Marko 10
10
Ka kuyêmêrîrwe omuntu ahuluse mukâge?
(Mat 19, 1-9)
1Erhi arhenga eyo munda, ajà omu lya Yûda, ishiriza lya Yordani. Engabo y’abantu yashub’imulundûkira; abayigîriza nk’oku anayôrhera. 2Abafarizeyi banacimujaho; bamudôsa kwa kumurhangula, mpu: «Ka kuyêmêrîrwe omuntu ahuluse mukâge?» 3Naye erhi ashuza, ababwîra, erhi: «Kurhi Mûsa ammurhegesire?» 4Nabo, mpu: «Mûsa ayêmîre okuyandika ecêrhè c’okuvuna obuhya n’okumuhulusa». 5Yezu abashuza, erhi: «Buzibu bwa mirhima yinyu bwarhumire Mûsa ammujirira eryo irhegeko. 6Ci erhi Nyamuzinda arhondêra okulema, ajizire omulume n’omukazi. 7Co carhuma omuntu aleka îshe na nnina, acishwêkerekwo mukâge, 8banabè babiri omu mubiri muguma. Na ntyo barhaciri babiri, ci gukola mubiri muguma. 9Mâshi! arhali omuntu ye wahumanula eci Nyamuzinda ahumanyagya». 10Erhi bahika omu nyumpa, abaganda bâge bashub’imudôsa kuli ako kanwa. 11Ababwîra, erhi: «Ngasi yêshi wâhuluse mukâge akanayanka owundi, erhi kuhusha ahushire; 12n’omukazi wâleke ibà, agend’iyankwa n’owundi, erhi naye kuhusha ahushire».
Yezu n’abâna barhò
(Mat 19, 13-15; Luk 18, 15-17)
13Banacimulêrhera abâna mpu abahumekwo; ci abaganda bâge bakalihira abâli babadwîrhe. 14Erhi Yezu abona, agaya anababwîra, erhi: «Leki abâna! bajè ahandi; murhabahanzagya, bulya ababashusha#10, 14 Abashusha abâna, kwo kuderha abalangâlira Nnâmahanga kulya omwâna alangâlira îshe na nnina, abajira omurhima gucîre nka gwa bâna barhò, abarhabîka bukunizi, abîrhôhye… Orhajira nka mwâna, orhacîsêza okushimba amakomezi minjà g’enjira y’empingu, oyo arhakalabarha omu Bwâmi bwa Yezu., Obwâmi bwa Nyamuzinda buli bwâho. 15Mmubwîre okuli: ngasi yêshi orhayankiriri Obwâmi bwa Nyamuzinda nka mwâna murhò, arhakabulabarhamwo». 16Obwo anacibabagalira, abahirakwo amaboko, abagisha.
Omuntu wali ogwêrhe birugu binji
(Mat 19, 16-22; Luk 18, 18-23)
17Erhi abà amalîkûla, akol’ali omu njira, muntu muguma ayish’alibisire, amufukamira, amudôsa, erhi: «Waliha Mwigîriza mwinjà, kurhi njirage lyo mbona obuzîne burhahwa?» 18Yezu amubwîra, erhi: «Cirhumire onderha mwinjà? Ntâye ôbà mwinjà aha nyuma lya Nyamuzinda yênene. 19Oyishi amarhegeko: Orhahîra kanigana, orhahîra okahusha, orhahîra okazimba, orhahîra okahamîriza obunywesi, orhahîra okalya ebya bene, okaz’ikenga sho na nyoko». 20Olya naye amushuza, erhi: «Yâgirwa, ebyo byoshi mbikulikira kurhenga eburhò bwâni». 21Obwo Yezu anacimusinza, amuzigira, anamubwîra, erhi: «Ciguma cône cicikusigalire: ogende, oj’iguza ebi ogwêrhe byoshi, ohè abakenyi, ly’oyîsh’ibona obuhirhi omu mpingu; okubundi oyîshe, onshimbe». 22Erhi ayumva ako kanwa, oburhè bwamuhêka, bulya àli agwêrhe birugu binji.
Okuhika omu mpingu kw’omugale kuli kudârhi
(Mat 19, 23-26; Luk 18, 24-27)
23Yezu anacilola eyi n’eyi, abwîra abaganda bâge, erhi: «Kuli kudârhi okuhika kw’abagale omu Bwâmi bwa Nyamuzinda!» 24Abaganda bâge basômerwa n’enderho zâge. Ci Yezu ashubîrira, ababwîra, erhi: «Bâna bâni, kuli kudârhi okuhika omu Bwâmi bwa Nyamuzinda! 25Okugeza engamiya omu murhule gw’ensinge kuli kulembu kulusha okuhisa omugale omu Bwâmi bwa Nyamuzinda!» 26Nabo bazânwa bwenêne-bwenêne, bakadôsanya bône na nnene, mpu: «Ndi wâcungukage obwo?» 27Yezu abagezamwo amasù, abàbwîra, erhi: «Emwa abantu okwo kurhankahashikana, ci arhali emwa Nyamuzinda: bulya ntâco cankayabira Nyamuzinda!»
Oluhembo lw’abalesire eby’en’igulu
(Mat 19, 27-30; Luk 18, 28-30)
28Petro anacimubwîra, erhi: «Obu rhuli aha, rhwalesire byoshi, rhwakushimba!» 29Naye Yezu ashuza, erhi: «Okuli, mmubwîre, ntâye waleke enyumpa yâge, bene wâbo, bâli bâbo, îshe, nnina, abâna erhi mashwa gâge nie ntuma n’Emyanzi y’Akalembe erhuma, 30“abule kuhâbwa kali igana, buno, en’igulu: enyumpa, bene wâbo, bâli bâbo, bannina, abâna n’amashwa, haguma n’amalibuko#10, 30 Ntà muganda wa Mwâmi Yezu wankabula amalumwa n’amalibuko, omuganda ashusha nnawâbo. , n’omu mango gaciyisha, akalamo karhahwa”. 31“Na banji bali barhanzi bayish’ibà bazinda, n’abazinda bâbè barhanzi”».
Yezu abwîra Entumwa obwa kasharhu oku ayish’ibabazibwa
(Mat 20, 17-19; Luk 18, 31-33)
32Erhi bali omu njira, bayinamukira e Yeruzalemu. Yezu erhi abashokolîre; nabo bazânwa, n’abâli babakulikîre bayôboha#10, 32 Yezu ali ashokwîre, Entumwa zakulikira, zayisha zazânwa; ahandi baganda ba Mwâmi Yezu bayisha nyuma banayôbohire.. Ashub’iyanka balya ikumi na babiri, arhondêra okubabwîra oku ayish’ibà, erhi: 33«Rhw’ono rhwarheremera e Yeruzalemu: Mwene-omuntu âhânwa omu maboko g’abajinji b’abadâhwa n’abashamuka b’ihano. Bayish’imutwîra okufà, banamuhâne e mw’abapagani. 34Nabo bamushekere, bamumesherekwo, bamushûrhe emikoba banamuyîrhe, na hano hagera nsiku isharhu, afûke».
Bene-Zebedeyo
(Mat 20, 20-23)
35Bene-Zebedeyo, Yakôbo na Yowane, banacimujaho, bamubwîra, mpu: «Waliha, rhulonzize ngasi kwoshi rhwakuhûna orhujirirekwo». 36Naye abashuza, erhi: «Cici mwalonza mmujirire?» 37Nabo, mpu: «Orhujire rhubwârhale, muguma ekulyo, owundi ekumosho kwâwe omu irenge lyâwe». 38Yezu anacibashuza, erhi: «Murhamanyiri eci muhunyire. Ka mwankahash’inywa akabehe#10, 38 Akabehe n’obubatizo: Amababale n’amalumwa ayish’ibona. nayîsh’inywa, erhi mubatizibwe obubatizo nayîsh’ibatizibwa?» 39Nabo, mpu: «Rhwanahasha». Yezu ababwîra, erhi: «Akabehe nayîsh’inywa, kôhe mwâkanywa, n’obuhatizo nayîsh’ibatizibwa, mwâbubatizibwa. 40Ci okubwârhala ekulyo erhi ekumosho kwâni, arhali nie nâmmuhêkwo, ci kuli kwa balya bakurheganyizîbwe».
Abakulu bakwânîne okubà barhumisi b’abâbo
(Mat 20, 24-28; Luk 22, 24-27)
41Erhi balya bandi ikumi bayumva ntyo, barhondêra okududumira Yakôbo na Yowane. 42Okubundi Yezu anacibahamagala hôfi naye, ababwîra, erhi: «Murhahabiri oku emwa abapagani, abarhegesi kwo barhegeka nka banyakasane, n’abakulu banabayêreke obukulu bwâbo. 43Arhali kwo byâbà ntyo muli mwe: mwêhe owalonz’ibà mukulu muli mwe, acîjire murhumisi winyu 44na ngasi walonz’ibà wa burhanzi muli mwe, acîjire mujà wa boshi. 45Ntyo Mwene-omuntu arhayishaga mpu arhumikirwe, ci mpu arhumikire abandi, anahâne obuzîne bwâge lyo acungula banji».
Omuhûrha gw’e Yeriko
(Mat 20, 29-34; Luk 18, 35-43)
46Banacihika e Yeriko. Erhi acirhenga e Yeriko bo n’abaganda bâge na ngabo nyinji y’abantu, barhimâna Bartimeyo, mwene-Timeyo. Gwàli muhûrha; erhi gubwârhîre oku njira, gudwîrhe gwahûnira obuligo. 47Erhi ayumva oku Yezu w’e Nazareti wagera, arhondêra okuyakûza, erhi: «Mâshi Yezu, Mwene-Daudi, ombêre obwonjo nâni!» 48Banji banacimukankamira mpu ahulike; ci yêhe anaciyâma, alushîsa, erhi: «Mâshi Mwene-Daudi, ombêre obwonjo nâni!» 49Obwo Yezu ayimanga, arhegeka mpu bamulêrhe. Bahamagala olya muhûrha, bamubwîra, mpu: «Simika! oyimuke, akuhamagîre». 50Anacikwêba ecirondo câge, ahama, ajà emunda Yezu àli. 51Yezu amudôsa, erhi: «Cici walonza nkujirire?» Naye olya muhûrha, erhi: «Yâgirwa, nti nâni mbone». 52Yezu amubwîra, erhi: «Gendaga, obuyêmêre bwâwe bwakufumize». Na ho na halya ayirukir’abona; anacimukulikira.
Chwazi Kounye ya:
Marko 10: MKB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Mashi Bible © BUKAVU Archdiocese of Bukavu, 2024.