1 Timothy 1
1
1ကျွန်ုပ်တို့၏ ကယ်တင်ရှင်ဖြစ်တော်မူသော ဘုရားရှင်နှင့် ကျွန်ုပ်တို့၏ မျှော်လင့်ရာဖြစ်တော်မူသော ယေရှုခရစ်တော်တို့၏ အမိန့်တော်အတိုင်း ထိုယေရှုခရစ်တော်၏ သာဝကဖြစ်သော ကျွန်ုပ်ပေါလု စာရေးလိုက်ပါ၏။ 2ယုံကြည်ခြင်းအားဖြင့် ကျွန်ုပ်၏ သားအရင်းအချာဖြစ်သော တိမောသေထံသို့ စာရေးလိုက်ပါ၏။ ကျွန်ုပ်တို့၏ အဖဘုရားရှင်နှင့် အရှင်ယေရှုခရစ်တော်တို့ထံမှ ကျေးဇူးတော်၊ ကရုဏာနှင့် ငြိမ်သက်ခြင်းတို့ သင့်အပေါ် သက်ရောက်ပါစေသော။ 3မာကေဒေါနိပြည်သို့ ကျွန်ုပ်သွားစဉ် သင့်ကို တိုက်တွန်းနိုးဆော်ခဲ့သည့်အတိုင်း သင်သည် ဧဖက်မြို့တွင် နေရစ်၍ လူတချို့ကို လွဲမှားသောဩဝါဒများ မသွန်သင်ကြရန်နှင့် 4ဒဏ္ဍာရီများ၊ မဆုံးနိုင်သောဆွေစဉ်မျိုးဆက်စာရင်းများကို အာရုံမစိုက်ကြရန် မှာကြားလော့။ ထိုအရာများသည် ယုံကြည်ခြင်း၌တည်သော ဘုရားရှင်၏ အမှုတော်ထက် အငြင်းပွားမှုများကိုသာ ဖြစ်စေ၏။ 5ဤသို့ ပညတ်ရသည့် ရည်ရွယ်ချက်မှာ စင်ကြယ်သောစိတ်နှလုံး၊ ကြည်လင်သော အသိစိတ်နှင့် စစ်မှန်သောယုံကြည်ခြင်းတို့မှ ဖြစ်ပေါ်လာသော ချစ်ခြင်းမေတ္တာဖြစ်၏။ 6လူအချို့သည် ထိုအရာတို့မှ သွေဖည်ကာ အနှစ်သာရမဲ့သော စကားများကိုသာ ပြောဆိုလာကြ၏။ 7သူတို့သည် မိမိတို့ပြောဆိုသောအရာများ သို့မဟုတ် မိမိတို့ အခိုင်အမာစွဲကိုင်ထားသောအရာများကိုပင် နားမလည်ဘဲ ကျမ်းတတ်ဆရာများ ဖြစ်လိုကြ၏။ 8ပညတ်တရားကို မှန်ကန်စွာ ကျင့်သုံးလျှင် ပညတ်တရားသည် ကောင်းမြတ်ကြောင်း ကျွန်ုပ်တို့သိကြ၏။ 9ပညတ်တရားသည် ဖြောင့်မတ်သူတို့အတွက် ချမှတ်ထားသည်မဟုတ်ဘဲ တရားမဲ့သောသူများ၊ ပုန်ကန်ထကြွသူများ၊ ဘုရားတရားကင်းမဲ့သောသူများ၊ အပြစ်သားများ၊ မြင့်မြတ်မှုမရှိသောသူများ၊ ဘုရားတရားမကိုင်းရှိုင်းသူများ၊ မိဘကို သတ်သူများ၊ လူသတ်သမားများ၊ 10အိမ်ထောင်ရေးဖောက်ပြန်ကြသူများ၊ လိင်တူချင်းမေထုန်ပြုသူများ၊ လူကုန်ကူးသူများ၊ လိမ်လည်သူများ၊ မမှန်သောသက်သေခံသူများနှင့် မှန်ကန်သောဩဝါဒကို ဆန့်ကျင်သမျှသောအရာတို့အတွက် ချမှတ်ထားကြောင်း ကျွန်ုပ်တို့ သိကြသောကြောင့် ဖြစ်၏။ 11ဤသည်ကား ကောင်းချီးပေးတော်မူသော ဘုရားရှင်၏ ဘုန်းတန်ခိုးကြီးသော မင်္ဂလာသတင်းကောင်းနှင့် ညီ၏။ ထိုမင်္ဂလာသတင်းကောင်းကို ဟောပြောရန် ဘုရားရှင်သည် ကျွန်ုပ်ကို တာဝန်ပေးတော်မူ၏။ 12ကျွန်ုပ်ကို ခွန်အားပေးတော်မူသော ကျွန်ုပ်တို့၏အရှင်ဖြစ်သော ယေရှုခရစ်တော်သည် ကျွန်ုပ်ကို ယုံကြည်ထိုက်သူဟု မှတ်ယူကာ အမှုတော်ကို ဆောင်ရွက်ရန် ခန့်အပ်ထားသောကြောင့် ထိုအရှင်ကို ကျွန်ုပ်ကျေးဇူးတင်၏။ 13တစ်ချိန်က ကျွန်ုပ်သည် စော်ကားပြောဆိုသောသူ၊ ညှဉ်းပန်းနှိပ်စက်သူ၊ ရိုင်းစိုင်းကြမ်းကြုတ်သူ ဖြစ်ခဲ့၏။ ကျွန်ုပ်သည် ယုံကြည်ခြင်းမရှိစဉ် အမှန်မသိဘဲပြုခဲ့ခြင်းဖြစ်သောကြောင့် ကရုဏာတော်ကိုခံစားခဲ့ရ၏။ 14ကျွန်ုပ်တို့၏အရှင်သည် အလွန်ကြွယ်ဝသောကျေးဇူးတော်ကို ကျွန်ုပ်အပေါ်၌ သွန်းလောင်းတော်မူသဖြင့် ကျွန်ုပ်သည် ယေရှုခရစ်တော်အားဖြင့် ယုံကြည်ခြင်းနှင့် ချစ်ခြင်းမေတ္တာကို ရရှိ၏။ 15ယေရှုခရစ်တော်သည် အပြစ်သားများကို ကယ်တင်ရန် ဤလောကသို့ ဆင်းကြွလာသည်ဟူသော စကားသည် လုံးဝမှန်ကန်ပြီး အပြည့်အဝလက်ခံထိုက်၏။ ထိုအပြစ်သားများအနက် ကျွန်ုပ်သည် အဆိုးဆုံးဖြစ်၏။ 16သို့သော်လည်း ယေရှုခရစ်တော်သည် အဆိုးဆုံးဖြစ်သူ ကျွန်ုပ်အပေါ် သူ၏ အဆုံးမဲ့သည်းခံခြင်းကို ဖော်ပြရန် ရည်ရွယ်သောကြောင့် ကျွန်ုပ်အပေါ် ကရုဏာထားတော်မူ၏။ ဤသည်ကား ကိုယ်တော်ကို ယုံကြည်၍ နိစ္စထာဝရအသက်ကို ရရှိကြမည့်သူများအတွက် ကျွန်ုပ်ကို စံနမူနာအဖြစ် ထားရန်ဖြစ်၏။ 17နိစ္စထာဝရဘုရင်ဖြစ်တော်မူသော၊ ထာဝရအသက်ရှင်တော်မူသော၊ မျက်စိဖြင့်မမြင်နိုင်သော၊ တစ်ဆူတည်းသော ဘုရားရှင်သည် ကမ္ဘာအဆက်ဆက် ဂုဏ်ကျက်သရေ၊ ဘုန်းတန်ခိုးတော် ရှိတော်မူပါစေသော။ အာမင်။ 18ကျွန်ုပ်၏သား တိမောသေ၊ တစ်ချိန်က သင်နှင့်ပတ်သက်၍ ကြိုတင်ဟောပြောခဲ့သော အရာများနှင့်အညီ သင့်ကို ကျွန်ုပ်ဤညွှန်ကြားချက်ကို ပေး၏။ သို့မှသာ ထိုဟောပြောချက်များကို လိုက်နာခြင်းဖြင့် တိုက်ပွဲကို ကောင်းစွာ တိုက်ခိုက်နိုင်ရန် ဖြစ်၏။ 19ခရစ်တော်ကို ဆက်၍ ယုံကြည်ပြီး မိမိကိုယ်ကိုယ် လိပ်ပြာသန့်စွာနေလော့။ အချို့သောသူတို့သည် မိမိတို့၏အသိတရားကို လျစ်လျူရှုခြင်းဖြင့် သူတို့၏ ယုံကြည်ခြင်းသည် သင်္ဘောပျက်သဖွယ် ဖြစ်လာ၏။ 20ထိုသူတို့ထဲတွင် ဟုမေနဲနှင့် အလက်ဇန်းဒါးတို့ ပါဝင်ကြ၏။ သူတို့သည် ဘုရားရှင်ကို စော်ကားပြောဆိုခြင်း မပြုသင့်ကြောင်း သွန်သင်ဆုံးမခြင်းခံရစေရန် ကျွန်ုပ်သည် သူတို့ကို မာရ်နတ်လက်သို့ အပ်လိုက်၏။
Jelenleg kiválasztva:
1 Timothy 1: TPV-RV
Kiemelés
Megosztás
Összehasonlít
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.