Matayo 22
22
Lò-ngbòdha ków mí madha mí nyû ró
(Lwk 14:15-24)
1Yesu tdrà lò í Ddrǎ-ngá dyǎ-djá djú kpa ndèymí Farisayo ní kpa dho ddíyàchú lò-ngbòdha nà. À tdrà, 2“Rakpa mí pey-mí-nga nì ǐchú. Pey ní li rò tdè ney cha ndèy thì tdè ków mí madha mí nyû ddùwnì dho nì. 3À chô nděyngá nokpa cha ì îy tdè ków mí madha mí nyû dhò nì lu dè, ndrǔ rǎ tdrà ndrǔ rǎ. Chú ndrǔ gù ràdha nà.
4“À kâ njàddí nokpa cho í ddì nì lò-ɦéy nà lu dè, ‘Nyì tdra cha ì ka îy nì ndrǔ dhò, “Ma thì màtsá nyû ŋà. Màtsá mǎ ní ndrr̀tsś ndèymí ndèy vù nì ndrr̀tsś ka jì, ndèymí wánì ddiy nì ney. Nyì ra ków mí madha mí nyû dè.”’
5“Chú, ka îy tdè ì nì bbalè ddêy fú lò djú nzá. Ndrǔ ndrr̂ ì ìdhí ddiy njèydha nà. Ddì nì rà nděyngá nza ò, njàddí rà ndèymí njí mí nga ò. 6Njàddí ndrǔ lôw fú nokpa ka dhèy ndèymí ka ndrǔ hwì. 7Thǒw lòw pey. Fú ddiy dhò, à chô nděyngá la-dzàdha-djá, ndrǔ hwǐ cha ì hwì tdè nděyngá nokpa nì bbalè ndèymí ndrǔ běy ndrǔ dhí ddrǒngó ní bba.
8“À kâ tdrà nděyngá nokpa dhò, ‘Ków mí madha mí nyû nì ney, chú ma îy nì ndrǔ kâ nzá ndanà. 9Nyì ra tuw tsò rá ò ndèymí nyì íy nyì rà chùw nì bbalè wá ndrǔ rǎ ków mí madha mí nyû dè.’ 10Fú ddiy dhò, ǎngá nokpa kâ rà tuw ò ndèymí ndrǔ njûw bbalè wá cha ì chùw nì, lǎní nì ndèymí ngǎjìní nì nà, ndèymí ków mí dza kì lu nà.
11“Pey tsùw tdè dzá rà ka îy nì lu njà ro, à njà ddì li, cha nzá ndèy thô ków mí madha mí rù nì. 12À dhîy, ‘Dyǎ, nyi tsǔw ingá ŋǎchú ngǎ ków mí madha mí rù ní?’ Fúli mèy kpéy ndèy tdrà nì lò.
13“Pey kâ tdrà nděyngá nokpa dhò, ‘Nyì chey à-dhokpa ndèymí à-koko nà, nyì ngbò à rúgò, kúw ní nga ò. Fulè ndrǔ rà dzz̀ ì kuw kádha nà.’”
14Yesu tdyâ nděyngá lò tsò, “Ka îy nì ndrǔ nì bíy, chú ka vû nì ndrǔ nì drá.”
Mùsórò bbúdha Roma mí dziylíy ó ddrǒngó ní pey dhò
(Mak 12:13-17; Lwk 20:20-26)
15Farisayo ní kpa rà rúgò ndèymí ndrǔ ddêy lò, ndaní ì kí Yesu cha à nì tdrǎ nì lò ó. 16Farisayo ní kpa kâ ì kodjú kpa rò cho à dè ndèymí pey Herodde Antipas ngá kpa nà. Ndrǔ kâ tdrà, “Li-gwíydha-dja, mà tsì nyi tdra nì dìchú ní lò. Nyi gwíy nì bbalè dìchú ní lò cha Ddrà nì jǐ bbalè njěy nì. Nyi ónga tdo nì nzǐ bbalè ddéy nì nì lò dhò, ddiydhò nyi ddéy nì nzǐ ya áyì ndeyli nì ddiy djú. 17Tdra mà dhò, nyi ní ddu ddey? Musa-ngá yǎdha ǔw ŋà mà bbú mùsórò Roma mí dziylíy ó ddrǒngó ní pey#22:17 Roma mí dziylíy ó ddrǒngó ní pey. Ddrǒngó ní dho Roma ó pey dhî nì, Kayisari. dhò ǐngí nzá?”
18Yesu tsì tdè ŋà ndrǔdhí ngǎjìní ddeydha, ndèymí à kâ tdrà, “Nyì lò-shúwdha-djá, ddudhò nyì ní ddey nyì kí ma? 19Nyì dho ma dhò mb-ho cha ka bbú nì ndanà mùsórò nì.” Ndrǔ mbà à dhò mb-ho ddì. 20Yesu kâ ndrǔ dhiy, “Í ní áyì mí ɦiy ndèymí dho nà?”
21Ndrǔ ngù lò, “Roma mí dziylíy ó ddrǒngó ní pey mî.”
Yesu kâ tdrà ndrǔ dhò, “Nyì bbú pey mí ddiy pey dhò ndèymí Ddrà mí ddiy Ddrà dhò.”
22Ndrǔ rr̀ í lò mí nga nà, ndrǔ ónga ꞌwìy wá. Ndrǔ bbà à ndèymí ndrǔ kâ rà à róddù.
Lò-dhíydha djiy ní ngúdha dhì óddù nì ró
(Mak 12:18-27; Lwk 20:27-40)
23Fú ddì nì ddu ó, Saddukayo ní kpa cha ì tdra nì, ngúdha djiy ní dhi óddù nì, nì ngǎ nì, kâ shì Yesu dè. 24Ndrǔ tdrà, “Li-gwíydha-dja, Musa tdrà, ya kpatss̀-ní-li dhì nzá ndèy gòw nzòw ní, à kà djûnì ngǔ ndèy dhì nì djûnì ngá ɦìytss ndèymí ndrǔ gǒw nzòw à dhò.#22:24 Yǎdha 25:5-6. 25Ddì li ngá kpa-ní-nzòw tdè zargbòw. Ddì nì kòw sǐngba ndèymí à dhì, à gòw nzòw nzá, à bbà nděyngá dza-yà djûnì dhò. 26Ddìkàddì nì ddiy njèy ndèy rwo nì mí djûnì ró ndèymí gbow nì mí ró ndèymí à njèy ndèy zargbòw nì djúní ró wá. 27Luwtéy, fú ɦìytss-ní-li ddí dhì. 28Njanja, ngúdha djiy ní dhi óddù mí nga rà shì ro, fú li rá dey áyì ngá dza-yà ní? Ddiydhò ndrǔ kòw tdè à wá ì nì mí nga ró.”
29Yesu ngù lò, “Nyì tsì lò nzá. À nì nyì tsì nzá Ddrǎ-ngá ndíydha-ní-lò ǐngí Ddrà mí klôw ddiydhò. 30Ngúdha djiy ní dhi óddù mí nga rà shì ro, bbalè rà dey rakpa ó malayika-kpà níchú ndèymí nzǐ ndrǔ rà ì kòw. 31Chú bbalè dhí ngúdha djiy ní dhi óddù nì mí lò, nyì zǒw nzá cha Ddrà kâ tdrà nyì dhò nì ddiy ó? À tdrà, 32‘Manì Abrahamu ngá Ddrà, Isaka ngâ ndèymí Yakobbo ngá nà.’#22:32 Ngbídha 3:6. À nì ngǎ ì dhì nì ndrǔdhí Ddrà, chú djiy ní bbalè dhî.”
33Bbalè mí njuw rr̀ í lò ro, ndrǔ ónga ꞌwìy wá àmí gwíydha ró.
Ddrǒngó ní yǎdha
(Mak 12:28-34; Lwk 10:25-28)
34Farisayo ní kpa rr̀ Yesu shì tdè Saddukayo ní kpa djòluw lò nà ro, ndrǔ njûw ì ddìngaó. 35Ndrǔ kàó ddì li cha ndèy tsì Musa-ngá yǎdha nì, ddêy Yesu í lò-dhíydha nà, 36“Li-gwíydha-dja, ŋá yǎdha ní ndey ddrǒngó tǐ à da njàddí djòluw wá?”
37Yesu ngù lò, “ ‘Ji Ddrǒngóli nyìmí Ddrà nyi thíy nà wá, nyìmí djiy nà wá ndèymí nyìmí ddeydha nà wá.’#22:37 Yǎdha 6:5. 38Í nì ddì nì mí ddrǒngó tǐ ní yǎdha ndèymí tǔw ndèy ɦuwdjò nà nì Ddrǎ-ngá wánì yǎdha kàó. 39Ndèymí rwo nì mí nì ǐchú, ‘Ji nyi dyási, gbè nyi jì nyi níchú.’#22:39 Lawi 19:18. 40Musa-ngá yǎdha ndèymí nabi-kpà dhí li-gwíydha ddí wá dèy í rwo nì yǎdha ró.”
Masiya nì Dawuddi mí ddùwnì ndèymí bbalè wánì dhí Ddrǒngóli
(Mak 12:35-37; Lwk 20:41-44)
41Fú Farisayo ní kpa tdè sǔw fungá ro, Yesu dhîy ndrǔ, 42“Nyì ddéy ní ddu Masiya ró? Áyì mí ddùwnì ní ndey?”
Ndrǔ ngù lò, “Pey Dawuddi mí Ddùwnì.”
43À tdrà ndrǔ dhò, “Ddudhò, Bblǒ Thíy mí klôw nà, Dawuddi íy Masiya ‘màtsá Ddrǒngóli’ ní? Dawuddi tdrà,
44“ ‘Ddrǒngóli Ddrà tdrà màtsá Ddrǒngóli dhò,
“Dow ingá ví djú nì ma dhokpa djòluw,
pbǔw ma rà nyìmí ndrò-djá ley
nyi-koko ss̀téy.” ’#22:44 Dyì 110:1.
45Ya Dawuddi îy Masiya ‘màtsá Ddrǒngóli’ ní, ŋǎchú à dho dey Dawuddi mí ddùwnì ní?” 46Li rò tdè ngǎ cha ndèy dho lò rò ngù Yesu dho nì, ndèymí à nga ndèy fú nga djúddù li rò nì ngǎ cha ndèy ddêy ndèy dhíy Yesu ngéy ní dhíydha nà nì.
Chwazi Kounye ya:
Matayo 22: NDRULO
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© Wycliffe Bible Translators, Inc., © SIL Uganda, All rights reserved