Marko 14
14
V. Amababale, okufà n’okufûka kwa Yezu
Abashombanyi ba Yezu balagânana okumuyîrha
(Mat 26, 2-5; Luk 22, 1-2)
1Hali hacisigîre nsiku ibiri embere z’olwa-Basâka n’olw’emigati erhali mwo lwango. Abajinji n’abashamuka b’ihano bakâg’ilonza oku bankamugwârha n’obwenge n’oku bankamuyîrha. 2Ci bakaderha mpu: «Arhali oku lusiku lukulu, akadugundu kalek’izûka omu lubaga».
Yezu abulagirwa amavurha g’omugavu omu irhwe
(Mat 26, 6-13; Ywn 12, 1-8)
3Erhi Yezu abà ali e Betaniya omu mwa Simoni mushomyo, abwârhîre adwîrhe alya, hâyisha mukazi muguma, wali odwîrhe enjebe y’amavurha nkana g’omugavu g’engulo ndârhi. Anacibera erya njebe, amudubulira gulya mugavu oku irhwe. 4Baguma omu bàhali bagwârhwa n’omutula, banaderha, mpu: «Cirhumire asherêza ogu mugavu? 5Ogu mugavu gwankaguzirwe dinari#14, 5 ldinari lyàlimwo nsaranga erhi asi ikumi z’Abaroma. Kuziga idinari magana asharhu zàli nsaranga bihumbi bisharhu z’Abaroma ba mîra. magana asharhu, zihâbwe abakenyi». Balubira oyo mukazi. 6Yezu ababwîra, erhi: «Mumuleke; carhuma mwamulibuza ntya? Cijiro cinjà anjirîre. 7Bulya abakenyi, ensiku zoshi muli haguma nabo, n’amango mwalonza mwanabajirira aminjà; ci niehe arhali ensiku zoshi mwambona. 8Ajizire nka oku anali ahashire. Ene ashîga omubiri gwâni, abîre agurheganya okubishwa. 9Okuli, mmubwîre, ngasi aha Emyanzi y’Akalembe yayigîrizîbwe omu igulu lyoshi, eci cijiro c’oyu mukazi caganîrwe oku kumukengêra».
Yûda alenganya Nnawâbo
(Mat 26, 14-16; Luk 22, 3-6)
10Yûda w’e Keriyoti, muguma muli balya ikumi na babiri, anacijà emwa abajinji b’abadâhwa mpu amuhâne omu maboko gâbo. 11Nabo erhi bayumva ntyo, bacîshinga bwenêne, banamulaganya ensaranga. Obwo akâlonza kurhi abona aha amuhânira.
Amarheganyo ga Basâka
(Mat 26, 17-19; Luk 22, 7-13)
12Omu lusiku lurhanzi lw’emigati erhalimwo lwango, lwo lusiku babâgira Basâka, abaganda bâge bamubwîra, mpu: «Ngahi olonzize rhukurheganyize okulya Basâka?» 13Anacirhuma babiri omu baganda bâge, ababwîra, erhi: «Mujè omu cishagala; mwâshimâna omuntu abarhwîre akabindi k’amîshi, mumukulikire; 14“ngasi ahankaja, mubwîre nn’enyumpa, mpu”: “Omwigîriza adesire ntya”: “Ngahi enyumpa yâni eri, ndîremwo Basâka haguma n’abaganda bâni?” 15“Amuyêreka enyumpa nnene y’enyanya#14, 15 Enyumpa y’enyanya, erhi «igorofa», yo nyumpa eyûbasirwe enyanya y’eyindi. Enyumpa Mwâmi Yezu aliragamwo ishêga lizinda ederhwa Cenakulo omu cilatini; mwo n’Entumwa zayandagaliragwa na Mûka Mutagatîfu. Eyo nyumpa eciba omu Yeruzalemu, abalisalira babalama banakageramwo. , ebambirwe bwinjà enali nteganye; mwo mwarhurheganyiza”». 16Balya baganda balîkûla, bajà omu lugo, bashimana kulya anababwîraga, barheganya Basâka.
Yezu abwîra abaganda bâge oku Yûda amulenganya
(Mat 26, 20-25; Luk 22, 14.21-23)
17Erhi bibà bijingo, ayisha bo na balya ikumi na babiri. 18Erhi bacibà bali oku cîbo, badwîrhe balya, Yezu ababwîra, erhi: «Okuli, mmubwîre, muguma muli mwe, rhudwîrhe rhwalira haguma, ampâna». 19Omutula gwanacibagwârha, bakamudôsa muguma muguma, erhi: «Waliha, ka nie?» 20Naye anacishuza, erhi: «Ali muguma omu ikumi-na-babiri, ohebire okuboko omu nambi nguma rhwe naye. 21Nêci, Mwene-omuntu acîkolera nka oku ayandikîrwe, ci kwônene buhanya bw’oyu muntu Mwene-omuntu ahânwa naye! Kwàkabîre kukulu kuli oyo muntu arhaburhwe!»
Yezu ajira Obukaristiya
(Mat 26, 26-29; Luk 22, 15-20)
22Erhi babà badwîrhe balya, ayanka omugati, n’erhi abà amagugisha, anacigubega, abahà, anaderha, erhi: «Yanki, eci guli mubiri gwâni». 23Ashub’iyanka akahè, avuga omunkwa, abahà, banywakwo boshi. 24Ababwîra, erhi: «Eci guli mukò gwâni gw’amalaganyo mahyâhya, gubulazîrwe banji barhumire. 25Okuli, mmubwîre, ntakacishub’inywa kuli eyi mburho y’omuzâbîbu, kuhika olusiku nâyinywe mpyâhya omu Bwâmi bwa Nyamuzinda»#14, 25 Enyuma y’amababale n’okufûka kwâge, Mwâmi Yezu ajà omu masîma g’Obwâmi bw’empingu..
Yezu alêba oku Petro amuhakana
(Mat 26, 30-35; Luk 22, 31-34; Ywn 13, 36-38)
26Erhi bayûs’iyimba, bahuluka, bajà oku ntondo y’Emizêti. 27Yezu anacibabwîra, erhi: «Obudufu bw’ene mweshi mwâsârhala erhi nie ntuma; bulya kuyandisirwe: Nâshûrha lungere, ebibuzi bishandabane. 28Ci hano nyûs’ifûka, nammushokolera e Galileya». 29Petro amubwîra, erhi: «Ciru boshi bankasârhala erhi we rhuma, niehe nanga!» 30Yezu amushuza, erhi: «Okuli, nkubwîre: ene, muli obu budufu, oluhazi lurhac’ibîka kabiri, wampakana kasharhu». 31Ci yêhe anacigâgala, aderha, erhi: «Ciru kwankabà kufà haguma nâwe, ntakakuhakana!» N’abandi bakuderha boshi.
Yezu omu ishwa ly’e Jetesemani
(Mat 26, 36-46; Luk 22, 40-46)
32Banacihika omu ishwa liderhwa Jetesemani#14, 32 Jetesemani, kuli kuderha «cengero»: «Getsemani» kwo kuyegera amayahudi, Lolà Mat 26, 36.. Abwîra abaganda bâge, erhi: «Mubwârhale aha oku naj’ishenga». 33Anaciyanka Petro bona Yakôbo na Yowane, arhondêra okuyumva oburhè n’amaganya. 34Ababwîra, erhi: «Omurhima gwâni guyunjwîre burhè bw’okulonz’ifà; mubêre aha, mubè masù». 35Erhi ashegûka hitya, acîrhimba oku idaho, ahûna mpu kukahashikana, ako kasanzi kamugere kulî. 36Aderha, erhi: «Abà, Larha, byoshi bihashikana emwâwe: onkûlekwo aka kahè; ci arhali nka oku nalonza, ci nka oku walonza wênene!» 37Anacishubira aha baganda bâge, ashimâna bahunzire; abwîra Petro, erhi: «Simoni, k’oli îrò? Ka ciru orhahashire okuyîza nsâ nguma yône? 38Mubè masù, munashenge, mulek’ishumikwa; bulya omurhima gubà mwangu, ci omubiri gubà muzamba». 39Ashub’igenda, ashenga, aderha nka kulya aderhaga burhanzi. 40Erhi agaluka, ashimâna kandi bali îrò, bulya amasù gâbo gàli mazirho; bahaba kurhi bamushuza. 41Ashub’iyisha obwa kasharhu, ababwîra, erhi: «Lêro mugwishirage munarhamûke. Hoshi aho; amango gahisire: Mwene-omuntu akol’ihânwa omu maboko g’ab’ebyâha. 42Zûki, rhugende! Owampâna oyu oyiruka».
Yezu agwârhwa
(Mat 26, 47-56; Luk 22, 47-53; Ywn 18, 2-11)
43Oku acidwîrhe aderha. Yûda w’e Keriyoti, muguma muli balya ikumi na babiri, y’ono y’ono, adwîrhe ngabo nyinji efumbasire engôrho n’amahiri, erhumirwe n’abajinji b’abadâhwa n’abashamuka b’ihano n’abagula b’olubaga. 44Owamulenganyagya erhi abahire ecimanyîso, erhi: «Oyu nakanunugurha, erhi ye, mumugwârhe, mumuhêke buholo-buholo». 45Oku anayisha ntya, ayirukira amuyegera, amubwîra, erhi: «Mpanyire omusingo, Muyigîriza!» Anacimununugurha. 46Banacimuhirakwo amaboko, bamugwârha. 47Obwo muguma muli balya bahàli ayômola engôrho yâge, ayirhimba mwambali w’Omudâhwa mukulu, amushishimbula okurhwiri. 48Yezu anacibabwîra, erhi: «Ewe, kurhi muyishire nka bantu bashimbire ecishungu, muherhe engôrho n’amahiri, mul’ingwârha? 49Ngasi lusiku nali ninyu nayigîriza omu ka-Nyamuzinda, murhanangwârhaga. Ci okwo kwoshi mpu lyo Amandiko gayunjula». 50Obwo abaganda bâge banacimuleka, bayâka boshi. 51Mwâna muguma wa musole amukulikira, erhi ntâco ayambîrhe ecirhali cirondo câge conene; bamugwârha. 52Ci yêhe abalekera cirya cirondo#14, 52 Banji baderha mpu Marko yêne oyo wacidcrha. , acîlibirhira bushugunu.
Yezu ahêkwa emwa Omudâhwa mukulu
(Mat 26, 57-68; Luk 22, 54.63-71; Ywn 18, 15-16.18)
53Banacihêka Yezu emwa Omudâhwa mukulu; nabo abajinji b’abadâhwa, abagula b’olubaga n’abashamuka b’ihano bayishûbûkira boshi. 54Naye Petro erhi amugumire omu cirali kuhika omu côgo c’Omudâhwa mukulu; abwârhala oku cîko haguma n’abalalizi, akàkalûka. 55Abajinji b’abadâhwa n’ihano lyoshi bakâlonza obuhamîrizi kuli Yezu, mpu lyo bamuyîrha, ci babubula. 56N’obwo abahamîrizi b’obunywesi bâli bayishire banji, ci amahamîrizi gâbo garhàyumvanyagya. 57Hanaciyimanga baguma, bamunywêrhera, mpu: 58«Rhwamuyumvîrhe aderha, mpu: “Nâshâba aka ka-Nyamuzinda kayûbakagwa n’amaboko g’abantu, n’omu nsiku isharhu nyunjuze akandi karhayûbasirwi na maboko ga bantu”». 59Ciru na muli okwo obuhamîrizi bwâbo burhayumvanyagya. 60Okubundi Omudâhwa mukulu anaciyimanga ekarhî, adôsa Yezu, erhi: «Ci orhashuza? Kurhi okwo abà bantu badwîrhe bakuderhera?» 61Yêhe acîhulikira, arhashagalaga kanwa. Omudâhwa mukulu ashub’imudôsa anamubwîra, erhi: «Ka we Kristu, Mugala w’Omugishe#14, 61 «Omugishe», ye Nyamuzinda, Nnâmahanga. Abayahudi barhasîmaga okuderha izîno lya Nyamuzinda, bakâg’irhînya, balibè nshishinyi erhi kulikenga kurhuma.?» 62Yezu anacimushuza, erhi: «Nêci, ndi ye; mwânacibone Mwene-omuntu abwârhîre ekulyo kw’Ogala-byoshi anayishire omu bitù by’emalunga». 63Aho Omudâhwa mukulu asharhula e myambalo yâge, anaderha, erhi: «Bici rhwacilongeza abahamîrizi? 64Mwayumvîrhe oku alogorha; kurhi mubwîne?» Boshi bamutwîra oku akwânîne okufà. 65Okubundi baguma banarhondêra okumumesherakwo, n’erhi babà bamamubwîka obusù, bakàmurhimba ebifundo banaderha, mpu: «Lêbaga!» N’abalalîzi bakamushûrha empî.
Petro ahakana Nnawâbo
(Mat 26, 69-75; Luk 22, 55-62; Ywn 18, 15-18.25-27)
66Erhi Petro abà akola ali omu côgo idako, hâyisha mujà-nyere muguma w’Omudâhwa mukulu. 67Erhi abona Petro adwîrhe akalûka, amusinza anamubwîra, erhi: «Nâwe wali haguma na Yezu w’e Nazareti». 68Naye anacihakana, aderha, erhi: «Ntishi, ciru ntumvîrhi ebi odesire». Anacihuluka, ajà ebwa lumvi; oluhazi lwabika. 69Erhi olya mujà-nyere amubona, ashub’irhondêra abwîra abahali, erhi: «Oyo ali wa muli bo!» 70Ci yêhe ashub’ilahira. Erhi kugera kasanzi, abàli halya babwîra Petro, mpu: «Mâshi oli wa muli bo, bulya oli Mugalileya». 71Okuhandi arhondêra alahira analahiriza, erhi: «Mâshi oyo muntu mwaderha, ntamuyishi», 72Obwo oluhazi lwabika obwa kabiri. Aho Petro akengêra kalya kanwa Yezu amubwîraga: «Embere oluhazi lubike kabiri, wa mpakana kasharhu». Anacirhondêra okuvugumula emirenge.
Chwazi Kounye ya:
Marko 14: MKB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Mashi Bible © BUKAVU Archdiocese of Bukavu, 2024.