Matayo 20
20
Lò-ngbòdha dìváyì-ngìy nzà ó njí-djá ró
1“Rakpa mí pey-mí-nga nì ǐchú. Ddì nì nza-dja tdè ney cha ndèy tdè nděyngá dìváyì-ngìy nzà nà nì. À rà brr̀ bbǔ-bbúnga nà bbalè mèy cha ì kà ì njěy njí nděyngá nza ò nì. 2À rr̀ tdè ndèy njí-djá nà ddì nì ddu mí njí-kobì djú dìnárì ddì ddì ddiy-dzzdjú, à kâ ndrǔ cho ndrǔ rǎ njí njèy nděyngá dìváyì-ngìy nzà ò.
3“À rà rúgò sâ gbow nì djú bbǔ-bbúnga mî. À njà njàddí ndrǔ dèy vúní ddiy ónga dzźdha mí nga ó, ngǎ ì nì njěy nì njí ní. 4À tdrà ndrǔ dhò, ‘Nyì ddí nyì ra njí njèy màtsá dìváyì-ngìy nzà ò, ndèymí ma rà nyì dhò ndèy kâ nì njí-kobì bbu.’ 5Fú ddiy dhò, ndrǔ rà tdè.
“À rà tdè ddíyàchú sâ za ndèymí sâ drrdhiy nì ró rúgò. 6Sâ dri ndèy djú ddì nì nà, à rà ddiy ónga dzźdha mí nga ò ndèymí à chùw njàddí ndrǔ dèy sǔw fungá. À dhîy ndrǔ, ‘Ddudhò nyì děy tdǔw ingá ngǎ nyì nì njěy nì ddiy ní?’
7“Ndrǔ ngù lò, ‘Njàddí li rò nì ngǎ cha ndèy bbû njí mà dhò nì.’
“À tdrà ndrǔ dhò, ‘Nyì ddí nyì ra njí njèy màtsá dìváyì-ngìy nzà ò.’
8“Nga shì ngítss̀ djú ro, dìváyì-ngìy nzà mí ddrǒngóli tdrà ndèy nì nza djú nga njǎ nì li dhò, ‘Íy njí-djá ndèymí bbú ndrǔdhí njí-kobì, low bbu cha ì shì luwtò nì ndrǔ dhò ndèymí nyi sí cha ì shì nji nì ndrǔ nà.’
9“Cha ka bbû tdè ì dhò njí sâ dri ndèy djú ddì nì nà nì ndrǔ shì tdè ro, ka bbû ndrǔ dhò dìnárì ddì ddì ndrǔ nì mí nga ró. 10Njanja, ì ngà tdè njí tsò nji nì ndrǔ shì tdè ro, ndrǔ ddêy tdè, ì rà njí mí ì kobì chùw à da njàddí ndrǔ dhí djòluw. Chú ndrǔ wá chùw ddí ddìkàddì ní njí mí ì kobì. 11Ndrǔ kwô tdè ìdhí mb ro, ndrǔ lòw dey ndru nza-dja ró. 12Ndrǔ tdrà, ‘Í kpa cha ì shì tdè luwtò nì, njèy njí sâ ddì nì dhò. Mà njèy njí tdǔw itsś mí líy-líy ní nga ó, chú nyi bbû ndrǔ kobì ddìkàddì màdhí nà!’
13“À ngù lò ndrǔ kàó ddì li dhò, ‘Dyǎ, manì nyi njěy ngǎ ngǎjìní. Mà rř mà nzá nyi nà, nyi rà njí njèy dìnárì ddì nì dhò ddiy? 14Tdúw nyìmí mb ndèymí nyi rǎ. Ma nì jǐ ma bbú cha ì njèy tdè njí luwtò nì ndrǔ dhò ddìkàddì nyi nà. 15Ma dhó nzǐ ma jùw jì nì ddiy njèy wá màtsá mb nà? Ǐngí ddudhò dyǎ ní nyi njěy ya ma nì jǐ ma bbú ddiy ma thíy nà njàddí ndrǔ dhò ro?’”
16Yesu tdyâ nděyngá lò tsò, “Fú ddiy dhò, ì mà luwtò nì ndrǔ rà dà nji, ndèymí ì dà nji nì ndrǔ rà mà luwtò.”
Yesu tdrà lò ndèymí dhi djú gbow nì mî
(Mak 10:32-34; Lwk 18:31-34)
17Yesu tdè rǎ Yerusalemu ò. Tuw ó à tdûw dri ndèy djú rwo nà nì ndèy kodjú kpa nga gi djò ndèymí à tdrà ndrǔ dhò, 18“Mà nì rǎ Yerusalemu ò, ndèymí ka rà ma Ndrǔ-Ddùw dhotèy bbu Ddrǎ-ngá dyǎ-djá djú kpa dè ndèymí Musa-ngá yǎdha mí li-gwíydha-djá nà. Ndrǔ rà dhi tdèy ma djú. 19Ndrǔ rà ma bbu ngǎ ì nì Yahuddi-ddúw ní nì ndrǔ dhokpa ò. Ndrǔ rà ma tsò gbù ndèymí ndrǔ rà ma dhèy shí nà, ndèymí ndrǔ rà ma cho musalabba djú. Chú ddu gbow nì ó, Ddrà rà ma ngù djiy ní dhi óddù.”
Yakobbo mí yânì màgò Yohana nà kwô ddiy Yesu tsò ró
(Mak 10:35-45)
20Zibiddayo ngá dza-yà kâ shì rwo nì ddúwní nà Yesu dè, ndèymí à kwò ndèy bbi à nyú djú. À dhîy Yesu njěy lǎní ddiy ndèy dho.
21Yesu dhîy, “Nyi ní ddu jǐ?”
À tdrà, “Ma nì nyi kwo, léy màtsá í rwo nì ma ddúw kàó ddì li dǒw ví òluw nì nyi-dhokpa djú ndèymí njàddí dǒw gǔw òluw nì nyi-dhokpa djú nyǐngá pey-mí-nga ò.”
22Yesu ngù lò, “Nyì tsì nzá nyì nì dhiy nì ddiy. Nyì dhó ney ma nì rǎ mbù nì dyá ní nzadha mí kǒpù mbù?”
Ndrǔ ngù lò, “Ney mà dho mbù.”
23Yesu tdrà ndrǔ dhò, “Nyì rà mbù dìchú màtsá dyá ní nzadha mí kǒpù óddù, chú ma nì ngǎ klôw nà vúdha nà áyì rà dòw màtsá ví òluw nì nga là djò ndèymí gǔw nà. Í nga nì cha ma Dja thì ì dho mí nga nì ndrǔ dhò.”
24Njàddí Yesu kodjú kpa dri nì rr̀ tdè í lò ro, thǒw lòw ndrǔ í rwo nì djúní ró. 25Fú ddiy dhò, Yesu îy ndrǔ wá ddìngaó ndèymí à tdrà, “Nyì tsi, ngǎ ì nì Yahuddi-ddúw ní nì ndrǔ dda nì ìdhí bbalè djùkpa klôw nà, ndèymí ndrǔ dhí li-djùkpa ddàdha-djá nì dzò ní klôw nà cha ì nì ì djùkpa ddǎ nì ndrǔ djú. 26Í ddiy kà nzá ndey njěy ndèy nyì kàó fǔchú. Ya ndèy jì ndèy ngú ddrǒngó nyì kàó nì li, à kà fú li déy nyìdhí nokpa ní. 27Ndèy jì ndèy déy nji li ní nì li, à kà fú li déy nyìdhí piy ní. 28Ma Ndrǔ-Ddùw ma rà dziylíy djò ngǎ ka njěy ma dhò, chú ma njěy bbalè dhò ndèymí ma bbú màtsá djiy, ndaní ma ngá bíy ní bbalè.”
Yesu djì ì nyú mûw nì rwo nì kpa nyú Yeriko ó
(Mak 10:46-52; Lwk 18:35-43)
29Yesu ndèy kodjú kpa nà tdè Yeriko mí ddrǒngó ní bba bbǎ ro, bíy ní bbalè dyòw à. 30Ì nyú mûw nì rwo nì kpa dêy dǒw tuw tsò ró. Ndrǔ rr̀ tdè Yesu nì dǎ ro, ndrǔ swâ, “Ddrǒngóli, pey Dawuddi mí Ddùwnì, njey mà zòw!”
31Bbalè mí njuw tdrà ndrǔ dhò, “Nyì déy chíy.” Chú ndrǔ swâ ddí rí, “Ddrǒngóli, pey Dawuddi mí Ddùwnì, njey mà zòw!”
32Yesu dèy ndèymí à îy ndrǔ. À dhîy, “Nyì ní jǐ ma njěy ddu nyì dhò?”
33Ndrǔ ngù lò, “Ddrǒngóli, mà nì jǐ mà njǎ nga.”
34Yesu njèy zòw-lò ndrǔ ró ndèymí à mbû ndrǔ nyú. Ndùw ndrǔ lòw nga njà ndèymí ndrǔ dyòw à.
Chwazi Kounye ya:
Matayo 20: NDRULO
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© Wycliffe Bible Translators, Inc., © SIL Uganda, All rights reserved