Buraambi 19
19
Paulo nga ali mu Efeso
1Ulwo Apolo nga ashiili mu Korinti, Paulo wabirira mu shaalo shiili lwengaaki, woola mu Efeso, ibweeneyo wanyoolayo batweela khu baleekelwa. 2Wabareeba ari, “Mwaweebwa Umwoyo Umukhosefu, nga ni mwafukiilila?”
Nabo bamwiilamo bari, “Taawe, ni khuwulilakho ifwe sikhwawulilatsakakho bari aliwo Umwoyo Umukhosefu ta.”
3Paulo wabareeba ari, “Aso, ne khubatisibwa shiina khweesi inywe mwabatisibwa?”
Nabo belamo bari, “Khubatisibwa khwa Yohana.”
4 #
Mat 3.11; Mrk 1.4,7,8; Luk 3.4,16; Yoh 1.26,27 Paulo wabelamo ari, “Yohana abatisa khubatisibwa khwe khukhwibiiyisa bibyonako, nga aboolela babaandu khufukiilila muuyo uwaba alikhukhwiitsa inyuma weewe, niye Yezu.” 5Ne ni bawulila shino, babatisibwa mu lisiina ly'Omukasya Yezu. 6Ne Paulo n'abarakho kamakhono keewe, Umwoyo Umukhosefu wabekhakho, bakanikha tsinimi tsitsiindi, naluundi baakhola buŋoosi mu lisina lya Wele. 7Boosi atweela baaba basaani liikhumi na babili.
8Paulo wenjila mu ntsu iye khukhwisaayilamo, wakanikhatsaka nga s'arya ta, khumala kimyeesi kitaru, nga akhaandisana ni babaandu, lundi nga akhakakho khubakhonjelesa lwe Buyiinga bwa Wele. 9Ne balala khu nibo, babaaba bamiinyi, balekha khufukiilila ta, nga lubuula bakhomaka Intsila y'Omukasya. Aryo Paulo wabarurakho watsya ni baleekelwa, wakhandisanaatsaka busheele mwileekelo lya Turano. 10Shino sheloosela khumala kimiiko kibili, khukhwoolesa boosi mu Asiya ni bawulila shilomo sh'Omukasya: Bayudaaya ni Bayonaani beene.
Babaana ba Sukewa
11Wele wakholela bye kamakaanga bikhabatsakawo ta khubirira mu Paulo, 12ni bitambaala namwe tsingubo khukhwaama khu mubili kweewe, byayilibwatsaka isi balwaale, byabawonesa, ni kimisaambwa kimibi nakyo kyabaruratsakakho. 13Ne Bayudaaya babaandi babakyeendatsaka busa nga batimisa kimisaambwa, nabo bakhakakho khuraambisa lisiina ly'Omukasya Yezu, mu khutimisa kimisaambwa kimibi khukhwaama khu baandu, nga baloma bari, “Ikhulakila khurura mu mundu uyu, mu lisiina lya Yezu isi Paulo elwaatsa!”
14Abawo basooleli musaafu b'omundu esi balaanga bari Sukewa, umusaayi umukhulu Umuyudaaya, nga nabo bakhola baryo. 15Lutweela shisaambwa shiibi shabaloma shiri, “Yezu ise namumanya, ni Paulo naye namumanya, ne inywe nibo ba naanu?”
16Aryo umusaani uwabakho shisaambwa shiibi wabasunakho ni kamaani koosi, waabakhupa naabi khukhwoolesa boosi ni batitukha barura mu ntsu batima, nga bali bukhuna, lundi nga wabawunakile. 17Shino ni shamanyikhana mu Bayudaaya, ni Bayonaani, babaaba bamenya mu Efeso, khuurya khwabawamba boosi, ni lisiina ly'Omukasya lyafumisibwa lukali. 18Bakali khuubo babafukiilila beetsa lubuula, nga babuula bibyonako byaawe, lundi nga bamanyisa ibyo byoosi byeesi bakholatsaka. 19Ni bakali babakholatsaka bye khulakula, bareera buurone bwaawe atweela, babyokhela mu lubuula. Ne ni baabalamo bukali bwe tsinusu, banyoola nga abeele byoolesa tsinusu biikana biraano. 20Shiryo shilomo sh'Omukasya sheloosela khubalaaha, lundi shaaba ni kamaani.
Shisaayumba mu Efeso
21Lwanyuma ibyo ni byawa, Paulo wakhalilawo ilala mu mwoyo kweewe khuutsya i Yerusalemu, nga abirira mu Masedoniya ni Akaya nga aloma ari, “Ni ndimala khukhwoolayo, shintsakhila ise khuutsyakho ni Roma nayo.” 22Aryo warumana babili khu baandu babamuyeetatsakakho i Masedoniya, nga nibo Timosewo, ni Erasto. Ne niye umweene waramakho mu Asiya, khumalakho imbuka ifwiiti.
23Ne mu bifukhu ibyo abawo shisaayumba shikali shisheene mu Efeso khulwe bilomo bibiwaamba khu Ntsila y'Omukasya. 24Lwekhuba umusaani mutweela lisiina lyeewe Demeturiyo, uwaba umubasi we feeza, uwakholatsaka buuyu bwe feeza, bwe khukhwisaayilamo wele waabwe Aritemi, lundi niye afunatsakila babasi kamafuurisa kamakali naabi. 25Umweene yuno wabuusanisa atweela ibo babakholatsaka kimilimo nikyo mitweela, wabalomela ari, “Basaani bashaase, mwamanyile nga buyiindifu bweefwe bwama mu milimo kino. 26Ne ana ari, mubona lundi muwulila nga umusaani Paulo wakhonjelesile lundi washuusile babaandu bakali, akhuba ano mu Efeso mwonyene ta, ne ambi ni mu Asiya mwoosi. Aboola ari ba wele babakholewa ni kamakhono, si bali ba wele babeene ta. 27Ne si khuli ifwe fwenyene khukhuuli buubi nga kumulimo kweefwe kutsya khuwawo ta, ne ni buuyu bwe khukhwisaayilamo wele umukhasi Aritemi umukhulu nabwo butsya khubonekha nga mbaamo kumukaso ta. Ni wele umukhasi umweene uwisaayibwa ambi mu Asiya mwoosi, ni shiibala shoosi, bukhulu bweewe kane burusibwewo.”
28Nabo ni bawulila shino, lirima lyabawamba, bayokesela angaaki bari, “Aritemi, wele uwe ba Efeso mukhulu.” 29Shiriimba shoosi shatabukha. Babaandu boosi bawamba Gayo, ni Arisitaluko babaama i Masedoniya nga nibo babakyeendatsaka ni Paulo, batima nga babakhweeselesa, benjila ni nabo mwibusanilo lye kiminyawo.
30Paulo wakana atsye injile mu baandu, ne baleekelwa balekha khumufukiilila ta. 31Ni bakhulu babaandi babawula Asiya, babaaba basaale ba Paulo, bamurumanisila burume nga bamwikontselela, alekhe khukhwiyokesana mwibusanilo lye kiminyawo ta.
32Kutuuli kwe babaandu kwoosi kwaba kwatabukhile. Babaandu balala nga bayokesela angaaki lwayo, ni babaandi lwayo. Ni babaandu babafuura bukali baaba si bamanyile lwashiina babusaane ta.
33Bayudaaya basindikhilisa Alekizanda, khuutsya mwituuli, bamwiimisa iburaangisi, shishambaasisa babaandi shiri niye uwabakho shihangafu. Alekizanda wabawutsila kumukhono nga akana basile, abasontsoole bibiindu nga ni bili. 34Ne nabo ni bamumanya bari ali Umuyudaaya, boosi bayokesela atweela angaaki khumala nga tsisaawa tsibili bari, “Aritemi, wele uwe ba Efeso ali mukhulu.”
35Ne lwanyuma umuroni umukhulu uwe shiriimba n'asilisa lituuli lye babaandu wabaloma ari, “Basaani ba Efeso, mundu shiina ukhamanyile ari, shiriimba sha Efeso nisho shishiliinda lisaayilo lya Aritemi, wele umukhulu, atweela ni shifwani sheewe shishakwa nga shaama mu ngaaki? 36Aso, lwekhuba bilomo bino sibikhabisanisibwa ta, inywe shibakhila khusila ni khulekha khukhola shishiindu shoosi nga muyubakilisa ta. 37Lwekhuba mwareerire babaandu bano ano, ikhaba nga si banuulile kamesaayilo namwe si bafwotsoole wele weefwe umukhasi ta. 38Ne noola Demeturiyo ni babasi basheewe babaali ni naye, bali ni lomo khu mundu yeesi, kamakayilo kaliwo kamekule, ni bawuli nabo baliwo, ni babawabile mu bweenemwo. 39Ne noola iliwo shishiindu shishindi, kane shikhaliwile mu lubuusano lwabusheele. 40Lwekhuba khuli abi naabi, khunyala khwawabilwa lwe shisaayumba shishibelewo shaleelo, ate si khuli ni lomo inyene yeesi khunyala khuuwa lwe shisaayumba shino ta.”
41Naye n'amala khuloma aryo, wekalawo lubuusano.
Pilihan Saat Ini:
Buraambi 19: LCE
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
Lumasaaba Catholic Bible © The Bible Society of Uganda, 2017.
