kumusaango kweewe lundi. Ifwe khwerekekhile khumwiira nga ashiili khwoola ni nahano ta.”
16Ne umwiwaana wa Paulo wawulila khukhwibuula khuno. Kila aryo watsya wenjila mu lumako lwe basilikhale wareewula Paulo. 17Kila Paulo alaanga mutweela khu basilikhale, babaraangilila kamatuuli ke basilikhale shitoondo shitweela, wamuloma ari, “Nuyile umusoleeli yuno isi umukhulu we basilikhale, lwekhuba ali ni sheesi akana khumuboolela.” 18Aryo wamuyila wamwolisa isi umukhulu we basilikhale, wamuloma ari, “Umubowe Paulo, anaangile wanoomba ari, indeere umusoleeli yuno is'uli, lwekhuba ali ni sheesi akana khukhuboolela.”
19Umukhulu we basilikhale kila awamba umusoleeli yuno kumukhono, wamwiisa andulo, wamureeba ari, “Shiina sheesi ukana khukhumboolela?”
20Umusooleli waloma ari, “Bayudaaya bafukiilisaane khukhuloomba iwe khukhwikhisa Paulo mu lukhobo kumukaamba, bafwane nga babaatsya khumureebelesakho mu bwitsufu bibimuwambakho. 21Ne ukhabafukiilisa ta, lwekhuba babaandu baawe babaminyisa kamakhumi kane bamwibuulile, nga bamalile ni khukhwitsuba bari, singene balye, namwe banywe ta, khukhwoolisa nga bamwiirire. Ne ana ari bali berengerengefu, nga baliindilila iwe sheesi kane ubalomele.”
22Lwanyuma umusilikhale umukhulu yuno wasibula umusoleeli khuutsya, nga amukhonyakilila ari, “Ukhaboolelakho umuundu yeesi, uri wamboolelekho ise bilomo bino ta.”
Paulo akaanisibwa wa Gafana Felikisi
23Lwanyuma umukhulu we basilikhale walaanga babili khu basilikhale babaraangilila kamatuuli ke basilikhale, wabaloma ari, “Ni muŋoonaŋoone basilikhale bitoondo bibili, atweela ni babakyeendela khu ŋwaŋwa kamakhumi musaafu, ni be kamafumo bitoondo bibili; bano kane batsye i Kayisaliya shiilo saawa tsitaru. 24Akhaba ni Paulo ni mumulolele tsiŋwaŋwa araambise, bamuyile khukhwoolela ilala isi gafana Felikisi.”
25Kila umukhulu we basilikhale arona burone bubuloma buri: 26“Khukhwaama isi Kilawudiyo Lusiya, khuutsya isi uwe shiriifwa gafana Felikisi, inoma ndi nakhukheesile. 27Umuundu yuno awambibwa ni Bayudaaya, nalundi baaba bali ambi khumwiira, ne ise ni nabakwakho nga ndi ni basilikhale, namumusawo ni nashimanya nga ali umu Roma. 28Ne lwekhuba nakana khumanya ilomo inyene isi bamufunaana, namureera mu lukhobo lwaabwe. 29Nashifumbula ndi bamufunaana khulondekhana ni bibiindu bibiwaambakana ni kamakaambila kaawe, ne nga mbaawo sheesi bamufunaana shishimwolisa khu khufwa, namwe khu bubowe ta. 30Ne ise ni bamboolela bari kane ibewo luwomelo khu musaani yuno, khangu akho imwakaanisa is'uli, nalundi nalakiile ndi babamuwabila beene beetse is'uli, bakhuboolele iwe shiina shisheene sheesi bamufunaana.”
31Baryo basilikhale batsiila khu makaambila keesi baweebwa, baatsya ni Paulo mu shilo, bamwoolisa i Antipatiri. 32Ni bwasha khu shifukhu shishelakho, belayo mu lumako lwe basilikhale, balekha babakyeendela khu ŋwaŋwa, khuutsya ni Paulo. 33Nga boolile mu Kayisaliya, bakaanisa gafana ibaluwa, nalundi bamwokesa Paulo. 34Naye n'amala khusoma ibaluwa, wareeba Paulo buwuli bweesi amilamo. Ne n'ashifumbula ari, amila mu Kilikiya, 35wamuloma ari, “Indikhurekeeresa nga babakhufunaana kumusaango boolile ano.” Kila alakila ari baliindile Paulo mu lwanyi lwa Herode.
Pilihan Saat Ini:
Buraambi 23: LCE
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
Lumasaaba Catholic Bible © The Bible Society of Uganda, 2017.
