Забур 73
73
ЧкӀанвай ибадатханадихъ шел
1Асафан шиир.
Я Аллагь, вучиз Вуна
чун инкарна даим яз?
Вучиз Ви хъел Ви яйлахрин хперал
алахьна кузва?
2Дегь заманрилай Вуна хкягъайбур рикӀел хкваш,
Ви ирсинин тайифа,
Вуна азад хъувурбур
рикӀел хкваш,
Вун вичел хьайи Сигьан дагъ рикӀел хкваш.
3Виш йисарилай инихъди авай харапӀайрихъ,
пакханадиз душманди
гъайи вири чкӀайвилихъ
элкъуьр ая камар Ви.
4Душмандин къал-къиж гьатна Ви КӀвалин цлара,
Ви чка ацӀана пайдахривди абурун.
5Гуя тамун яцӀа
абурун нажахри ийизвай ванер,
6затӀни амачиз чукӀур авуна
нехишар алай цлар
яргъи тум галай
ва сив гирде нажахрив абурун.
7ЦӀув вугана ви пакхана чукӀурна,
Ви ТӀварцӀин КӀвал кьацӀурна.
8Фикирна чпин рикӀяй:
«Чна абур тергда михьиз»,
Аллагьдиз икрамдай чкаяр
вири кана.
9Ишараяр аквазмач чи вилериз,
пайгъамбарар амач мад,
идан эхир мус жедатӀа
чидай садни амач чи арада.
10Я Аллагь, бес гьикьван яргъалди
рахшанддин хъвер ийида душманди,
мидяди Ви тӀварцӀик
даиман хкуьриз жедани?
11Вучиз Вуна гъил къахчузва кьулухъди,
жуван эрчӀи гъил?
Ракъура ам абурал, ягъ абур.
12Аллагь! Эвел заманрилай Пачагь зи!
Вуна гана чилериз куьмек.
13Вуна Жуван къуватдив пай авунва гьуьл,
Вуна гьуьлуьн пилийрин кьилер кукӀварна.
14Вуна кукӀварна кьилер аждагьандин,
тӀуьн паталди вугана ам кьурумдин ничхиррив.
15Вуна чиляй акъудна чешмени булах,
ацӀай вацӀарай Вуна кьур акъудна.
16Вибур я югъни йиф,
рагъни варз – кар я Ви гъилерин.
17Вуна чилиз часпарар эцигна,
халкь авуна гадни кьуьд.
18РикӀел хкваш, я Ребби,
душмандин рахшанд квай хъуьруьнар
ва Ви тӀварцӀик хкуьрзавай ахмакь халкь.
19Ви тӀапӀасдин чан ничхиррив вугумир,
Ви язухрин уьмуьрар
алуд мийир са чӀавузни рикӀелай.
20Килиг Жуван Икьрардиз,
куьз лагьайтӀа ацӀанва чил
мичӀивилив, зулуматдив.
21Зулумдик квайди русвагь хьана тахтурай,
саилдини, муьгьтеждани
Ви тӀварцӀин тариф авурай.
22Къарагъ, Аллагь, хуьх Жуван кар,
рикӀел хкваш
ахмакьда Вак яргъи югъди
хкуьрнатӀа гьикӀ.
23Жуван душманрин гьараяр,
Ви мидяйри акъваз тийиз
акъудзавай къал
алуд мийир рикӀелай.
Արդեն Ընտրված.
Забур 73: ЛезПК
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© Институт перевода Библии, 2010-2024