Matayo 21
21
Yesu tsùw Yerusalemu ò pey níchú
(Mak 11:1-11; Lwk 19:28-40; Yoh 12:12-19)
1Yesu ndèymí ndèy kodjú kpa nà tdè chow shìdha nà Yerusalemu ò ro, ndrǔ shì Betfage mí bba dè, Òlívè tsúw mí ngòw djú. Yesu kâ rwo nì ndèy kodjú kpa cho ndèy nji ò. 2À tdrà ndrǔ dhò, “Nyì ra ndèy nì nyì njìó nì bba ò, ndèymí nyì rà kànà chùw ka chèy ndèy těyngba nà ndèy kàtéy. Nyì kló ndrǔ ndèymí nyì mba ma dè. 3Ya li rò tdrà lò nyì dhò, nyì tdra fú li dhò, ‘Ddrǒngóli nì ndrǔ jǐ ndey,’ ndèymí ndùw à rà ley nyì rǎ ndrǔ nà.”
4Í ddiy njèy tdè ndèy, ndaní cha nabi tdrà tdè nì lò shǐ dìchú,
5“Tdrà Sayuni mí ddrǒngó ní bba ó bbalè dhò,
‘Nja, nyìdhí pey nì shǐ nyì dè,
à nì bbò ndèymí à nì bbiy kànà djú,
ndèymí kànà téyngba djú.’ ”#21:5 Zakariya 9:9.
6Yesu kodjú kpa rà ndèymí ndrǔ njèy cha Yesu tdrà ì njěy níchú. 7Ndrǔ mbà kànà ndèymí těyngba nà, ndrǔ kpì ì ró rù ndrǔ djú ndèymí Yesu dòw djòmà. 8Bíy ní bbalè kpì ì ró rù tuw ó, njàddí ndrǔ kwò tsúw gi-lá ndèymí ndrǔ kpì tuw ó. 9Cha ì dà Yesu njìó nì bbalè mí njuw ndèymí ì mà à dzzdjú nì ndrǔ dêy swa,
“Madha pey Dawuddi mí Ddùwnì dhò!
Bû nì cha ndèy shì Ddrǒngóli ró dho ó nì li dhò!#21:9 Ngwo-kpà 118:26.
Madha Ddrà dhò ru pléy ní rakpa ò nì!”
10Yesu tsùw Yerusalemu ò ro, ddrǒngó ní bba ónga dzò ngbùw ndèy ndèymí ndrǔ dhîy, “Fúní áyì?” 11Bbalè mí njuw ngù lò, “Í nì Yesu, Nazareti ó nabi, Galilaya mí ngòw óddù nì.”
Yesu dîy bbalè Ddrà nzz̀dha mí thí ní nga óddù
(Mak 11:15-19; Lwk 19:45-48; Yoh 2:13-22)
12Yesu tsùw Yahuddi-ddúw dhí Ddrà nzz̀dha mí thí ní nga ò, ndèymí à dîy bbalè wá cha ì tdè ddiy dzz ndèymí ì tdè ddiy ónga dzz fungá nì. À ngbô mb ónga lídha-djá dhí mězà ndèymí à ngbô ì nì bbǎlá ónga dzz nì ndrǔdhí dòwdha mí tsúw. 13À tdrà ndrǔ dhò, “À ndîy ndèy Ddrǎ-ngá ndíydha-ní-lò ó, ‘Màtsá dza ka rà iy Ddrà nzz̀dha mí dza ní,’#21:13 Isaya 56:7. chú nyì nì ngǔ gbu-djá ru nì ì mí nga ní!”#21:13 Yeremiya 7:11.
14Ì nyú mûw nì ndrǔ ndèymí ì-koko dhì nì ndrǔ shì Yesu dè Ddrà nzz̀dha mí thí ní nga ò, ndèymí à lêy ndrǔ rónga djì. 15Chú Ddrǎ-ngá dyǎ-djá djú kpa ndèymí Musa-ngá yǎdha mí li-gwíydha-djá njà wá li ónga ꞌwiy dhomà nì ddiy cha à njèy tdè nì, ndrǔ njà ddí nzòw dêy swa Ddrà nzz̀dha mí thí ní dza mí bbay djú, “Madha pey Dawuddi mí Ddùwnì dhò.” Thǒw lòw ndrǔ.
16Ndrǔ dhîy Yesu, “Nyi ní ney í nzòw nì tdrǎ nì lò rř?”
Yesu ngù lò, “Òní. Nyì zǒw nzá í lò Ddrǎ-ngá ndíydha-ní-lò ó?
“ ‘Ddrǒngóli, nyi gwîy dùdú ní nzòw ndèymí kà ní nzòw nà,
ndrǔ bbú madha nyi dhò.’#21:16 Dyì 8:2.”
17Yesu bbà ndrǔ ndèymí à rà Betaniya mí bba ò, cha à shì ddù mí nga ò.
Yesu wâ fígì-tsúw
(Mak 11:12-14,20-24)
18Bbǔtss̀ ró prř bbǔbbú nganà, Yesu tdè ngu ví ddrǒngó ní bba ò ro, ɦùw dêy à njěy. 19À njà fígì ní ka íy nì nì tsúw tuw gitéy, à rà à dè, chú à chùw ddiy rò nzá rǒmá, gi nì chúddì. À kâ tdrà fú tsúw dhò, “Nyi kà nzá nyi ꞌwǒ nyi tsi ddíyàchú.” Ndùwndùw fú tsúw lòw dey ꞌwǐy.
20Yesu kodjú kpa njà í ddiy ro, ndrǔ ónga ꞌwìy wá. Ndrǔ dhîy, “Í tsúw ꞌwǐy ŋǎchú zěy-zěy?”
21Yesu ngù lò, “Manì nyì dhò dìchú ní lò tdrǎ, ya nyì nì ùwdha nà ndèymí nyì thíy nì ngǎ pàka ní, nyì dho nzǐ cha ndèy njèy ndèy tsúw ró nì ddiy njèy chúddì. Nyì ddí dho tdrà í ngòw dhò, ‘Ddá nyi, ngbo nyi ju-ddà ò,’ ndèymí à rà ndèy njèy. 22Ya nyì ùw, nyì rà cha nyì dhîy nyìdhí Ddrà nzz̀dha ó nì ddiy kwo.”
Lò-dhíydha Yesu tdè ndanà nì klôw ró
(Mak 11:27-33; Lwk 20:1-8)
23Yesu tsùw Yahuddi-ddúw dhí Ddrà nzz̀dha mí thí ní nga ò ddíyàchú, ndèymí cha à tdè li-gwiy ro, Ddrǎ-ngá dyǎ-djá djú kpa ndèymí drò-dró ní ndrǔ nà shì à dè. Ndrǔ dhîy à, “Nyi ní í ddiy njěy ŋá klôw nà? Ndèymí áyì bbú ndey nyi dhò í klôw?”
24Yesu ngù lò, “Ma ddí rà nyì dhiy ddì nì lò nà. Ya nyì ngù màtsá lò, ma rà tdrà nyì dhò ŋá klôw nà ma nì í ddiy njěy ddiy. 25Yohana mí klôw bàtízò bbúdha mî shǐ ŋangá ddù? À shǐ tdè Ddrà dèddù, ǐngí bbalè dèddù?”
Ndrǔ pà lò ì kàó ìníddù ndèymí ndrǔ tdrà, “Ya mà tdrà, ‘Ddrà dèddù,’ à rà dhiy, ‘Nyì ǔw Yohana nzá ddudhò?’ 26Chú ya mà tdrà, ‘Bbalè dèddù,’ mà nì cha bbalè rà njèy mà ró nì ddiy mí nyí nà, ddiydhò bbalè wánì ùw Yohana tdè nabi.” 27Fú ddiy dhò, ndrǔ ngù lò Yesu dhò, “Mà tsì nzá.”
À tdrà ndrǔ dhò, “Ma ddí rà tdrà nzǐ nyì dhò ya ŋá klôw nà ma nì í ddiy njěy ddiy.
Lò-ngbòdha kpa-ní-nzòw rwo nì ró
28“Nyì ní ddu ddey í lò-ngbòdha ró? Njaddí kpatss̀-ní-li tdè ney ddúwní nà rwo. À rà ddíydjò ní ddùwnì dè à kâ tdrà, ‘Màtsá ddùwnì, ra njí njèy ndu dìváyì-ngìy nzà ó.’
29“À ngù lò, ‘Nzǐ manì rǎ,’ chú luwtéy à lî ndèymí ddeydha ndèymí à rà.
30“Li-dja kâ rà njàddí ddùwnì dè ndèymí à tdrà à dhò ddì nì lò jì. À ngù lò, ‘Òní ma dja,’ chú à rà nzá.
31“Í rwo nì kpa-ní-nzòw kàó ddù ŋánì njěy ndey djǎnì jì nì ddiy?”
Ddrǎ-ngá dyǎ-djá djú kpa ndèymí drò-dró ní ndrǔ nà ngù lò, “Ddíydjò ní ddùwnì.”
Yesu tdrà ndrǔ dhò, “Manì nyì dhò dìchú ní lò tdrǎ, mùsórò njúwdha-djá ndèymí bbǎlà njèydha-djá nà rà tsùw Ddrà mí pey-mí-nga ò nji nyì dhò. 32Yohana shì nyì dè chěy ní tuw dhòdha nà. Nyì ùw à nzá. Chú mùsórò njúwdha-djá ndèymí bbǎlà njèydha-djá ùw à. Nyì njà tdè í ddiy ro, nyì lî nyì-dhà rónga nzá ndèymí nyì ùw à ddí nzá.”
Lò-ngbòdha dìváyì-ngìy nzà ó ì nì njí njěy nì ndrǔ ró
(Mak 12:1-12; Lwk 20:9-19)
33“Nyì rr njàddí lò-ngbòdha. Nza-dja rò tdè ney cha ndèy tdòw dìváyì-ngìy nì. À lêy kaley ròmà luw gbrǔ, à bbî bbuw dìváyì-tsi zźdha mî ndèymí à ss̀ rónga pbòdha mí ru ka ss̀ nì dza. À ka dìváyì-ngìy nzà bba njí-djá dhokpa ò ndèymí à kâ rà ndèymí bbiydha ò. 34Dìváyì-tsi njúwdha mí nga shì tdè ro, à chô nděyngá nokpa njí-djá dè, ndrǔ rǎ ndèy rr̀dja ónì dìváyì-tsi zz̀.
35“Njí-djá lòw ǎngá nokpa, ndrǔ dhèy ddì nì, ndrǔ hwì njàddí ndèymí ndrǔ brr̂ gbow nì mî djuw nà. 36Nza-dja kâ njàddí nokpa cho ndrǔ dè, à da ddì nga nà, à chô tdè nì djòluw ndèymí njí-djá njèy ddìkàddì nì lò ndrǔ ró. 37Luwtéy, à chô déy ní ddùwnì ndrǔ dè. À tdrà, ‘Ndrǔ rà màtsá ddùwnì dò njèy ney.’
38“Chú njí-djá njà tdè ddùwnì ro, ndrǔ tdrà ì dhò ìníddù, ‘Í nì nza-dja mí ddùwnì. Nyì ra mà hwǐ à ndèymí àmí ddiy rà mà màdhí ní.’ 39Fú ddiy dhò, ndrǔ lòw à, ndrǔ ngbò à rúgò dìváyì-ngìy nzà óddù, ndèymí ndrǔ hwì à.”
40Yesu dhîy, “Dìváyì-ngìy nzà mí ddrǒngóli rà shì ro, à rá ddu njèy fú njí-djá ró?”
41Ndrǔ ngù lò, “À rà fú ngǎjìní bbalè hwì ngǎjìní hwìdha nà. Ndèymí à rà dìváyì-ngìy nzà bbu ngéy ní njí-djá dhokpa ò, cha ì rà à dhò dìváyì-tsi bbu cha dìváyì-tsi tsò njuwdha mí nga shì ro.”
42Yesu tdrà ndrǔ dhò, “Nyì zǒw nzá í lò Ddrǎ-ngá ndíydha-ní-lò ó?
“ ‘Dza ss̀dha-djá gù nì djuw,
ngû tdêy djú djuw ní.
Ddrǒngóli njèy tdè í ddiy,
ndèymí à nì wá li ónga ꞌwíy dhomà nì ddiy mà nyú djú.’#21:42 Dyì 118:22,23.
43“Fú ddiy dhò, ma nì tdrǎ nyì dhò Ddrà mí pey-mí-nga ka rà dda gu nyì dèddù ndèymí ka rà bbu bbalè dhò cha ì rà lǎní ì tsi ꞌwò nì. 44Cha ndèy rà chèy í djuw djú nì li, rà ndèy kwò ngéy-ngéy, chú í djuw rà chèy ndèy djú nì li, à rà ndeyli ónga hwà vǐy.”#21:44 Njàddí ndíydha-ní-lò ó í versi nì ngǎ.
45Ddrǎ-ngá dyǎ-djá djú kpa ndèymí Farisayo ní kpa nà rr̀ Yesu ngá lò-ngbòdha ro, ndrǔ tsì à tdè lò tdrǎ ì ró. 46Ndrǔ mèy tuw ì lǒw à, chú ndrǔ tdè bbalè mí njuw mí nyí nà, ddiydhò ndrǔ ùw Yesu nì nabi.
Chwazi Kounye ya:
Matayo 21: NDRULO
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© Wycliffe Bible Translators, Inc., © SIL Uganda, All rights reserved