Marko 11
11
IV. Yezu e Yeruzalemu
Yezu ajà omu Yeruzalemu
(Mat 21, 1-11; Luk 19, 28-38; Ywn 12, 12-16)
1Erhi bakola bahika e Yeruzalemu, hôfi n’e Betifaje n’e Betaniya, ah’idako ly’entondo y’Emizêti, Yezu arhuma babiri omu baganda bâge, 2ababwîra, erhi: «Jimwo cira cishagala cimuyêrekîre; hano muhikamwo, mwâshimâna omucukà gw’endogomi guli mushwêke, gurhasâg’igendwakwo na muntu. Mugushwêkûle munagundêrhere. 3Hakajira owakamubwîra, mpu: “Kurhi oku?” “Munamushuze oku Nyakasane agulonza”; “ho n’aho anagurhuma eno”». 4Balîkûla, bashimâna omucukà gw’endogomi guli mushwêker’emuhanda, omu mashanganizo; bagushwêkûla. 5Baguma omu bâli bayimanzire aho bababwîra, mpu: «Kurhi okwo mwashwêkûla ogwo mucûkà gw’endogomi?» 6Bashuza nka kulya Yezu anababwîraga; barhacibayâlulaga. 7Banacilêrhera Yezu gulya mucûkà gw’endogomi, babambakwo ebishûli byâbo; naye aburhamalakwo. 8Abantu mwandu babamba ebishûli byâbo omu njira; abandi batwa amashami g’emirhi omu mashwa, bagabamba omu njira. 9Abàli bashokwîre n’abàli enyuma, bayisha babanda orhuhababo, mpu: «Hozana! Agishwe oyu oyishire oku izîno lya Nyakasane!» 10Bugishwe Obwâmi buyishire bwa larha Daudi! Hozana#11, 10 Hozana, kuli kuderha: «irenge», «aganze»! omu mpingu enyanya! 11Erhi ahika omu Yeruzalemu, ajà omu ka-Nyamuzinda; n’erhi abà amahengûza enyunda zoshi, bulya ecajingwe càli camabà, ahuluka, aj’e Betaniya bo na balya ikumi na babiri.
Yezu ahehêrera omulehe
(Mat 21, 18-19)
12Erhi buca, bakola barhenga e Betaniya, ishali lyamugwârha. 13Alangira omurhi gw’amalehe guyâsize, agujaho mpu alole erhi abonakwo irehe. Erhi aguhikaho, ntâco abwînekwo, agarhali mâsi gwônene bulya garhali mango ga malehe. 14Anacibwîra gulya mulehe, erhi: «Mâshi irhondo orhacifâga walibirwekwo irehe!» Abaganda bâge nabo bayumva#11, 14 Ogwo mulehe luli lwîganyo lwa muguma muli rhwe orhayâna malehe omu murhima gwâge. Amalehe Mwâmi Yezu arhuhûna, kuli kulanga inêma ly’obucêse n’okujira ebijiro binjà. .
Yezu ahulusa abakâg’ikaguliza omu ka-Nyamuzinda
(Mat 21, 12-17; Luk 19, 45-48; Ywn 2, 14-16)
15Banacihika e Yeruzalemu. Erhi ajà omu ka-Nyamuzinda, arhondêra ahulusa abakâg’ikaguliza n’okugulira omu ka-Nyamuzinda; akulumbya oburhalulè bw’abakâg’ikâba, anahirimya entebe z’abarhunzi b’engûkù. 16Arhayêmêraga omuntu ageze akantu omu ka-Nyamuzinda. 17Erhi akola abayigîriza, ababwîra, erhi: «Ka kurhayandisirwi ntya: Enyumpa yâni yâderhwe nyumpa ya nsengero oku mashanja goshi? Ci mwêhe mwamayijiraga lukunda lwa bishambo!» 18Erhi abajinji b’abadâhwa n’abashamuka b’ihano bayumva eyo myanzi, balonza kurhi bamuyîrha; ci bamuyôboha, bulya olubaga lwoshi lwakâg’isômerwa n’enyigîrizo zâge. 19Erhi kubà bijingo, arhenga omu cishagala.
Okuyûma kw’omulehe Obuyêmêre n’ensengero
(Mat 21, 20-22)
20Erhi kubà sêzi, bakola bashub’igera, bashimâna gulya murhi gw’amalehe gwayûmire kuhika omu cisinasina. 21Petro akengêra, amubwîra, erhi: «Waliha, k’obwîne! gulya mulehe wahehereraga ogu gwayûmire». 22Yezu anacishuza, ababwîra, erhi: «Muyêmêre Nyamuzinda. 23Okuli mmubwîre, ngasi yeshi wabwîre eyi ntondo, erhi: ‘Yimuka, ocikwêbe omu nyanja’, nka arharhindîrî emurhima gwâge, ci akabà ayêmîre oku kulya anadesire kwâbà, kwanabà. 24Co cirhumire mmubwîra: ngasi eci mwâhûne nka mwashenga, mulangâlire oku mîra mwacishobôlaga, mwanacihâbwa. 25Na nka muyimanzire, mudwîrhe mwashenga, akabà hali oyu mubikîre akarhinda emurhima, mûmubabalire, lyo Sho w’empingu naye ammubabalira amabî ginyu». [26N’akabà murhababalîri abinyu bantu, naye Sho w’empingu arhamubabalire ebyâha binyu#11, 26 Lolà Mat 6, 15..]
Abayahudi badôsa Yezu ngahi obuhashe bwâge burhenga
(Mat 21, 23-27; Luk 20, 1-8)
27Bashub’ijà e Yeruzalemu. Erhi abà adwîrhe alambagira omu ka-Nyamuzinda, abakulu b’abadâhwa, abashamuka b’ihano n’abagula b’olubaga bamujaho, 28banacimubwîra, mpu: «Buhashe buhi ojiramwo ebi byoshi? Na ndi wakuhâga obwo buhashe bw’okubijira?» 29Naye Yezu abashuza, ababwîra, erhi: «Nâni nammudôsa kanwa kaguma. Munshuze, nâni nammubwîra obuhashe njiramwo ebi. 30Obubatizo bwa Yowane, k’empingu bwarhengaga erhi emwa abantu? Munshuze». 31Obwo bacîjamwo, bakaderha, mpu: «rhukaderha nti empingu, akola arhudôsa, erhi: “Carhumaga murhacimuyêmêra?” 32“Na rhukaderha nti emwa abantu, abà bantu barhuyîrha, bulya boshi kwo bakâg’ilolà Yowane nka mulêbi w’okuli”». 33Banacishuza Yezu, mpu: «Rhurhamanyiri là». Naye Yezu ababwîra, erhi: «Nâni ntacimmubwîre buhashe buhi njira mwo ebi».
Chwazi Kounye ya:
Marko 11: MKB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Mashi Bible © BUKAVU Archdiocese of Bukavu, 2024.