2 Corinthians 6
6
1အကျွန်ုပ်တို့သည် ဘုရားရှင်၏လုပ်ဖော်ဆောင်ဖက်များဖြစ်ကြသည်နှင့်အညီ သင်တို့သည် ဘုရားရှင်၏ကျေးဇူးတော်ကို အချည်းနှီးမဖြစ်စေကြနှင့်ဟု သင်တို့အားတိုက်တွန်းနှိုးဆော်ပါသည်။ 2အဘယ်ကြောင့်ဆိုသော် ဘုရားရှင်သည် “ငါသည် ကျေးဇူးပြုရန် သင့်လျော်သောအချိန်၌ သင့်စကားကို နားထောင်ခဲ့ပြီ။ ကယ်တင်သောနေ့ရက်၌ သင့်ကိုကူညီမစခဲ့ပြီ” ဟုမိန့်တော်မူခဲ့သည်။ ယခုအချိန်သည် ဘုရားရှင်၏ကျေးဇူးတော်ကို ခံစားကြရမည့်အချိန်ပင်ဖြစ်သည်။ ယခုအချိန်သည် ကယ်တင်တော်မူရာနေ့ရက်ပင် ဖြစ်သည်။ 3အကျွန်ုပ်တို့၏အလုပ်နှင့်ပတ်သက်၍ မည်သူမျှအပြစ်မရှာနိုင်စေရန် အကျွန်ုပ်တို့သည်အခြားသောသူတို့၏ရှေ့၌အနှောင့်အယှက်တစ်စုံတစ်ခုကိုမျှမပြုပေ။ 4ထိုသို့ဖြစ်စေမည့်အစား အကျွန်ုပ်တို့သည် ဆင်းရဲဒုက္ခများ၊ အကျပ်အတည်းများ၊ အခက်အခဲများကို အလွန်သည်းခံလျက် ဘုရားရှင်၏အစေခံများဖြစ်ကြောင်းကိုသာပေါ်လွင်စေကြရမည်ဖြစ်သည်။ 5ရိုက်နှက်ခံရခြင်း၊ ထောင်ကျခြင်း၊ ရုန်းရင်းဆန်ခတ်ပြုလုပ်ခံရခြင်း၊ အလုပ်ပင်ပန်းခြင်း၊ အိပ်ရေးပျက်ခြင်း၊ အစာပြတ်လပ်ခြင်းတို့ကိုသည်းခံကြရမည်။ 6ဖြူစင်ခြင်း၊ အသိဉာဏ်ပညာရှိခြင်း၊ စိတ်ရှည်ခြင်းနှင့် ကျေးဇူးပြုခြင်းတို့ဖြင့်လည်းကောင်း၊ ဉာဏ်အလင်းတော် ကိုနာခံခြင်း၊ စစ်မှန်သောချစ်ခြင်းမေတ္တာရှိခြင်း၊ 7မင်္ဂလာသတင်းကောင်းကိုဟောပြောခြင်း၊ ဘုရားရှင်၏တန်ခိုးတော်ကိုပြခြင်းတို့ဖြင့်လည်းကောင်း၊ လက်ဝဲ လက်ယာ၌ ကိုင်ဆောင်ထားသည့်ဖြောင့်မတ်ခြင််လက်နက်များအားဖြင့်လည်းကောင်း၊ 8ချီးမွမ်းခံရခြင်းနှင့် ကဲ့ရဲ့ခံရခြင်း၊ အကောင်းပြောခံရခြင်းနှင့် မကောင်းပြောခံရခြင်းအားဖြင့်လည်းကောင်း အရာရာတို့၌ ဘုရားရှင်၏အစေခံများဖြစ်ကြောင်းကိုပေါ်လွင်စေကြရမည်ဖြစ်သည်။ အကျွန်ုပ်တို့သည် လှည့်ဖြားသူများကဲ့သိုသတ်မှတ်ခြင်းခံရသော်လည်း ဖြောင့်မှတ်သောသူများသာဖြစ်ကြရမည်ဖြစ်သည်။ 9တချို့သည် အကျွန်ုပ်တို့ကို သာဝကများအဖြစ် အသိအမှတ်မပြုကြသော်လည်း အကျွန်ုပ်တို့သည် ထင်ပေါ်ကျော်ကြားသောသူများဖြစ်ကြသည်။ သေလူကဲ့သို့ဖြစ်သော်လည်း အသက်ရှင်ကြသူများဖြစ်သည်။ အပြစ်ဒဏ်ပေးခြင်းခံရသော်လည်းအသတ်မခံကြရပေ။ 10ဝမ်းနည်းသောသူများကဲ့သို့ဖြစ်သော်လည်း အစဉ်အမြဲဝမ်းမြောက်ကြသည်။ ဆင်းရဲသောသူကဲ့သို့ဖြစ် သော်လည်း လူအမြောက်အမြားကို ချမ်းသာစေကြသည်။ မည်သည့်အရာမျှမရှိသောသူကဲ့သို့ဖြစ်သော်လည်း အရာအားလုံးကိုပိုင်ဆိုင်ကြသည်။ 11ကောရိန္သုမြို့သားတို့၊ အကျွန်ုပ်တို့သည် သင်တို့အားပွင့်လင်းစွာပြောဆို၍ သင်တို့အပေါ်ထားသော အကျွန်ုပ်တို့၏မေတ္တာမှာလည်းကြီးမားလှပါသည်။ 12အကျွန်ုပ်တို့သည် သင်တို့အပေါ်ထားသော မေတ္တာတရားကို ကန့်သတ်ပိတ်ပင်ထားသည်မဟုတ်ပေ။ သင်တို့ကသာ အကျွန်ုပ်တို့အပေါ်ထားရမည့်မေတ္တာတရားကိုကန့်သတ်ပိတ်ပင်ထားခြင်းဖြစ်သည်။ 13သို့ဖြစ်၍ ပြန်လည်တုံ့ပြန်သောအနေဖြင့် “အကျွန်ုပ်တို့အပေါ်ထားသော သင်တို့၏မေတ္တာကိုလည်း ကြီးမားစေကြလော့” ဟုမိမိသားသမီးများကိုပြောသကဲ့သို့အကျွန်ုပ်ပြောလိုသည်။ 14မယုံကြည်သောသူတို့နှင့် တွဲဖက်၍မလုပ်ဆောင်ကြနှင့်။ ဖြောင့်မတ်သောသူနှင့် တရားမဲ့သောသူသည် မည်သို့ တွဲဖက်၍လုပ်ဆောင်နိုင်မည်နည်း။ အလင်းနှင့် အမှောင်သည်မည်သို့ဆက်စပ်ယှဉ်တွဲ၍နေနိုင်မည်နည်း။ 15ယေရှုခရစ်တော်နှင့် နတ်ဆိုးဖြစ်သော ဗေလျာလအကြား မည်ကဲ့သို့သဘောတူညီမှုရှိနိုင်မည်နည်း။ ယုံကြည်သူနှင့် မယုံကြည်သူအကြား မည်ကဲ့သို့အကျိုးတူခံစားနိုင်မည်နည်း။ 16ဘုရားရှင်၏ ဗိမာန်တော်သည် ရုပ်တုတို့နှင့် မည်ကဲ့သို့ပတ်သက်စပ်လျဉ်းမှုရှိမည်နည်း။ ဘုရားရှင်သည် “ငါသည် သူတို့နှင့်အတူနေထိုင်၍ သူတို့ထဲတွင်သွားလာမည်။ ငါသည် သူတို့၏ ဘုရားရှင်ဖြစ်၍ သူတို့သည်လည်း ငါ၏လူမျိုးဖြစ်ကြလိမ့်မည်” ဟုမိန့်တော်မူသည့်အတိုင်း အကျွန်ုပ်တို့သည် အသက်ရှင်တော်မူသောဘုရားရှင်၏ ဗိမာန်တော်ဖြစ်ကြသည်။ 17ထို့ကြောင့် ဘုရားရှင်သည် “ထိုသူတို့အထဲမှထွက်ခဲ့ကြလော့။ သူတို့နှင့်အပေါင်းအသင်းမလုပ်ကြနှင့်။ မသန့်ရှင်းသောအရာကိုလက်နှင့်ပင်မထိနှင့်။ ဤသို့ဆိုလျှင် အကျွန်ုပ်သည်သင်တို့ကိုလက်ခံမည်။ 18ငါသည် သင်တို့၏ဖခင်ဖြစ်မည်။ သင်တို့သည်လည်း ငါ၏သားသမီးများဖြစ်ကြလိမ့်မည်” ဟုအနန္တတန်ခိုးနှင့် ပြည့်စုံတော်မူသောဘုရားရှင်သည်မိန့်တော်မူခဲ့သည်။
Jelenleg kiválasztva:
2 Corinthians 6: TPV-RV
Kiemelés
Megosztás
Összehasonlít
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.