Marko 13
13
Enyigîrizo z’okuyûrha kw’igulu. Enshokolezi
(Mat 24, 1-3; Luk 21, 5-7)
1Erhi abà akola ahuluka omu ka-Nyamuzinda, muguma omu baganda bâge amubwîra, erhi: «Waliha, lolà aga mabuye n’obu bûbake!» 2Naye Yezu erhi ashuza, amubwîra, erhi: «K’obwîne obwo bûbake? Ntà ibuye lyâyôrhe oku lindi: byoshi byayish’ishâbwa». 3Erhi abà akola abwârhîre oku ntondo y’emizêti, ayêrekîre ebwa ka-Nyamuzinda, Petro bo na Yakôbo na Yowane n’Andreya bamudôsa bufunda, mpu: 4«Orhubwîre mangaci okwo kwâbè n’ecâbè cimanyîso oku ebyo byoshi biri hôfi».
Omurhondêro gw’amalibuko
(Mat 24, 4-14; Luk 21, 8-19)
5Okubundi Yezu arhondêra ababwîra, erhi: «Mumanye ntâye oyishig’i mmurheba. 6“Banji bayishe oku izîno lyâni, baderhe, mpu”: “Nie (Kristu)”, “banarhebe bantu banji”. 7“Amango mwâyumve baderha ebîrha n’emihigo y’ebîrha, murhayôbohaga; bulya kukwânîne ebyo birhang’iyisha, ci obuzinda erhi burhaciba”. 8“Ishanja lyârhêre elindi ishanja, n’obwâmi obundi bwâmi. Omusisi gw’idaho gwayish’ibà hanji, hâbè n’ecizombo”. “Ebyo gwo murhondêro gw’amalibuko”. 9“Ninyu mucîmanye”: “mwayish’ihânwa omu rhugombe, munashûrhirwe omu masinagogi, mwâhêkwe embere z’abarhegesi n’abâmi nie ntumire, oku kubà bahamîrizi embere zâbo”. 10“Emyanzi y’Akalembe yarhang’iyish’iyigîrizibwa omu mashanja goshi”. 11“N’amango bâmmugwârhe mpu bamuhâne, murharhanyagya mpu cici mwaderha; ci oluderho lwâmmuyishire muli ago mango gonênè, lwo muderhage”: “bulya arhali mwe mwâderhe, ci Mûka Mutagatîfu”. 12“Obwo omuntu ayish’ihâna mwene wâbo mpu bamuyîrhe, n’îshe w’omwâna ahâna omugala; nabo abâna bayish’irhabâlira ababusi, banabayîrhe”. 13“Mwayish’ishombwa n’abantu boshi izîno lyâni lirhuma; ci owayôrhe ali mwinjà kuhika olusiku luzinda, oyo ye wâcunguke”».
Amalibuko g’e Yeruzalemu
(Mat 24, 15-25; Luk 21, 21-24)
14«Amango mukabona ebibî bibî biri aha birhakwânîni#13, 14 Omu hantu hatagatîfu (Mat 24, 14). okubà, -Owasoma ayumve, - obwo abâli omu cihugo c’e Yudeya bayâkire oku ntondo; 15“oli oku burhungiri bw’enyumpa arhacimanukiraga omu nyumpa mpu arhôle akantu kalimwo”; 16“n’oli omu ishwa arhashubiraga eka mpu arhôle ecishûli câge”. 17“Abakazi bali izîmi n’abayonsa ago mango, basômerwa!” 18“Mushenge okwo kurhabâga omu mango g’empondo!” 19“Bulya ezo nsiku zâbà za malibuko garhasâg’iboneka kurhenga Nyamuzinda alema igulu kuhika buno, garhakanaciboneka bundi”. 20“N’acibâga Nnâmahanga arhanyihyagya ezo nsiku ntà muntu wankacizire; ci ezo nsiku azinyihize abîshogwa bàrhuma”. 21“Ago mango erhi mwankabwîrwa n’omuntu, mpu”: “Lolà, Kristu oyu oli hano, nîsi erhi hala, murhayêmêraga”. 22“Bulya bayish’iyisha ba-Kristu b’obwîhambi n’abalêbi b’obunywesi banji, banayish’ijira ebimanyîso n’ebirhangâzo mpu barhebe ciru n’abîshogwa acibà kwankahashikana”. 23“Ninyu mumanyage”: “mmulêbire#13, 23 Obwo bulêbi buyêrekîre bibiri: okushâbwa kwa Yeruzalemu, omu mwâka gwa 70, n’okuyûrha kw’igulu. byoshi”».
Okuyisha kwa Mwene-omuntu
(Mat 24, 29-31; Luk 21, 25-27)
24«Ci muli ezo nsiku, enyuma y’ago malibuko, izûba lyâbà mwizizi n’omwêzi gurhâcibashe, 25enyenyêzi zâmanuka oku nkuba n’eby’oku nkuba byâgeramwo omusisi. 26Go mango babone Mwene-omuntu ayishire omu bitù n’obuhashe n’irenge linji. 27Obwo anarhuma bamalahika bâge bashûbûze abîshogwa bâge empande ini z’igulu, kurhenga aha igulu lihekîre kuhika emalunga bwenêne».
Amango okwo kwâbè
(Mat 24, 32-36; Luk 21, 29-33)
28«Mulole olwiganyo oku mulehe. Amashami gagwo erhi gashabuka n’erhi ebibabi bikumera, munamanye oku ecanda ciri hôfi. 29Ninyu ntyo, amango mwâbone ebyo, mumanye oku ali hôfi, oku ahika aha lusò. 30Mmubwîre okuli, eri iburha lirhagere n’ebyo byoshi birhabà. 31Irunga n’igulu#13, 31 Irunga n’igulu kuli kuderha: ebiremwa byoshi. byâgere, ci nderho zâni zirhakagera. 32Ci olwo lusiku n’ako kasanzi, ntâye obimanyire, ciru bamalahika b’empingu, ciru n’Omugala#13, 32 «Ciru n’Omugala»: kuli kuderha oku arhankaderha olwo lusiku., ntà wundi aha nyuma ly’Îshe yênene».
Okubà masù n’okucîrheganya
(Mat 24, 42; 25, 13-15; Luk 19, 12-13; 12, 38-40)
33«Mumanye, mubè masù, bulya murhamanyiri amango okwo kwâbè. 34Nka kulya omuntu wabalamaga: Aleka enyumpa, aha abambali obuhashe ngasi muguma omu mulimo gwâge, akomêreza omulanzi mpu abè masù. 35Kuziga mubè masù, bulya murhamanyiri mangaci nn’enyumpa ayisha: erhi bijingo, erhi aha karhî k’obudufu erhi oluhazi lubika, erhi sêzi, 36lyo akayish’imurhibukira, alek’immushimâna muli îrò. 37N’okwo mmubwîzire, boshi nkubwîzire: mubè masù!»
Chwazi Kounye ya:
Marko 13: MKB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Mashi Bible © BUKAVU Archdiocese of Bukavu, 2024.