Забур 134
134
Аллагьдин зурба крар
1Тариф ая Реббидин!
Тариф ая Реббидин тӀварцӀин!
Адан тариф ая, Реббидин лукӀар,
2акъвазнавайбур Реббидин КӀвале,
алайбур а КӀвалин гъенел!
3Тариф ая Реббидин, вучиз лагьайтӀа
Ам хъсанди я:
Адан тӀварцӀиз мани лагь,
им хуш кар я,
4вучиз лагьайтӀа Реббиди Вичиз
хкяна Якьуб,
Вичин эменни авуна
Исраилдикай.
5Эхь, заз чида Ребби чӀехи тирди,
чи Агъа вири аллагьрилай виневайди,
6цаварални чилерал,
гьуьлерални гургусра
Вичиз вуч герек ятӀа, вири ийизва
Реббиди чи.
7Чилин пипӀерай хкажзава булутар,
марф къвадайла цӀайлапанар ягъиз тазва,
Вичин зирзимийрай
ахъайзава гар.
8Ада Мисрида телефна сифтегьан ругулар
инсандилай малдал кьван.
9Ада, Мисри, ви къенез
керемат-ишараяр, аламатар ракъурна
фиръаванар ва адан лукӀар патал.
10Ада гатана гзаф халкьар,
яна кьена къуват авай пачагьар:
11амарийрин пачагь Сигьан,
Башандин пачагь Аг
ва Къенандин вири пачагьлугъар;
12Ада чилер абурун вахгана ирс яз
Вичин халкьдив, Исраилдив, ирс яз.
13Ви тӀвар, Ребби, даим я,
несилдилай несилдиз физ, Вун рикӀе ава.
14Реббиди Вичин халкь гьахъардай дуван ийида,
Вичин лукӀариз Ада регьим ийида.
15Халкьарин бутар – къизилни гимиш –
кар я инсандин гъилерин.
16Рахаз тежер сивер ава абуруз,
акваз тежер вилер ава абуруз,
17ванер текъвер япар ава абуруз,
сивер ава нефес авачир.
18Бутар туькӀуьрзавайбур ва абурук умуд кутурбур
чеб гьабуруз ухшар я.
19Шукур ая Реббидиз, Исраилдин халкь!
Шукур ая Реббидиз, Гьарунан сихил!
20Шукур ая Реббидиз, Левидин тухум!
Реббидикай кичӀедайбур, шукур ая Адаз!
21Шукур хьуй Ваз Сигьандилай, я Ребби,
Ярусалимда уьмуьр тухузвай!
Тариф ая Реббидин!
Արդեն Ընտրված.
Забур 134: ЛезПК
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© Институт перевода Библии, 2010-2024