Աստվածաշնչի հայտնի հատվածներ HEBREOS 13-ից

Կիսվել

Niźaśa anćhukki anaź päśqaś peka; ni anćhuka źelinśnakallźtan kuntintuź qama, Yöśki tuź khićha: “Werhki anapan am ekaćha niźaśa anapan xaytaćha.”

Jesucriśtuki śeśkumi, töximi, niźaśa watay watxapa nïpachaćha.

Xalla nuź ućhumnakki ana jiwjatźku chiyasaćha: “Ni Yöś Tataki werh yanapñićha; neqhśtan werhki anal eqhsnaćha: ¿Ti źoñinakaki xaqhnuźt werh päsaxo?”

Niźaśa anćhukki anaź ni śumanaka päś thatźna, niźaśa ni anćhuka źelinśnaka yaqhanakźkiś toxunśnakkiśtanami; xalla ti śuma pätanakaćha Yöś quś chipqatñiki.

Xalla niźtikiśtan ućhumnakki Jesucriśtuź qharkiśtan Yöś alt'iśpanź wakiśićha. Xalla ti ućhumnakaź alt'itaki tshi wilanaźtaqaśśa. ¡Ućhumnakki perśun atpulźtanź Yöś alt'ilalla!

Niźaśa thappacha źoñinakaki ni śalźtax waqaychila, niźaśa ninakaź kaśarta śuma ch'uwax waqaychila; Yöśki ni iź iźñi źoñinaka niźaśa iźiwir źoñinakaź juchjiptayakićha.

Niźaśa anćhukki ni anćhuka qhuykiś thonśñi źoñinakźtan thapa quśtanpanź khella, anćhukakiśtan yaqhapanakaki ana śiśku anjilanaka qhuykiś qhawśićha.

Ni śuma qamañchiś Yöśki ućhumnaka Jesucriśtu tikhśikiśtan jakatatsqatchićha, niźaśa nïki chawkh üśi awatirićha, xalla nïki perśun lhokhźtan ti watay watxapa palt'ita thulśićha, niźaśa nïki anćhuk źkayi quśśiś niźaśa thapa ćhhultaqkiśimi śumapanx khisqatla, niźaśa nïź quś pektakama oqaxu; niźaśa nïki ućhunnakatan nïź quś pektakamax päla ni Jesucriśtuź qharkiśtan. ¡Niźaśa Criśtuki watay wata aśśiśx khila! Xalla nuźox khila.