2 Corinthians 12:10

Միայն պատկերացրու, թե ինչե՜ր կարող էիր անել, եթե Տերը Իր պարգևներով զիներ քեզ։ Խորհի՛ր քո ծառայության կամ կյանքի մասին, եթե քո միջոցով գործեին Աստծո Սուրբ Հոգու գերբնական պարգևները։ Աստված Իր Խոսքում մեզ հորդորում է խնդրել Իրեն հոգևոր պարգևների համար և փնտրել Իր երեսը։

Աստված սիրում է քեզ և քո կողքին է քեզ օգնելու համար։ Համարձակությամբ մոտեցի՛ր Նրա շնորհի աթոռին։ Աղոթքով գնա՛ Տիրոջ առջև ու քո գոհության և երախտագիտության փառաբանությունը մատուցի՛ր Նրան։ Նաև խնդրի՛ր օգնություն քո իրավիճակի համար։ Քո արժեքը չի որոշվում մարդկանց ունեցած վերաբերմունքով։ Քո արժեքը միայն Աստված կարող է որոշել, և Նա քեզ շատ թանկ է գնահատել։ Հնազանդությամբ ապացուցված կենդանի հավատքը դուռ է բացում քո կյանքում Տեր Աստծու գործելու համար։ Աստված քեզնից հոգևոր աճ, հասունություն և ամրություն է ակնկալում, որին հասնելու համար մենք պետք է դառնանք աշակերտներ։

Եթե այսօր դու անցնում ես դժվարություններով ու բախվել ես անհուսության անանցանելի թվացող պատնեշին, կորցրել ես ներսիդ խաղաղությունն ու ուրախությունը, ապա կա՛ բարի լուր քեզ համար: Անհուսությունը հիվանդության պես է, սակայն Տիրոջը հուսացողները Նրա վերքերով կարող են նաև այդ հիվանդությունից բժշկվել։ Աստված փնտրում է սրտով փշրված մարդկանց, որպեսզի նրանց ամրացնի ու վերականգնի։ Նա Իր զարմանահրաշ շնորհն է պատրաստել՝ որպես պարգև յուրաքանչյուր մարդու համար, որ Նրա օգնության կարիքն ունի իր կյանքում։ Նրա շնորհի պարգևն ընդունելու համար մենք պետք է մեր հավատքի ձեռքերը պարզենք Նրա ուղղությամբ։