2 Corinthians 7
7
1ထို့ကြောင့်ချစ်မိတ်ဆွေတို့၊ ဤကတိတော်များသည်ကား အကျွန်ုပ်တို့အတွက်ဖြစ်သည်။ သို့ဖြစ်၍ အကျွန်ုပ်တို့သည် မိမိတို့၏ ကိုယ်ခန္ဓာနှင့်စိတ်ဝိညာဉ်ကိုညစ်ညမ်းစေသောအရာတို့မှကင်းစင်စေ၍ ဘုရားရှင်ကိုကြောက်ရွံ့ရိုသေခြင်းအားဖြင့် မိမိတို့ကိုယ်ကိုလုံးဝဖြူစင်သန့်ရှင်းစေကြကုန်လော့။ 2အကျွန်ုပ်တို့အပေါ်ထားသော သင်တို့၏ချစ်ခြင်းမေတ္တာကိုကြီးမားစေကြလော့။ အကျွန်ုပ်တို့သည် မည်သူ့ကိုမျှ မပြစ်မှားခဲ့။ မည်သူ့ကိုမျှမဖျက်ဆီးခဲ့။ မည်သူ့ကိုမျှအမြတ်မထုတ်ခဲ့။ 3ဤသို့ပြောသည်မှာ သင်တို့ကိုအပြစ်တင်လို၍မဟုတ်ပေ။ ယခင်အကျွန်ုပ်ပြောခဲ့သည့်အတိုင်း သင်တို့သည် အကျွန်ုပ်တို့၏ နှလုံးသားထဲ၌ သေအတူရှင်မကွဲရှိနေကြသောကြောင့်ဖြစ်သည်။ 4အကျွန်ုပ်သည် သင်တို့ကိုအလွန်ယုံကြည်စိတ်ချ၍ သင်တို့အတွက်ဂုဏ်ယူသည်။ အကျွန်ုပ်သည်နှစ်သိမ့်မှုကို အပြည့်အဝရရှိသဖြင့် ဆင်းရဲဒုက္ခအမျိုးမျိုးနှင့် ရင်ဆိုင်ရသော်လည်းဝမ်းမြောက်လျက်ရှိသည်။ 5မာကေဒေါနိပြည်သို့ အကျွန်ုပ်တို့ရောက်သောအခါ အကျွန်ုပ်တို့သည်စိတ်သက်သာရာရသည်ဟူ၍မရှိ။ ပြင်ပအတိုက်အခိုက်များ၊ အတွင်းကြောက်စိတ်များဖြင့် အဘက်ဘက်မှနှိပ်စက်မှုများကိုခံရကြသည်။ 6သို့သော်လည်း အားငယ်သောသူတို့ကို နှစ်သိမ့်ပေးတော်မူသော ဘုရားရှင်သည် တိတုရောက်လာခြင်းအားဖြင့် အကျွန်ုပ်တို့ကိုနှစ်သိမ့်ပေးတော်မူသည်။ 7တိတုရောက်လာသည့်အတွက်ကြောင့်သာမက သင်တို့ထံမှနှစ်သိမ့်အားပေးမှုကို တိတုခံစားရကြောင်း ကြားသိရသည့်အတွက်ကြောင့်လည်း အကျွန်ုပ်တို့သည်ဝမ်းမြောက်ကြရသည်။ သင်တို့သည် အကျွန်ုပ်ကို အလွန်တွေ့လိုကြောင်း၊ အလွန်ဝမ်းနည်းကြောင်း၊ ကျွန်ုပ်အတွက်စိတ်အားထက်သန်ကြောင်းစသည်တို့ကို တိတုပြောပြသောကြောင့် အကျွန်ုပ်သည်ပို၍ပင်ဝမ်းမြောက်ရသည်။ 8အကျွန်ုပ်ပို့လိုက်သောစာကြောင့် သင်တို့ဝမ်းနည်းရလျှင်လည်း ထိုစာရေးမိသည့်အတွက် အကျွန်ုပ် စိတ်မကောင်းမဖြစ်ပါ။ အစဦးတွင် အကျွန်ုပ်စိတ်မကောင်းဖြစ်ခဲ့ရသော်လည်း အကျွန်ုပ်ရေးလိုက်သောစာကြောင့် သင်တို့ဝမ်းနည်းရသည်မှာ ခဏသာဖြစ်သောကြောင့် 9ယခုအကျွန်ုပ်ဝမ်းမြောက်ပါသည်။ သင်တို့ဝမ်းနည်းခဲ့ရသည့်အတွက်မဟုတ်ပါ။ သင်တို့၏ ဝမ်းနည်းခြင်းသည် သင်တို့ကို နောင်တရစေသောကြောင့်ဝမ်းမြောက်ခြင်းဖြစ်သည်။ သင်တို့သည် ဘုရားရှင်၏ အလိုတော်နှင့်အညီ ဝမ်းနည်းကြရသည်ဖြစ်၍ အကျွန်ုပ်တို့ကြောင့်နာကျင်ရသည်ဟူ၍မရှိခဲ့ပေ။ 10ဘုရားရှင်၏ အလိုတော်နှင့်ညီသောဝမ်းနည်းခြင်းသည် ကယ်တင်ခြင်းကိုရရှိစေမည့် နောင်တစိတ်ကို ဖြစ်ပေါ်စေပြီး ပူဆွေးဝမ်းနည်းရခြင်းမျိုးမရှိပေ။ သို့သော် လောကီနှင့်ဆိုင်သော ဝမ်းနည်းခြင်းသည် သေခြင်းတရားကိုဖြစ်ပေါ်စေသည်။ 11ဘုရားရှင်၏ အလိုတော်နှင့်ညီသော ဝမ်းနည်းခြင်းသည် သင်တို့အထဲတွင် မည်သည့်အရာများ ဖြစ်ပေါ်စေသည်ကိုကြည့်ကြလော့။ မှန်သောအရာကို လုပ်ဆောင်ရန်ကြိုးစားအားထုတ်ကြလေပြီ။ အပြစ်ကင်းကြောင်းချေပလိုကြလေပြီ။ မိမိတို့၏အပြစ်အတွက်ယူကျုံးမရဖြစ်ကြလေပြီ။ အလွန်ကြောက်ရွံ့ကြလေပြီ။ အလွန်တောင့်တကြလေပြီ။ အလွန်စိတ်အားထက်သန်ကြလေပြီ။ အပြစ်ရှိသူအား ပြစ်ဒဏ်ပေးရန်အသင့်ဖြစ်ကြလေပြီ။ ဤအမှု၌ သင်တို့သည် မိမိကိုယ်ကိုယ်အပြစ်ကင်းကြောင်း အဘက်ဘက်မှ ပြသကြပြီဖြစ်သည်။ 12ထို့ကြောင့် သင်တို့ထံသို့ အကျွန်ုပ်စာရေးလိုက်သော်လည်း ထိုသို့ရေးရခြင်းမှာ ပြစ်မှားသောသူအတွက်ကြောင့် မဟုတ်သကဲ့သို့ နစ်နာသောသူအတွက်ကြောင့်လည်းမဟုတ်။ သင်တို့သည် ဘုရားရှင်ရှေ့တော်တွင် အကျွန်ုပ်တို့ကိုမည်မျှချစ်ခင်ရိုသေကြကြောင်း မိမိကိုယ်ကိုမြင်နိုင်ရန်သာဖြစ်သည်။ 13ဤအရာအားလုံးကြောင့် အကျွန်ုပ်တို့အားတက်ကြရသည်။ အကျွန်ုပ်တို့ရရှိသော ခွန်အားအပြင် တိတုသည် သင်တို့အားဖြင့်ဝမ်းမြောက်ရသည်ဖြစ်၍ သူ၏စိတ်နှလုံးရွှင်လန်းခြင်းကြောင့် အကျွန်ုပ်တို့သည် ပို၍ ဝမ်းမြောက်ကြသည်။ 14အကျွန်ုပ်သည်တိတုအားသင်တို့အကြောင်းကိုကြွားဝါခဲ့သည်။ ယင်းသို့ကြွားဝါသည့်အတိုင်းဟုတ်မှန်ကြောင်းကိုသင်တို့ပြသလိုက်ပေသည်။ အကျွန်ုပ်တို့သည်သင်တို့အားဟုတ်မှန်ရာကိုသာလျှင်အစဉ်ပြောခဲ့သည်။ တိတုအားအကျွန်ုပ်တို့ကြွားဝါပြောဆိုခဲ့သောအရာများသည်လည်းဟုတ်မှန်လျက်ရှိနေပေသည်။ 15သူ၏စကားကိုသင်တို့လိုက်နာရန်အသင့်ရှိကြသည်ကိုလည်းကောင်း၊ ကြောက်ရွံ့တုန်လှုပ်လျက်သူ့အားကြိုဆိုလက်ခံကြသည်ကိုလည်းကောင်းသူသည်သတိရသဖြင့် သင်တို့အားပို၍ပင်ချစ်ခင်မြတ်နိုးလာပေသည်။ 16အကျွန်ုပ်သည် သင်တို့ကိုအရာရာ၌ ယုံကြည်စိတ်ချရသောကြောင့်ဝမ်းမြောက်လျက်ရှိပါသည်။
Jelenleg kiválasztva:
2 Corinthians 7: TPV-RV
Kiemelés
Megosztás
Összehasonlít
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.