Marko 12
12
Omugani gw’abahinzi babî
(Mat 21, 33-46; Ywn 20, 9-19)
1Obwo arhondêra okubabwîra omu migani: «Muntu muguma anacihinga olukoma lw’emizâbîbu, aluyûbakira olugurhu, ahebamwo omukenzi, agwîkamwo omutungo; okubundi alusigira abahinzi, acîbalamira. 2“Erhi amango gahika, arhuma omwambali mpu abahinzi bamuhè eyâge mizâbîbu”. 3“Bôhe banacimugwârha, bamushûrha, bamulîka maboko mûmu”. 4“Ashub’îbarhumira owundi mwambali; oyo bamubera oluguma banamujacira kubî”. 5“Ashub’irhuma owundi; yêhe bamuniga. N’abandi mwandu; baguma bashûrhwa, abandi banigwa”. 6“Obwo erhi acigwêrhe mugala wâge muguma murhonyi bwenêne. Buzinda naye abarhumiraye, aderha, erhi”: “Bakenga mugala wâni yêhe!” 7“Ci abahinzi babwîrana, mpu”: “Oyu, yo nfula yâyîme: yishî rhuyinige, rhuyish’ibà rhwe rhucîyîmira muli byo!” 8“Banacimurhuluba, bamuyîrha, bamukwêba emûhûlo gw’olukoma”. 9“Kurhi nn’olukoma ayish’ijira obwo?” “Ayisha, ahôrha balya bahinzi, n’olukoma aluhè abandi”. 10“Ka murhasâg’isoma ntya omu Mandiko”: “Ibuye abûbasi bagayaguzagya, lyayish’ibà kaboko ka nyumpa”; 11“Nyakasane yêne wakolaga ebyo, byanabà bisômerîne omu masù gîrhu#12, 11 Lul 117 (118), 22-23.”». 12Balonza oku bamugwârha, ci bayôboha olubaga; bulya bâli bayumvîrhe oku ogwo mugani bo guyêrekîre. Banacimuleka, bagenda.
Okuvurhira Sezari
(Mat 22, 15-22; Luk 20, 20-26)
13Banacimurhumira baguma omu Bafarizeyi n’omu Baherodi mpu bamurhege omu nderho. 14Banaciyisha, bamubwîra, mpu: «Waliha Muyigîriza, rhuyishi oku oderha okuli n’oku orhajira kabôlo kuli ndi, bulya orhalola ola ye ndi omu bantu, ci enjira ya Nyamuzinda onayiyigîrize nk’oku enali. Ka kukwânîne rhukavurhira Sezari erhi nanga?» 15Naye bulya àli amanyire obulyâlya bwâbo, ababwîra, erhi: «Cirhumire mwantega? Nderheri olusaranga ndole». 16Balulêrha. Anacibadôsa, erhi: «Ya ndi eyi nshusho n’aga mandiko?» Bashuza, mpu: «Bya Sezari». 17Yezu anacibabwîra, erhi: «Ahoo! ebya Sezari bigaluliragi Sezari, n’ebya Nyamuzinda mubihè Nyamuzinda». Banacisômerwa bwenêne.
Okufûka kw’abafîre
(Mat 22, 23-33; Luk 20, 27-40)
18Abasaduceyi, balya bakaderha mpu ntà bufûke bw’abafîre, banacimujaho, bamudôsa, mpu: 19«Muyigîriza, Mûsa arhurhegesire mpu irhondo mwene wâbo omuntu akafà nka alesire omukazi orhagwêrhi bâna, mwene wâbo anayinjire mukâge, ahè mwene wâbo iburha. 20Hàli ba-nda-nguma nda. Omurhanzi ayanka omukazi, afà arhanasiziri mwâna. 21Owa kabiri ayinjira mukâge; naye afà buzira mwâna. Owa kasharhu naye kwo n’okwo. 22Ntâye muli bo oku bali nda wasizire mwâna. Enyuma ya boshi, lêro nyamukazi naye anacifà. 23Ewe, aha kufûka kw’abafù, ayish’ibà mukà ndi muli bo? Bulya oku bali nda bâli bamuyansire». 24Yezu erhi abashuza, ababwîra, erhi: «Ka murhahabusiri obwo, erhi kurhamanya Amandiko n’obuhashe bwa Nyamuzinda kurhuma? 25“Bulya aha kufûka kw’abafù, ntâye wâshebe na ntâye washebwe, ci bacîbêra nka bamalahika omu mpingu”. 26“N’oku bufûke bw’abafù, ka murhasâg’isoma omu citabu ca Mûsa, halya baganîre olw’Ishaka lyagulumira, aka kanwa Nyamuzinda amubwîraga#12, 26 lolà Lub 3, 1-6. , erhi aderha, erhi: Nie Nyamuzinda wa Abrahamu, Nyamuzinda wa Izaki, Nyamuzinda wa Yakôbo?” 27“Arhali Nyamuzinda wa mifù, ci wa bagumagumà. Mâshi mudwîrhe mwacîrheba bwenêne!”»
Irhegeko lirhanzi omu marhegeko goshi
(Mat 22, 34-40; Luk 10, 25-28)
28Muguma omu bashamuka b’ihano àli ayumvîrhe oku badalika. Erhi abona oku abashuzize bwinjà, anacimudôsa, erhi: «Irhegeko lihi liri lirhanzi omu marhegeko goshi?» 29Yezu amushuza, erhi: «Irhegeko lirhanzi lyo eli: “Yumva, Israheli. Nyakasane Nyamuzinda wîrhu yênene Nyamuzinda”; 30“wakâzigira Nyakasane Nyamuzinda wâwe n’omurhima gwâwe goshi, n’omûka gwâwe gwoshi, n’obukengêre bwâwe boshi, n’emisî yâwe yoshi#12, 30 Vulgata: Elyo lyo irhegeko lirhanzi. ”. 31“Elya kabiri lyo eli”: “Wakâzigira owinyu nk’oku ocîzigira wênene”. “Ntalindi irhegeko lilushire ago”». 32Olya mushamuka w’ihano amubwîra, erhi: «Nêci, Mwigîriza, odesire oku binali: “oku Nyamuzinda ali muguma yênene n’oku ntà wundi aha nyuma lyâge”. 33“Okumuzigira n’omurhima goshi, n’obukengêre boshi, n’emisî yoshi, n’okuzigira owinyu nk’oku ocîzigira wênene, kulushire enterekêro zoshi n’entûlo zoshi”». 34Yezu erhi abona oku ashambîre kwinjà amubwîra, erhi: «Obwâmi bwa Nyamuzinda burhakuli kulî». Na ntâye wacikâg’ihalîza mpu amudôsa.
Kristu mugala wa Daudi na Nnawâbo
(Mat 22, 42-46; Luk 20, 41-44)
35Erhi abà adwîrhe ayigîriza omu ka-Nyamuzinda, Yezu anaciderha, erhi: «Kurhi abashamuka b’ihano baderha mpu Kristu ali mwene Daudi? 36N’obwo Daudi yênene adesire oku buhashe bwa Mûka Mutagatîfu, erhi: Nyakasane abwîzire Nnâhamwîrhu: Bwârhala ebwa kulyo kwâni, kuhika abanzi bâwe#12, 36 Lul 109, 1. mbayandaze burhaba aha magulu gâwe. 37Daudi yêne akudesire mpu ye Nnawâbo; kurhi aligi mugala?» Olubaga lwakamuyumvîrhiza lunasîmire.
Obulyâlya bw’abashamuka b’ihano
(Mat 23, 6-7; Luk 20, 45-47; 11, 43)
38Ababwîra omu nyigîrizo zâge, erhi: «Mucîlange oku bashamuka b’ihano, abasîma okulambagira bayambîrhe ebishûli birîrî n’okulamusibwa oku irango, 39“n’oku bwârhala oku ntebe ntanzi omu masinagogi, n’ebibwârhalo birhanzi oku cîbo c’idinye”; 40“abakâja balya ebya abakana banaderha amasala malîmalî. Abo bayish’ibona olubanja ludârhi kurhaluka”».
Entûlo y’omukana
(Luk 21, 1-4)
41Yezu anacibwârhala aha bwa mucîmba gw’ecibîkiro, akalola oku abantu bahira ensaranga omu mucîmba gw’ecibîkiro. Bahirhi banji bahiramwo nyinji. 42Lêro hâyisha mukana muguma wa buligo, ahiramwo bujuma bubiri, bwo nk’ikuta. 43Anacikema abaganda bâge, ababwîra, erhi: «Mmubwîre, okuli, oyu mukana mukenyi ahânyire kulusha boshi bahiraga omu cibîkiro. 44Bulya, boshi bahiziremwo oku bisigala oku bunguke bw’ebirugu byâbo; ci yêhe omu bukenyi bwâge ahiziremwo ehi anali agwêrhe hyoshi, ehyankamubîsire hyoshi».
Chwazi Kounye ya:
Marko 12: MKB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Mashi Bible © BUKAVU Archdiocese of Bukavu, 2024.