Ayat-ayat Alkitab Ternama dari ईशायाह 45

Bagikan

ताल्है दैणैं मुंह तिंयां खज़ानै ज़ुंण गुप्त ज़ैगा न्हैरै दी आसा हाल़्है डाहै दै। तेखअ ज़ाण्हनअ ताखा बी कि हुंह आसा सह बिधाता अर इज़राईलो परमेशर ज़ुंणीं तूह नाअं बोली शादअ।

“ताह आजू-आजू डेऊणअ मुंह आप्पै, उछ़टी-उछ़टी धारा बशैल़णीं मुंह धरनीं सरली। नगरीए गहल़े बडी-बडी कांस्से प्रऊल़ी पाणीं मुंह पेच़ी अर तेते द्रींड पाणै मुंह चोल़ी।

हुंह आसा बिधाता अर मुखा सुआई निं होर कोहै परमेशर आथी। तूह ता निं मुंह बछ़ैणदअ पर तज़ी बी दैणअ ताल्है जुधा करना लै ज़िहअ ताह लोल़ी तिहअ बल। तेखअ लागणअ पुर्बा ओर्ही पछ़मा तैणीं संसारे सोभी लोगा का थोघ कि हुंह आसा बिधाता अर मुखा सुआई निं होर परमेशर आथी ई।

प्रैश्शअ अर न्हैरअ आसा मंऐं ई बणाअं द, खरी अर सुबधी दैणैं आल़अ बी आसा हुंह ई। हुंह आसा बिधाता अर सोभ गल्‍ला करा हुंह ई।

हुंह बोला सारै संसारा लै, मुंह बाखा फिरा, तै जाणै तम्हैं बच़ी किल्हैकि परमेशर आसा हुंह ई, मुखा सुआई निं होर कोहै आथी।

फारसी राज़अ कुस्रू आसा बिधाता आप्पै राज़अ छ़ांटअ द। तेऊ आसा खास्सै देशा प्रैंदै राज़ करना लै डाहअ द, बिधाता छ़ाडा तेऊ जुधा करदै कि सह देशा-देशे राज़ै आंघै-जैंघै करे, बिधाता घुआल़ा तेऊ लै नगरी-नगरीए प्रऊल़ी एही कि तेखअ निं तिंयां बंद हंदी। राज़ै कुस्रू लै बोला बिधाता इहअ

मेरी गल्‍ला हआ शुची अर अटल़। हुंह दैआ आपणैं सोह खाई ज़बान, ‘सोभ एछणैं मुंह सेटा अर सोभी टेक्‍कणअ मुंह सेटा माथअ अर सोभी काढणैं मेरै नाओंए सोह।’

मंऐं आसा तूह डाहअ द कि तूह मेरै दास याकबे आद-लुआद इज़राईलीए मज़त करे ज़ुंण मंऐं आप्पू लै आसा छ़ांटै दै। तूह, निं मुंह बछ़ैणदअ पर मंऐं किअ तूह बडी पदबी दी बशैल़ी खास्सअ मशूर।